Utshovসর্গ 67
67.1
অথ রাত্র্যাং প্রবৃত্তায়াং শত্রুঘ্নো ভৃগুনন্দনম্ ।
পপ্রচ্ছ চ্যবনং বিপ্রং লবণস্য যথা বলম্ ।। ৭.৬৭.১ ॥
67.2
শূলস্য চ বলং ব্রহ্মন্কে চ পূর্বং বিনাশিতাঃ ।
অনেন শূলমুখ্যেন দ্বন্দ্বয়ুদ্ধমুপাগতাঃ ।। ৭.৬৭.২ ॥
67.3
তস্য তদ্বচনং শ্রুত্বা শত্রুঘ্নস্য মহাত্মনঃ ।
প্রত্যুবাচ মহাতেজাশ্চ্যবনো রঘুনন্দনম্ ।। ৭.৬৭.৩ ॥
67.4
অসঙ্খ্যেয়ানি কর্মাণি যান্যস্য রঘুনন্দন ।
ইক্ষ্বাকুবংশপ্রভবে যদ্বৃত্তং তচ্ছৃণষ্ব মে ।। ৭.৬৭.৪ ॥
67.5
অয়োধ্যায়াং পুরা রাজা যুবনাশ্বসুতো বলী ।
মান্ধাতেতি স বিখ্যাতস্ত্রিষু লোকেষু বীর্যবান্ ।। ৭.৬৭.৫ ॥
67.6
স কৃত্বা পৃথিবীং কৃত্স্নাং শাসনে পৃথিবীপতিঃ ।
সুরলোকমিতো জেতুমুদ্যোগমকরোন্নৃপঃ ।। ৭.৬৭.৬ ॥
67.7
ইন্দ্রস্য চ ভয়ং তীব্রং সুরাণাং চ মহাত্মনাম্ ।
মান্ধাতরি কৃতোদ্যোগে দেবলোকজিগীষয়া ।। ৭.৬৭.৭ ॥
67.8
অর্ধাসনেন শক্রস্য রাজ্যার্ধেন চ পার্থিবঃ ।
বন্দ্যমানঃ সুরগণৈঃ প্রতিজ্ঞামধ্যরোহত ।। ৭.৬৭.৮ ॥
67.9
তস্য পাপমভিপ্রায়ং বিদিত্বা পাকশাসনঃ ।
সান্ত্বপূর্বমিদং বাক্যমুবাচ যুবনাশ্বজম্ ।। ৭.৬৭.৯ ॥
67.10
রাজা ত্বং মানুষে লোকে ন তাবত্পুরুষর্ষভ ।
অকৃত্বা পৃথিবীং বশ্যাং দেবরাজ্যমিহেচ্ছসি ।। ৭.৬৭.১০ ॥
67.11
যদি বীর সমগ্রা তে মেদিনী নিখিলা বশে ।
দেবরাজ্যং কুরুষ্বেহ সভৃত্যবলবাহনঃ ।। ৭.৬৭.১১ ॥
67.12
ইন্দ্রমেবং ব্রুবাণং তং মান্ধাতা বাক্যমব্রবীৎ ।
ক্ব মে শক্র প্রতিহতং শাসনং পৃথিবীতলে ।। ৭.৬৭.১২ ॥
67.13
তমুবাচ সহস্রাক্ষো লবণো নাম রাক্ষসঃ ।
মধুপুত্রো মধুবনে ন তে ঽ ঽজ্ঞাং কুরুতে ঽনঘ ।। ৭.৬৭.১৩ ॥
67.14
তচ্ছ্রুত্বা বিপ্রিয়ং ঘোরং সহস্রাক্ষেণ ভাষিতম্ ।
ব্রীডিতো ঽবাঙ্মুখো রাজা ব্যাহর্তুং ন শশাক হ ।। ৭.৬৭.১৪ ॥
67.15
আমন্ত্র্য তু সহস্রাক্ষং হ্রিয়া কিঞ্চিদবাঙ্মুখঃ ।
পুনরেবাগমচ্ছ্রীমানিমং লোকং নরেশ্বরঃ ।। ৭.৬৭.১৫ ॥
67.16
স কৃত্বা হৃদয়ে ঽমর্ষং সভৃত্যবলবাহনঃ ।
আজগাম মধোঃ পুত্রং বশে কর্তুমরিন্দমঃ ।। ৭.৬৭.১৬ ॥
67.17
স কাঙ্ক্ষমাণো লবণং যুদ্ধায় পুরুষর্ষভঃ ।
দূতং সম্প্রেষয়ামাস সকাশং লবণস্য হি ।। ৭.৬৭.১৭ ॥
67.18
স গত্বা বিপ্রিয়াণ্যাহ বহূনি মধুনঃ সুতম্ ।
বদন্তমেবং তং দূতং ভক্ষয়ামাস রাক্ষসঃ ।। ৭.৬৭.১৮ ॥
67.19
চিরায়মাণে দূতে তু রাজা ক্রোধসমন্বিতঃ ।
অর্দয়ামাস তদ্রক্ষঃ শরবৃষ্ট্যা সমন্ততঃ ।। ৭.৬৭.১৯ ॥
67.20
ততঃ প্রহস্য তদ্রক্ষঃ শূলং জগ্রাহ পাণিনা ।
বধায় সানুবন্ধস্য মুমোচায়ুধমুত্তমম্ ।। ৭.৬৭.২০ ॥
67.21
তচ্ছূলং দীপ্যমানং তু সভৃত্যবলবাহনম্ ।
ভস্মীকৃত্বা নৃপং ভূয়ো লবণস্যাগমত্করম্ ।। ৭.৬৭.২১ ॥
67.22
এবং স রাজা সুমহান্হতঃ সবলবাহনঃ ।
শূলস্য তু বলং সৌম্য অপ্রমেয়মনুত্তমম্ ।। ৭.৬৭.২২ ॥
67.23
শ্বঃ প্রভাতে তু লবণং বধিষ্যসি ন সংশয়ঃ ।
অগৃহীতায়ুধং ক্ষিপ্রং ধ্রুবো হি বিজয়স্তব ।। ৭.৬৭.২৩ ॥
67.24
লোকানাং স্বস্তি চৈব স্যাত্কৃতে কর্মণি চ ত্বয়া ।
এতত্তে সর্বমাখ্যাতং লবণস্য দুরাত্মনঃ ।। ৭.৬৭.২৪ ॥
67.25
শূলস্য চ বলং ঘোরমপ্রমেয়ং নরর্ষভ ।
বিনাশশ্চৈব মান্ধাতুর্যত্তেনাভূচ্চ পার্থিব ।। ৭.৬৭.২৫ ॥
67.26
ত্বং শ্বঃ প্রভাতে লবণং মহাত্মন্বধিষ্যসে নাত্র তু সংশয়ো মে ।
শূলং বিনা নির্গতমামিষার্থে ধ্রুবো জয়স্তে ভবিতা নরেন্দ্র ।। ৭.৬৭.২৬ ।।