Utshovসর্গ 65
65.1
প্রস্থাপ্য চ বলং সর্বং মাসমাত্রোষিতঃ পথি ।
এক এবাশু শত্রুঘ্নো জগাম ত্বরিতং তদা ।। ৭.৬৫.১ ॥
65.2
দ্বিরাত্রমন্তরে শূর উষ্য রাঘবনন্দনঃ ।
বাল্মীকেরাশ্রমং পুণ্যমগচ্ছদ্বাসমুত্তমম্ ।। ৭.৬৫.২ ॥
65.3
সো ঽভিবাদ্য মহাত্মানং বাল্মীকিং মুনিসত্তমম্ ।
কৃতাঞ্জলিরথো ভূত্বা বাক্যমেতদুবাচ হ ।। ৭.৬৫.৩ ॥
65.4
ভগবন্বস্তুমিচ্ছামি গুরোঃ কৃত্যাদিহাগতঃ ।
শ্বঃ প্রভাতে গমিষ্যামি প্রতীচীং বারুণীং দিশম্ ।। ৭.৬৫.৪ ॥
65.5
শত্রুঘ্নস্য বচঃ শ্রুত্বা প্রহস্য মুনিপুঙ্গবঃ ।
প্রত্যুবাচ মহাত্মানং স্বাগতং তে মহায়শঃ ।। ৭.৬৫.৫ ॥
65.6
স্বমাশ্রমমিদং সৌম্য রাঘবাণাং কুলস্য হি ।
আসনং পাদ্যমর্ধ্যং চ নির্বিশঙ্কঃ প্রতীচ্ছ মে ।। ৭.৬৫.৬ ॥
65.7
প্রতিগৃহ্য তদা পূজাং ফলমূলং চ ভোজনম্ ।
ভক্ষয়ামাস কাকুত্স্থস্তৃপ্তিং চ পরমাং গতঃ ।। ৭.৬৫.৭ ॥
65.8
স ভুক্ত্বা ফলমূলং চ মহর্ষিং তমুবাচ হ ।
ইয়ং যজ্ঞবিভূতিস্তে কস্যাশ্রমসমীপতঃ ।। ৭.৬৫.৮ ॥
65.9
তত্তস্য ভাষিতং শ্রুত্বা বাল্মীকির্বাক্যমব্রবীৎ ।
শত্রুঘ্ন শৃণু যস্যেদং বভূবায়তনং পুরা ।। ৭.৬৫.৯ ॥
65.10
যুষ্মাকং পূর্বকো রাজা সৌদাসস্তস্য ভূপতেঃ ।
পুত্রো বীরসহো নাম বীর্যবানতিধার্মিকঃ ।। ৭.৬৫.১০ ॥
65.11
স বাল এব সৌদাসো মৃগয়ামুপচক্রমে ।
চঞ্চূর্যমাণং দদৃশে স শূরো রাক্ষসদ্বয়ম্ ।। ৭.৬৫.১১ ॥
65.12
শার্দূলরূপিণৌ ঘোরৌ মৃগান্বহুসহস্রশঃ ।
ভক্ষমাণাবসন্তুষ্টৌ পর্যাপ্তিং নৈব জগ্মতুঃ ।। ৭.৬৫.১২ ॥
65.13
স তু তৌ রাক্ষসৌ দৃষ্ট্বা নির্মৃগং চ বনং কৃতম্ ।
ক্রোধেন মহতা ঽ ঽবিষ্টো জঘানৈকং মহেষুণা ।। ৭.৬৫.১৩ ॥
65.14
বিনিপাত্য তমেকং তু সৌদাসঃ পুরুষর্ষভঃ ।
বিজ্বরো বিগতামার্ষো হতং রক্ষো হ্যুদৈক্ষত ।। ৭.৬৫.১৪ ॥
65.15
নিরীক্ষমাণং তং দৃষ্ট্বা সহায়ং তস্য রক্ষসঃ ।
সন্তাপমকরোদ্ঘোরং সৌদাসং চেদমব্রবীৎ ।। ৭.৬৫.১৫ ॥
65.16
যস্মাদনপরাধং ত্বং সহায়ং মম জঘ্নিবান্ ।
তস্মাত্তবাপি পাপিষ্ঠ প্রদাস্যামি প্রতিক্রিয়াম্ ।। ৭.৬৫.১৬ ॥
65.17
এবমুক্ত্বা তু তদ্রাক্ষস্তত্রৈবান্তরধীয়ত ।
কালপর্যায়য়োগেন রাজা মিত্রসহো ঽভবৎ ।। ৭.৬৫.১৭ ॥
65.18
রাজাপি যজতে যজ্ঞমস্যাশ্রমসমীপতঃ ।
অশ্বমেধং মহায়জ্ঞং তং বসিষ্ঠো ঽভ্যপালয়ৎ ।। ৭.৬৫.১৮ ॥
65.19
তত্র যজ্ঞো মহানাসীদ্বহুবর্ষগণায়ুতঃ ।
সমৃদ্ধঃ পরয়া লক্ষ্ম্যা দেবয়জ্ঞসমো ঽভবৎ ।। ৭.৬৫.১৯ ॥
65.20
অথাবসানে যজ্ঞস্য পূর্ববৈরমনুস্মরন্ ।
বসিষ্ঠরূপী রাজানমিতি হোবাচ রাক্ষসঃ ।। ৭.৬৫.২০ ॥
