Utshovসর্গ 61
61.1
এবং ব্রুবদ্ভির্ঋষিভিঃ কাকুত্স্থো বাক্যমব্রবীৎ ।
কিং কার্যং ব্রূত মুনয়ো ভয়ং তাবদপৈতু বঃ ।। ৭.৬১.১ ॥
61.2
তথা ব্রুবতি কাকুত্স্থে ভার্গবো বাক্যমব্রবীৎ ।
ভয়ানাং শৃণু যন্মূলং দেশস্য চ নরেশ্বর ।। ৭.৬১.২ ॥
61.3
পূর্বং কৃতয়ুগে রাজন্দৈতেয়ঃ সুমহাবলঃ ।
লোলাপুত্রো ঽভবজ্জ্যেষ্ঠো মধুর্নাম মহাসুরঃ ।। ৭.৬১.৩ ॥
61.4
ব্রহ্মণ্যশ্চ শরণ্যশ্চ বুদ্ধ্যা চ পরিনিষ্ঠিতঃ ।
সুরৈশ্চ পরমোদারৈঃ প্রীতিস্তস্যাতুলা ঽভবৎ ।। ৭.৬১.৪ ॥
61.5
স মধুর্বীর্যসম্পন্নো ধর্মে চ সুসমাহিতঃ ।
বহুবর্ষসহস্রাণি রুদ্রপ্রীত্যা ঽকরোত্তপঃ ।। ৭.৬১.৫ ॥
61.6
রুদ্রঃ প্রীতো ঽভবত্তস্মৈ বরং দাতুং যয়ৌ চ সঃ ।
বহুমানাচ্চ রুদ্রেণ দত্তস্তস্যাদ্ভুতো বরঃ ।। ৭.৬১.৬ ॥
61.7
শূলং শূলাদ্বিনিষ্কৃষ্য মহাবীর্যং মহাপ্রভম্ ।
দদৌ মহাত্মা সুপ্রীতো বাক্যং চৈতদুবাচ হ ।। ৭.৬১.৭ ॥
61.8
ত্বয়ায়মতুলো ধর্মো মত্প্রসাদকরঃ কৃতঃ ।
প্রীত্যা পরময়া যুক্তো দদাম্যায়ুধমুত্তমম্ ।। ৭.৬১.৮ ॥
61.9
যাবত্সুরৈশ্চ বিপ্রৈশ্চ ন বিরুধ্যের্মহাসুর ।
তাবচ্ছূলং তবেদং স্যাদন্যথা নাশমেপ্যতি ।। ৭.৬১.৯ ॥
61.10
যশ্চ ত্বামভিয়ুঞ্জীত যুদ্ধায় বিগতজ্বরঃ ।
তং শূলো ভস্মসাত্কৃত্বা পুনরেষ্যতি তে করম্ ।। ৭.৬১.১০ ॥
61.11
এবং রুদ্রাদ্বরং লব্ধ্বা ভূয় এব মহাসুরঃ ।
প্রণিপত্য মহাদেবং বাক্যমেতদুবাচ হ ।। ৭.৬১.১১ ॥
61.12
ভগবন্মম বংশস্য শূলমেতদনুত্তমম্ ।
ভবেত্তু সততং দেব সুরাণামীশ্বরো হ্যসি ।। ৭.৬১.১২ ॥
61.13
তং ব্রুবাণং মধুং দেবঃ সর্বভূতপতিঃ শিবঃ ।
প্রত্যুবাচ মহাতেজা নৈতদেবং ভবিষ্যতি ।। ৭.৬১.১৩ ॥
61.14
মা ভূত্তে বিফলা বাণী মত্প্রসাদকৃতা শুভা ।
ভবতঃ পুত্রমেকং তু শূলমেতদ্ভজিষ্যতে ।। ৭.৬১.১৪ ॥
61.15
যাবত্করস্থঃ শূলো ঽয়ং ভবিষ্যতি সুতস্য তে ।
অবধ্যঃ সর্বভূতানাং শূলহস্তো ভবিষ্যতি ।। ৭.৬১.১৫ ॥
61.16
এবং মধুর্বরং লব্ধ্বা দেবাত্সুমহদদ্ভুতম্ ।
ভবনং সো ঽসুরশ্রেষ্ঠঃ কারয়ামাস সুপ্রভম্ ।। ৭.৬১.১৬ ॥
61.17
তস্য পত্নী মহাভাগা প্রিয়া কুম্ভীনসীতি যা ।
বিশ্বাবসোরপত্যং সা হ্যনলায়াং মহাপ্রভা ।। ৭.৬১.১৭ ॥
61.18
তস্যাঃ পুত্রো মহাবীর্যো লবণো নাম দারুণঃ ।
বাল্যাত্প্রভৃতি দুষ্টাত্মা পাপান্যেব সমাচরৎ ।। ৭.৬১.১৮ ॥
61.19
তং পুত্রং দুর্বিনীতং তু দৃষ্ট্বা ক্রোধসমন্বিতঃ ।
মধুঃ স শোকমাপেদে ন চৈনং কিঞ্চিদব্রবীৎ ।। ৭.৬১.১৯ ॥
61.20
স বিহায় ত্বিমং লোকং প্রবিষ্টো বরুণালয়ম্ ।
শূলং নিবেশ্য লবণে বরং তস্মৈ ন্যবেদয়ৎ ।। ৭.৬১.২০ ॥
61.21
স প্রভাবেণ শূলস্য দৌরাত্ম্যেনাত্মনস্তথা ।
সন্তাপয়তি লোকাংস্ত্রীন্বিশেষেণ চ তাপসান্ ।। ৭.৬১.২১ ॥
61.22
এবংপ্রভাবো লবণঃ শূলং চৈব তথাবিধম্ ।
শ্রুত্বা প্রমাণং কাকুত্স্থ ত্বং হি নঃ পরমা গতিঃ ।। ৭.৬১.২২ ॥
61.23
বহবঃ পার্থিবা রাম ভয়ার্তৈর্ঋষিভিঃ পুরা ।
অভয়ং যাচিতা বীর ত্রাতারং ন চ বিদ্মহে ।। ৭.৬১.২৩ ॥
61.24
তে বয়ং রাবণং শ্রুত্বা হতং সবলবাহনম্ ।
ত্রাতারং বিদ্মহে তাত নান্যং ভুবি নরাধিপম্ ।তত্পরিত্রাতুমিচ্ছামো লবণাদ্ভয়পীডিতান্ ।। ৭.৬১.২৪ ॥
61.25
ইতি রাম নিবেদিতং তু তে ভয়জং কারণমুত্থিতং চ যৎ ।
বিনিবারয়িতুং ভবান্ক্ষমঃ কুরু তং কামমহীনবিক্রম ।। ৭.৬১.২৫ ।।