Utshovসর্গ 63
63.1
এবমুক্তস্তু রামেণ পরাং ব্রীডামুপাগমৎ ।
শত্রুঘ্নো বীর্যসম্পন্নো মন্দং মন্দমুবাচ হ ।। ৭.৬৩.১ ॥
63.2
অধর্মং বিদ্ম কাকুত্স্থ হ্যস্মিন্নর্থে নরেশ্বর ।
কথং তিষ্ঠত্সু জ্যেষ্ঠেষু কনীয়ানভিষিচ্যতে ।। ৭.৬৩.২ ॥
63.3
অবশ্যং করণীয়ং চ শাসনং পুরুষর্ষভ ।
তব চৈব মহাভাগ শাসনং দুরতিক্রমম্ ।। ৭.৬৩.৩ ॥
63.4
ত্বত্তো ময়া শ্রুতং বীর শ্রুতিভ্যশ্চ ময়া শ্রুতম্ ।
নোত্তরং হি ময়া বাচ্যং মধ্যমে প্রতিজানতি ।। ৭.৬৩.৪ ॥
63.5
ব্যাহৃতং দুর্বচো ঘোরং হন্তাস্মি লবণং মৃধে ।
তস্যৈবং মে দুরুক্তস্য দুর্গতিঃ পুরুষর্ষভ ।। ৭.৬৩.৫ ॥
63.6
উত্তরং নহি বক্তব্যং জ্যেষ্ঠেনাভিহিতে পুনঃ ।
অধর্মসহিতং চৈব পরলোকবিবর্জিতম্ ।। ৭.৬৩.৬ ॥
63.7
সো ঽহং দ্বিতীয়ং কাকুত্স্থ ন বক্ষ্যামি তবোত্তরম্ ।
মা দ্বিতীয়েন দণ্ডো বৈ নিপতেন্ময়ি মানদ ।। ৭.৬৩.৭ ॥
63.8
কামকারো হ্যহং রাজংস্তবাস্মি পুরুষর্ষভ ।
অধর্মং জহি কাকুত্স্থ মত্কৃতে রঘুনন্দন ।। ৭.৬৩.৮ ॥
63.9
এবমুক্তে তু শূরেণ শত্রুঘ্নেন মহাত্মনা ।
উবাচ রামঃ সংহৃষ্টো ভরতং লক্ষ্মণং তথা ।। ৭.৬৩.৯ ॥
63.10
সম্ভারানভিষেকস্য আনয়ধ্বং সমাহিতাঃ ।
অদ্যৈব পুরুষব্যাঘ্রমভিষেক্ষ্যামি রাঘবম্ ।। ৭.৬৩.১০ ॥
63.11
পুরোহিতং চ কাকুত্স্থং নৈগমানৃত্বিজস্তথা ।
মন্ত্রিণশ্চৈব তান্সর্বানানয়ধ্বং মমাজ্ঞয়া ।। ৭.৬৩.১১ ॥
63.12
রাজ্ঞঃ শাসনমাজ্ঞায় তথা ঽকুর্বন্মহারথাঃ ।
অভিষেকসমারম্ভং পুরস্কৃত্য পুরোধসম্ ।প্রবিষ্টা রাজভবনং রাজানো ব্রাহ্মণাস্তথা ।। ৭.৬৩.১২ ॥
63.13
তথো ঽভিষেকো ববৃধে শত্রুঘ্নস্য মহাত্মনঃ ।
সম্প্রহর্ষকরঃ শ্রীমান্রাঘবস্য পুরস্য চ ।। ৭.৬৩.১৩ ॥
63.14
অভিষিক্তস্তু শত্রুঘ্নো বভৌ চাদিত্যসন্নিভঃ ।
অভিষিক্তঃ পুরা স্কন্দঃ সেন্দ্রৈরিব মরুদ্গণৈঃ ।। ৭.৬৩.১৪ ॥
63.15
অভিষিক্তে তু শত্রুঘ্নে রামেণাক্লিষ্টকর্মণা ।
পৌরাঃ প্রমুদিতাশ্চাসন্ব্রাহ্মণাশ্চ বহুশ্রুতাঃ ।। ৭.৬৩.১৫ ॥
63.16
