UtshovSarga 64
64.1
एवमुक्त्वा च काकुत्स्थं प्रशस्य च पुनः पुनः ।
पुनरेवापरं वाक्यमुवाच रघुनन्दनः ।। ७.६४.१ ॥
Evamuktva cha kakutstham prashasya cha punah punah
Punarevaparam vakyamuvacha raghunandanah
64.2
इमान्यश्वसहस्राणि चत्वारि पुरुषर्षभ ।
रथानां द्वे सहस्रे च गजानां शतमुत्तमम् ।। ७.६४.२ ॥
Imanyashvasahasrani chatvari purusharshabha
Rathanam dve sahasre cha gajanam shatamuttamam
64.3
अन्तरा पणवीथ्यश्च नानापण्योपशोभिताः ।
अनुगच्छन्तु काकुत्स्थं तथैव नटनर्तकाः ।। ७.६४.३ ॥
Antara panavithyashcha nanapanyopashobhitah
Anugachchhantu kakutstham tathaiva natanartakah
64.4
हिरण्यस्य सुवर्णस्य नियुतं पुरुषर्षभ ।
आदाय गच्छ शत्रुघ्न पर्याप्तधनवाहनः ।। ७.६४.४ ॥
Hiranyasya suvarnasya niyutam purusharshabha
Adaya gachchha shatrughna paryaptadhanavahanah
64.5
बलं च सुभृतं वीर हृष्टपुष्टमनुद्धतम् ।
सम्भाषासम्प्रदानेन रञ्जयस्व नगेत्तम ।। ७.६४.५ ॥
Balam cha subhritam vira hrishtapushtamanuddhatam
Sambhashasampradanena ranjayasva nagettama
64.6
न ह्यर्थास्तत्र तिष्ठन्ति न दारा न च बान्धवाः ।
सुप्रीतो भृत्यवर्गश्च यत्र तिष्ठसि राघव ।। ७.६४.६ ॥
Na hyarthastatra tishthanti na dara na cha bandhavah
Suprito bhrityavargashcha yatra tishthasi raghava
64.7
ततो हृष्टजनाकीर्णां प्रस्थाप्य महतीं चमूम् ।
एक एव धनुष्पाणिर्गच्छ त्वं मधुनो वनम् ।। ७.६४.७ ॥
Tato hrishtajanakirnam prasthapya mahatim chamum
Eka eva dhanushpanirgachchha tvam madhuno vanam
64.8
यथा त्वां न प्रजानाति गच्छन्तं युद्धकाङ्क्षिणम् ।
लवणस्तु मधोः पुत्रस्तथा गच्छेरशङ्कितम् ।। ७.६४.८ ॥
Yatha tvam na prajanati gachchhantam yuddhakankshinam
Lavanastu madhoh putrastatha gachchherashankitam
64.9
न तस्य मूत्युरन्यो ऽस्ति कश्चिद्धि पुरुषर्षभ ।
दर्शनं यो ऽभिगच्छेत स वध्यो लवणेन हि ।। ७.६४.९ ॥
Na tasya mutyuranyo sti kashchiddhi purusharshabha
Darshanam yo bhigachchheta sa vadhyo lavanena hi
64.10
स हि ग्रीष्मो ऽपयाते तु वर्षारात्र उपागते ।
हन्यास्त्वं लवणं सौम्य सहि कालो ऽस्य दुर्मतेः ।। ७.६४.१० ॥
Sa hi grishmo payate tu varsharatra upagate
Hanyastvam lavanam saumya sahi kalo sya durmateh
64.11
महर्षींस्तु पुरत्कृत्य प्रयान्तु तव सौनिकाः ।
यथा ग्रीष्मावशेषेण तरेयुर्जाह्नवीजलम् ।। ७.६४.११ ॥
Maharshinstu puratkritya prayantu tava saunikah
Yatha grishmavasheshena tareyurjahnavijalam
64.12
तत्र स्थाप्य बलं सर्वं नदीतीरे समाहितः ।
अग्रतो धनुषा सार्धं गच्छ त्वं लघुविक्रमः ।। ७.६४.१२ ॥
Tatra sthapya balam sarvam naditire samahitah
Agrato dhanusha sardham gachchha tvam laghuvikramah
64.13
एवमुक्तस्तु रामेण शत्रुघ्नस्तान्महाबलान् ।
सेनामुख्यान्समानीय ततो वाक्यमुवाच ह ।। ७.६४.१३ ॥
Evamuktastu ramena shatrughnastanmahabalan
Senamukhyansamaniya tato vakyamuvacha ha
64.14
एते वो गणिता वासा यत्र तत्र निवत्स्यथ ।
स्थातव्यं चाविरोधेन यथा बाधा न कस्यचित् ।। ७.६४.१४ ॥
Ete vo ganita vasa yatra tatra nivatsyatha
Sthatavyam chavirodhena yatha badha na kasyachit
64.15
तथा तांस्तु समाज्ञाप्य प्रस्थाप्य च महद्बलम् ।
कौसल्यां च सुमित्रां च कैकेयीं चाभ्यवादयत् ।। ७.६४.१५ ॥
Tatha tanstu samagyapya prasthapya cha mahadbalam
Kausalyam cha sumitram cha kaikeyim chabhyavadayat
64.16
रामं प्रदक्षिणीकृत्य शिरसा ऽभिप्रणम्य च ।
रामेण चाभ्यनुज्ञातः शत्रुघ्नः शत्रुतापनः ।। ७.६४.१६ ॥
Ramam pradakshinikritya shirasa bhipranamya cha
Ramena chabhyanugyatah shatrughnah shatrutapanah
64.17
लक्ष्मणं भरतं चैव प्रणिपत्य कृताञ्जलिः ।
पुरोहितं वसिष्ठं च शत्रुघ्नः प्रयतात्मवान् ।प्रदक्षिणमथो कृत्वा निर्जगाम महाबलः ।। ७.६४.१७ ॥
Lakshmanam bharatam chaiva pranipatya kritanjalih
Purohitam vasishtham cha shatrughnah prayatatmavan, pradakshinamatho kritva nirjagama mahabalah
64.18
प्रस्थाप्य सेनामथ सो ऽग्रतस्तदा गजेन्द्रवाजिप्रवरौघसङ्कुलाम् ।
उपास मासं तु नरेन्द्रपार्श्वतस्त्वथ प्रयातो रघुवंशवर्धनः ।। ७.६४.१८ ।।
Prasthapya senamatha so gratastada gajendravajipravaraughasankulam
Upasa masam tu narendraparshvatastvatha prayato raghuvanshavardhanah