UtshovSarga 66
66.1
यामेव रात्रिं शत्रुघ्नः पर्णशालामुपाविशत् ।
तामेव रात्रिं सीतापि प्रसूता दारकद्वयम् ।। ७.६६.१ ॥
Yameva ratrim shatrughnah parnashalamupavishat
Tameva ratrim sitapi prasuta darakadvayam
66.2
ततो ऽर्धरात्रसमये बालका मुनिदारकाः ।
वाल्मीकेः प्रियमाचख्युः सीतायाः प्रसवं शुभम् ।। ७.६६.२ ॥
Tato rdharatrasamaye balaka munidarakah
Valmikeh priyamachakhyuh sitayah prasavam shubham
66.3
भगवन्रामपत्नी सा प्रसूता दारकद्वयम् ।
ततो रक्षां महातेजः कुरु भूतविनाशिनीम् ।। ७.६६.३ ॥
Bhagavanramapatni sa prasuta darakadvayam
Tato raksham mahatejah kuru bhutavinashinim
66.4
तेषां तद्वचनं श्रुत्वा महर्षिः समुपागमत् ।
बालचन्द्रप्रतीकाशौ देवपुत्रौ महौजसौ ।। ७.६६.४ ॥
Tesham tadvachanam shrutva maharshih samupagamat
Balachandrapratikashau devaputrau mahaujasau
66.5
जगाम तत्र हृष्टात्मा ददर्श च कुमारकौ ।
भूतघ्नीं चाकरोत्ताभ्यां रक्षां रक्षोविनाशिनीम् ।। ७.६६.५ ॥
Jagama tatra hrishtatma dadarsha cha kumarakau
Bhutaghnim chakarottabhyam raksham rakshovinashinim
66.6
कुशमुष्टिमुपादाय लवं चैव तु स द्विजः ।
वाल्मीकिः प्रददौ ताभ्यां रक्षां भूतविनाशिनीम् ।। ७.६६.६ ॥
Kushamushtimupadaya lavam chaiva tu sa dvijah
Valmikih pradadau tabhyam raksham bhutavinashinim
66.7
यस्तयोः पूर्वजो जातः स कुशैर्मन्त्रसत्कृतैः ।
निर्मार्जनीयस्तु तदा कुश इत्यस्य नाम तत् ।। ७.६६.७ ॥
Yastayoh purvajo jatah sa kushairmantrasatkritaih
Nirmarjaniyastu tada kusha ityasya nama tat
66.8
यश्चावरो भवेत्ताभ्यां लवेन स समाहितः ।
निर्मार्जनीयो वृद्धाभिर्लव इत्येव नामतः ।। ७.६६.८ ॥
Yashchavaro bhavettabhyam lavena sa samahitah
Nirmarjaniyo vriddhabhirlava ityeva namatah
66.9
एवं कुशलवौ नाम्ना तावुभौ यमजातकौ ।
मत्कृताभ्यां च नामभ्यां ख्यातियुक्तौ भविष्यतः ।। ७.६६.९ ॥
Evam kushalavau namna tavubhau yamajatakau
Matkritabhyam cha namabhyam khyatiyuktau bhavishyatah
66.10
तां रक्षां जगृहुस्ताश्च मुनिहस्तात्समाहिताः ।
अकुर्वंश्च ततो रक्षां तयोर्विगतकल्मषाः ।। ७.६६.१० ॥
Tam raksham jagrihustashcha munihastatsamahitah
Akurvanshcha tato raksham tayorvigatakalmashah
66.11
तथा तां क्रियमाणां च वृद्धाभिर्जन्म नाम च ।
सङ्कीर्तनं च रामस्य सीतायाः प्रसवौ शुभौ ।। ७.६६.११ ॥
Tatha tam kriyamanam cha vriddhabhirjanma nama cha
Sankirtanam cha ramasya sitayah prasavau shubhau
66.12
अर्धरात्रे तु शत्रुघ्नः शुश्राव सुमहत्प्रियम् ।
पर्णशालां ततो गत्वा मातर्दिष्ट्येति चाब्रवीत् ।। ७.६६.१२ ॥
Ardharatre tu shatrughnah shushrava sumahatpriyam
Parnashalam tato gatva matardishtyeti chabravit
66.13
तथा तस्य प्रहृष्टस्य शत्रुघ्नस्य महात्मनः ।
व्यतीता वार्षिकी रात्रिः श्रावणी लघुविक्रमः ।। ७.६६.१३ ॥
Tatha tasya prahrishtasya shatrughnasya mahatmanah
Vyatita varshiki ratrih shravani laghuvikramah
66.14
प्रभाते सुमहावीर्यः कृत्वा पौर्वाह्णिकीं क्रियाम् ।
मुनिं प्राञ्जलिरामन्त्र्य ययौ पश्चान्मुखः पुनः ।। ७.६६.१४ ॥
Prabhate sumahaviryah kritva paurvahnikim kriyam
Munim pranjaliramantrya yayau pashchanmukhah punah
66.15
स गत्वा यमुनातीरं सप्तरात्रोषितः पथि ।
ऋषीणां पुण्यकीर्तीनामाश्रमे वासमभ्ययात् ।। ७.६६.१५ ॥
Sa gatva yamunatiram saptaratroshitah pathi
Rishinam punyakirtinamashrame vasamabhyayat
66.16
स तत्र मुनिभिः सार्धं भार्गवप्रमुखैर्नृपः ।
कथाभिरभिरूपाभिर्वासं चक्रे महायशाः ।। ७.६६.१६ ॥
Sa tatra munibhih sardham bhargavapramukhairnripah
Kathabhirabhirupabhirvasam chakre mahayashah
66.17
स काञ्चनाद्यैर्मुनिभिः समेतो रघुप्रवीरो रजनीं तदानीम् ।
कथाप्रकारैर्बहुभिर्महात्मा विरामयामास नरेन्द्रसूनुः ।। ७.६६.१७ ।।
Sa kanchanadyairmunibhih sameto raghupraviro rajanim tadanim
Kathaprakarairbahubhirmahatma viramayamasa narendrasunuh