কৌসল্যা চ সুমিত্রা চ মঙ্গলং কেকয়ী তথা ।
চক্রুস্তা রাজভবনে যাশ্চান্যা রাজয়োষিতঃ ।। ৭.৬৩.১৬ ॥
63.17
ঋষয়শ্চ মহাত্মানো যমুনাতীরবাসিনঃ ।
হতং লবণমাশংসুঃ শত্রুঘ্নস্যাভিষেচনাৎ ।। ৭.৬৩.১৭ ॥
63.18
ততো ঽভিষিক্তং শত্রুঘ্নমঙ্কমারোপ্য রাঘবঃ ।
উবাচ মধুরাং বাণীং তেজস্তস্যাভিপূরয়ন্ ।। ৭.৬৩.১৮ ॥
63.19
অয়ং শরস্ত্বমোঘস্তে দিব্যঃ পরপুরঞ্জয়ঃ ।
অনেন লবণং সৌম্য হন্তা ঽসি রঘুনন্দন ।। ৭.৬৩.১৯ ॥
63.20
সৃষ্টঃ শরো ঽয়ং কাকুত্স্থ যদা শেতে মহার্ণবে ।
। ৭.৬৩.২০ ॥
63.21
স্বয়ম্ভূরজিতো দেবো যন্নাপশ্যন্সুরাসুরাঃ ।
অদৃশ্যঃ সর্বভূতানাং তেনায়ং তু শরোত্তমঃ ।। ৭.৬৩.২১ ॥
63.22
সৃষ্টঃ ক্রোধাভিভূতেন বিনাশার্থং দুরাত্মনোঃ ।
মধুকৈটভয়োর্বীর বিঘাতে বর্তমানয়োঃ ।স্রষ্টুকামেন লোকাংস্ত্রীংস্তৌ চানেন হতৌ যুধি ।। ৭.৬৩.২২ ॥
63.23
তৌ হত্বা জনভোগার্থং কৈটভং তু মধুং তথা ।
অনেন শরমুখ্যেন ততো লোকাংশ্চকার সঃ ।। ৭.৬৩.২৩ ॥
63.24
নায়ং ময়া শরঃ পূর্বং রাবণস্য বধার্থিনা ।
মুক্তঃ শত্রুঘ্ন ভূতানাং মহাংস্ত্রাসো ভবেদিতি ।। ৭.৬৩.২৪ ॥
63.25
যচ্চ তস্য মহচ্ছূলং ত্র্যম্বকেণ মহাত্মনা ।
দত্তং শত্রুবিনাশায় মধোরায়ুধমুত্তমম্ ।। ৭.৬৩.২৫ ॥
63.26
স তং নিক্ষিপ্য ভবনে পূজ্যমান পুনঃ পুনঃ ।
দিশঃ সর্বাঃ সমাসাদ্য প্রাপ্নোত্যাহারমুত্তমম্ ।। ৭.৬৩.২৬ ॥
63.27
যদা তু যুদ্ধমাকাঙ্ক্ষন্ কশ্চিদেনং সমাহ্বয়েৎ ।
তদা শূলং গহীত্বা তং ভস্ম রক্ষঃ করোতি হি ।। ৭.৬৩.২৭ ॥
63.28
স ত্বং পুরুষশার্দূল তমায়ুধবিনাকৃতম্ ।
অপ্রবিষ্টং পুরং পূর্বং দ্বারি তিষ্ঠ ধৃতায়ুধঃ ।। ৭.৬৩.২৮ ॥
63.29
অপ্রবিষ্টং চ ভবনং যুদ্ধায় পুরুষর্ষভ ।
আহ্বয়েথা মহাবাহো ততো হন্তাসি রাক্ষসম্ ।। ৭.৬৩.২৯ ॥
63.30
অন্যথা ক্রিয়মাণে তু অবধ্যঃ স ভবিষ্যতি ।
যদি ত্বেবং কৃতে বীর বিনাশমুপয়াস্যতি ।। ৭.৬৩.৩০ ॥
63.31
এতত্তে সর্বমাখ্যাতং শূলস্য চ বিপর্যয়ঃ ।
শ্রীমতঃ শিতিকণ্ঠস্য কৃত্যং হি দুরতিক্রমম্ ।। ৭.৬৩.৩১ ।।