65.21
অস্য যজ্ঞস্য জাতো ঽন্তঃ সামিষং ভোজনং মম ।
দীয়তামিহ শীঘ্রং বৈ নাত্র কার্যা বিচারণা ।। ৭.৬৫.২১ ॥
65.22
তচ্ছ্রুত্বা ব্যাহৃতং বাক্যং রক্ষসা ব্রহ্মরূপিণা ।
ভক্ষ্যসংস্কারকুশলমুবাচ পৃথিবীপতিঃ ।। ৭.৬৫.২২ ॥
65.23
হবিষ্যং সামিষং স্বাদু যথা ভবতি ভোজনম্ ।
তথা কুরুষ্ব শীঘ্রং বৈ পরিতুষ্যেদ্যথা গুরুঃ ।। ৭.৬৫.২৩ ॥
65.24
শাসনাত্পার্থিবেন্দ্রস্য সূদঃ সম্ভ্রান্তমানসঃ ।
স রাক্ষসঃ পুনস্তত্র সূদবেষমথাকরোৎ ।। ৭.৬৫.২৪ ॥
65.25
স মানুষমথো মাংসং পার্থিবায় ন্যবেদয়ৎ ।
ইদং স্বাদু হবিষ্যং চ সামিষং চান্নমাহৃতম্ ।। ৭.৬৫.২৫ ॥
65.26
স ভোজনং বসিষ্ঠায় পত্ন্যা সার্ধমুপাহরৎ ।
মদয়ন্ত্যা নরব্যাঘ্র সামিষং রক্ষসা হৃতম্ ।। ৭.৬৫.২৬ ॥
65.27
জ্ঞাত্বা তদামিষং বিপ্রো মানুষং ভাজনং গতম্ ।
ক্রোধেন মহতা ঽ ঽবিষ্টো ব্যাহর্তুমুপচক্রমে ।। ৭.৬৫.২৭ ॥
65.28
যস্মাত্ত্বং ভোজনং রাজন্মমৈতদ্দাতুমিচ্ছসি ।
তস্মাদ্ভোজনমেতত্তে ভবিষ্যতি ন সংশয়ঃ ।। ৭.৬৫.২৮ ॥
65.29
ততঃ ক্রুদ্ধস্তু সৌদাসস্তোয়ং জগ্রাহ পাণিনা ।
বসিষ্ঠং শপ্তুমারেভে ভার্যা চৈনমবারয়ৎ ।। ৭.৬৫.২৯ ॥
65.30
রাজন্প্রভুর্যতো ঽস্মাকং বসিষ্ঠো ভগবানৃষিঃ ।
প্রতিশপ্তুং ন শক্তস্ত্বং দেবতুল্যং পুরোধসম্ ।। ৭.৬৫.৩০ ॥
65.31
ততঃ ক্রোধময়ং তোয়ং তেজোবলসমন্বিতম্ ।
ব্যসর্জয়ত ধর্মাত্মা ততঃ পাদৌ সিষেচ চ ।। ৭.৬৫.৩১ ॥
65.32
তেনাস্য রাজ্ঞস্তৌ পাদৌ তদা কল্মাষতাং গতৌ ।
তদাপ্রভৃতি রাজা ঽসৌ সৌদাসঃ সুমহায়শাঃ ।কল্মাষপাদঃ সংবৃত্তঃ খ্যাতশ্চৈব তথা নৃপঃ ।। ৭.৬৫.৩২ ॥
65.33
স রাজা সহ পত্ন্যা বৈ প্রণিপত্য মুহুর্মুহুঃ ।
পুনর্বসিষ্ঠং প্রোবাচ যদুক্তং ব্রহ্মরূপিণা ।। ৭.৬৫.৩৩ ॥
65.34
তচ্ছ্রুত্বা পার্থিবেন্দ্রস্য রক্ষসা বিকৃতং চ তৎ ।
পুনঃ প্রোবাচ রাজানং বসিষ্ঠঃ পুরুষর্ষভম্ ।। ৭.৬৫.৩৪ ॥
65.35
ময়া রোষপরীতেন যদিদং ব্যাহৃতং বচঃ ।
নৈতচ্ছক্যং বৃথা কর্তুং প্রদাস্যামি চ তে বরম্ ।। ৭.৬৫.৩৫ ॥
65.36
কালো দ্বাদশ বর্ষাণি শাপস্যান্তো ভবিষ্যতি ।
মত্প্রাসাদাচ্চ রাজেন্দ্র ব্যতীতং ন স্মরিষ্যসি ।। ৭.৬৫.৩৬ ॥
65.37
এবং স রাজা তং শাপমুপভুজ্যারিসূদনঃ ।
প্রতিলেভে পুনা রাজ্যং প্রজাশ্চৈবান্বপালয়ৎ ।। ৭.৬৫.৩৭ ॥
65.38
তস্য কল্মাষপাদস্য যজ্ঞস্যায়তনং শুভম্ ।
আশ্রমস্য সমীপে ঽস্য যন্মাং পৃচ্ছসি রাঘব ।। ৭.৬৫.৩৮ ॥
65.39
তস্য তাং পার্থিবেন্দ্রস্য কথাং শ্রুত্বা সুদারুণাম্ ।
বিবেশ পর্ণশালায়াং মহর্ষিমভিবাদ্য চ ।। ৭.৬৫.৩৯ ।।