সর্গ 64

64.1

এবমুক্ত্বা চ কাকুত্স্থং প্রশস্য চ পুনঃ পুনঃ ।
পুনরেবাপরং বাক্যমুবাচ রঘুনন্দনঃ ।। ৭.৬৪.১ ॥

ইমান্যশ্বসহস্রাণি চত্বারি পুরুষর্ষভ ।
রথানাং দ্বে সহস্রে চ গজানাং শতমুত্তমম্ ।। ৭.৬৪.২ ॥

অন্তরা পণবীথ্যশ্চ নানাপণ্যোপশোভিতাঃ ।
অনুগচ্ছন্তু কাকুত্স্থং তথৈব নটনর্তকাঃ ।। ৭.৬৪.৩ ॥

হিরণ্যস্য সুবর্ণস্য নিয়ুতং পুরুষর্ষভ ।
আদায় গচ্ছ শত্রুঘ্ন পর্যাপ্তধনবাহনঃ ।। ৭.৬৪.৪ ॥

বলং চ সুভৃতং বীর হৃষ্টপুষ্টমনুদ্ধতম্ ।
সম্ভাষাসম্প্রদানেন রঞ্জয়স্ব নগেত্তম ।। ৭.৬৪.৫ ॥

ন হ্যর্থাস্তত্র তিষ্ঠন্তি ন দারা ন চ বান্ধবাঃ ।
সুপ্রীতো ভৃত্যবর্গশ্চ যত্র তিষ্ঠসি রাঘব ।। ৭.৬৪.৬ ॥

ততো হৃষ্টজনাকীর্ণাং প্রস্থাপ্য মহতীং চমূম্ ।
এক এব ধনুষ্পাণির্গচ্ছ ত্বং মধুনো বনম্ ।। ৭.৬৪.৭ ॥

যথা ত্বাং ন প্রজানাতি গচ্ছন্তং যুদ্ধকাঙ্ক্ষিণম্ ।
লবণস্তু মধোঃ পুত্রস্তথা গচ্ছেরশঙ্কিতম্ ।। ৭.৬৪.৮ ॥

ন তস্য মূত্যুরন্যো ঽস্তি কশ্চিদ্ধি পুরুষর্ষভ ।
দর্শনং যো ঽভিগচ্ছেত স বধ্যো লবণেন হি ।। ৭.৬৪.৯ ॥

স হি গ্রীষ্মো ঽপয়াতে তু বর্ষারাত্র উপাগতে ।
হন্যাস্ত্বং লবণং সৌম্য সহি কালো ঽস্য দুর্মতেঃ ।। ৭.৬৪.১০ ॥

মহর্ষীংস্তু পুরত্কৃত্য প্রয়ান্তু তব সৌনিকাঃ ।
যথা গ্রীষ্মাবশেষেণ তরেয়ুর্জাহ্নবীজলম্ ।। ৭.৬৪.১১ ॥

তত্র স্থাপ্য বলং সর্বং নদীতীরে সমাহিতঃ ।
অগ্রতো ধনুষা সার্ধং গচ্ছ ত্বং লঘুবিক্রমঃ ।। ৭.৬৪.১২ ॥

এবমুক্তস্তু রামেণ শত্রুঘ্নস্তান্মহাবলান্ ।
সেনামুখ্যান্সমানীয় ততো বাক্যমুবাচ হ ।। ৭.৬৪.১৩ ॥

এতে বো গণিতা বাসা যত্র তত্র নিবত্স্যথ ।
স্থাতব্যং চাবিরোধেন যথা বাধা ন কস্যচিৎ ।। ৭.৬৪.১৪ ॥

তথা তাংস্তু সমাজ্ঞাপ্য প্রস্থাপ্য চ মহদ্বলম্ ।
কৌসল্যাং চ সুমিত্রাং চ কৈকেয়ীং চাভ্যবাদয়ৎ ।। ৭.৬৪.১৫ ॥

রামং প্রদক্ষিণীকৃত্য শিরসা ঽভিপ্রণম্য চ ।
রামেণ চাভ্যনুজ্ঞাতঃ শত্রুঘ্নঃ শত্রুতাপনঃ ।। ৭.৬৪.১৬ ॥

লক্ষ্মণং ভরতং চৈব প্রণিপত্য কৃতাঞ্জলিঃ ।
পুরোহিতং বসিষ্ঠং চ শত্রুঘ্নঃ প্রয়তাত্মবান্ ।প্রদক্ষিণমথো কৃত্বা নির্জগাম মহাবলঃ ।। ৭.৬৪.১৭ ॥

প্রস্থাপ্য সেনামথ সো ঽগ্রতস্তদা গজেন্দ্রবাজিপ্রবরৌঘসঙ্কুলাম্ ।
উপাস মাসং তু নরেন্দ্রপার্শ্বতস্ত্বথ প্রয়াতো রঘুবংশবর্ধনঃ ।। ৭.৬৪.১৮ ।।