সর্গ 68

68.1

কথাং কথয়তাং তেষাং জয়ং চাকাঙ্ক্ষতাং শুভম্ ।
ব্যতীতা রজনী শীঘ্রং শত্রুঘ্নস্য মহাত্মনঃ ।। ৭.৬৮.১ ॥

ততঃ প্রভাতে বিমলে তস্মিন্কালে স রাক্ষসঃ ।
নির্গতস্তু পুরাদ্ধীরো ভক্ষ্যাহারপ্রচোদিতঃ ।। ৭.৬৮.২ ॥

এতস্মিন্নন্তরে বীরঃ শত্রুঘ্নো যমুনাং নদীম্ ।
তীর্ত্বা মধুপুরদ্বারি ধনুষ্পাণিরতিষ্ঠত ।। ৭.৬৮.৩ ॥

ততো ঽর্ধদিবসে প্রাপ্তে ক্রূরকর্মা স রাক্ষসঃ ।
আগচ্ছদ্বহুসাহস্রং প্রাণিনাং ভারমুদ্বহন্ ।। ৭.৬৮.৪ ॥

ততো দদর্শ শত্রুঘ্নং স্থিতং দ্বারি ধৃতায়ুধম্ ।
তমুবাচ ততো রক্ষঃ কিমনেন করিষ্যসি ।। ৭.৬৮.৫ ॥

ঈদৃশানাং সহস্রাণি সায়ুধানাং নরাধম ।
ভক্ষিতানি ময়া রোষাত্কালমাকাঙ্ক্ষসে নু কিম্ ।। ৭.৬৮.৬ ॥

আহারশ্চাস্য সম্পূর্ণো মমায়ং পুরুষাধম ।
স্বয়ং প্রবিষ্টো ঽদ্য মুখং কথমাসাদ্য দুর্মতে ।। ৭.৬৮.৭ ॥

তস্যৈবং ভাষমাণস্য হসতশ্চ মুহুর্মুহুঃ ।
শত্রুঘ্নো বীর্যসম্পন্নো রোষাদশ্রূণ্যবাসৃজৎ ।। ৭.৬৮.৮ ॥

তস্য রোষাভিভূতস্য শত্রুঘ্নস্য মহাত্মনঃ ।
তেজোময়া মরীচ্যস্তু সর্বগাত্রৈর্বিনিষ্পতন্ ।। ৭.৬৮.৯ ॥

উবাচ চ সুসঙ্ক্রুদ্ধঃ শত্রুঘ্নস্তং নিশাচরম্ ।
যোদ্ধুমিচ্ছামি দুর্বুদ্ধে দ্বন্দ্বয়ুদ্ধং ত্বয়া সহ ।। ৭.৬৮.১০ ॥

পুত্রো দশরথস্যাহং ভ্রাতা রামস্য ধীমতঃ ।
শত্রুঘ্নো নিত্যশত্রুঘ্নো বধাকাঙ্ক্ষী তবাগতঃ ।। ৭.৬৮.১১ ॥

তস্য মে যুদ্ধকামস্য দ্বন্দ্বয়ুদ্ধং প্রদীয়তাম্ ।
শত্রুস্ত্বং সর্বভূতানাং ন মে জীবন্গমিষ্যসি ।। ৭.৬৮.১২ ॥

তস্মিংস্তথা ব্রুবাণে তু রাক্ষসঃ প্রহসন্নিব ।
প্রত্যুবাচ নরশ্রেষ্ঠং দিষ্ট্যা প্রাপ্তো ঽসি দুর্মতে ।। ৭.৬৮.১৩ ॥

মম মাতৃষ্বসুর্ভ্রাতা রাবণো রাক্ষসাধিপঃ ।
হতো রামেণ দুর্বুদ্ধে স্ত্রীহেতোঃ পুরুষাধম ।। ৭.৬৮.১৪ ॥

তচ্চ সর্বং ময়া ক্ষান্তং রাবণস্য কুলক্ষয়ম্ ।
অবজ্ঞাং পুরতঃ কৃত্বা ময়া যূয়ং বিশেষতঃ ।। ৭.৬৮.১৫ ॥

নিহতাশ্চ হি মে সর্বে পরিভূতাস্তৃণং যথা ।
ভূতাশ্চৈব ভবিষ্যাশ্চ যূয়ং চ পুরুষাধমাঃ ।। ৭.৬৮.১৬ ॥

তস্য তে যুদ্ধকামস্য যুদ্ধং দাস্যামি দুর্মতে ।
তিষ্ঠং ত্বং চ মুহূর্তং তু যাবদায়ুধমানয়ে ।ঈপ্সিতং যাদৃশং তুভ্যং সজ্জয়ে যাবদায়ুধম্ ।। ৭.৬৮.১৭ ॥

তমুবাচাশু শত্রুঘ্নঃ ক্ব মে জীবন্গমিষ্যসি ।
শত্রুর্যদৃচ্ছয়া দৃষ্টো ন মোক্তব্যঃ কৃতাত্মনা ।। ৭.৬৮.১৮ ॥

যো হি বিক্লবয়া বুদ্ধ্যা প্রসরং শত্রবে দদৌ ।
স হতো মন্দবুদ্ধিত্বাদ্যথা কাপুরুষস্তথা ।। ৭.৬৮.১৯ ॥

তস্মাত্সুদৃষ্টং কুরু জীবলোকং শরৈঃ শিতৈস্ত্বাং বিবিধৈর্নয়ামি ।
যমস্য গেহাভিমুখং হি পাপং রিপুং ত্রিলোকস্য চ রাঘবস্য ।। ৭.৬৮.২০ ।।