সর্গ 66

66.1

যামেব রাত্রিং শত্রুঘ্নঃ পর্ণশালামুপাবিশৎ ।
তামেব রাত্রিং সীতাপি প্রসূতা দারকদ্বয়ম্ ।। ৭.৬৬.১ ॥

ততো ঽর্ধরাত্রসময়ে বালকা মুনিদারকাঃ ।
বাল্মীকেঃ প্রিয়মাচখ্যুঃ সীতায়াঃ প্রসবং শুভম্ ।। ৭.৬৬.২ ॥

ভগবন্রামপত্নী সা প্রসূতা দারকদ্বয়ম্ ।
ততো রক্ষাং মহাতেজঃ কুরু ভূতবিনাশিনীম্ ।। ৭.৬৬.৩ ॥

তেষাং তদ্বচনং শ্রুত্বা মহর্ষিঃ সমুপাগমৎ ।
বালচন্দ্রপ্রতীকাশৌ দেবপুত্রৌ মহৌজসৌ ।। ৭.৬৬.৪ ॥

জগাম তত্র হৃষ্টাত্মা দদর্শ চ কুমারকৌ ।
ভূতঘ্নীং চাকরোত্তাভ্যাং রক্ষাং রক্ষোবিনাশিনীম্ ।। ৭.৬৬.৫ ॥

কুশমুষ্টিমুপাদায় লবং চৈব তু স দ্বিজঃ ।
বাল্মীকিঃ প্রদদৌ তাভ্যাং রক্ষাং ভূতবিনাশিনীম্ ।। ৭.৬৬.৬ ॥

যস্তয়োঃ পূর্বজো জাতঃ স কুশৈর্মন্ত্রসত্কৃতৈঃ ।
নির্মার্জনীয়স্তু তদা কুশ ইত্যস্য নাম তৎ ।। ৭.৬৬.৭ ॥

যশ্চাবরো ভবেত্তাভ্যাং লবেন স সমাহিতঃ ।
নির্মার্জনীয়ো বৃদ্ধাভির্লব ইত্যেব নামতঃ ।। ৭.৬৬.৮ ॥

এবং কুশলবৌ নাম্না তাবুভৌ যমজাতকৌ ।
মত্কৃতাভ্যাং চ নামভ্যাং খ্যাতিয়ুক্তৌ ভবিষ্যতঃ ।। ৭.৬৬.৯ ॥

তাং রক্ষাং জগৃহুস্তাশ্চ মুনিহস্তাত্সমাহিতাঃ ।
অকুর্বংশ্চ ততো রক্ষাং তয়োর্বিগতকল্মষাঃ ।। ৭.৬৬.১০ ॥

তথা তাং ক্রিয়মাণাং চ বৃদ্ধাভির্জন্ম নাম চ ।
সঙ্কীর্তনং চ রামস্য সীতায়াঃ প্রসবৌ শুভৌ ।। ৭.৬৬.১১ ॥

অর্ধরাত্রে তু শত্রুঘ্নঃ শুশ্রাব সুমহত্প্রিয়ম্ ।
পর্ণশালাং ততো গত্বা মাতর্দিষ্ট্যেতি চাব্রবীৎ ।। ৭.৬৬.১২ ॥

তথা তস্য প্রহৃষ্টস্য শত্রুঘ্নস্য মহাত্মনঃ ।
ব্যতীতা বার্ষিকী রাত্রিঃ শ্রাবণী লঘুবিক্রমঃ ।। ৭.৬৬.১৩ ॥

প্রভাতে সুমহাবীর্যঃ কৃত্বা পৌর্বাহ্ণিকীং ক্রিয়াম্ ।
মুনিং প্রাঞ্জলিরামন্ত্র্য যয়ৌ পশ্চান্মুখঃ পুনঃ ।। ৭.৬৬.১৪ ॥

স গত্বা যমুনাতীরং সপ্তরাত্রোষিতঃ পথি ।
ঋষীণাং পুণ্যকীর্তীনামাশ্রমে বাসমভ্যয়াৎ ।। ৭.৬৬.১৫ ॥

স তত্র মুনিভিঃ সার্ধং ভার্গবপ্রমুখৈর্নৃপঃ ।
কথাভিরভিরূপাভির্বাসং চক্রে মহায়শাঃ ।। ৭.৬৬.১৬ ॥

স কাঞ্চনাদ্যৈর্মুনিভিঃ সমেতো রঘুপ্রবীরো রজনীং তদানীম্ ।
কথাপ্রকারৈর্বহুভির্মহাত্মা বিরাময়ামাস নরেন্দ্রসূনুঃ ।। ৭.৬৬.১৭ ।।