সর্গ 60

60.1

তয়োঃ সংবদতোরেবং রামলক্ষ্মণয়োস্তদা ।
বাসন্তিকী নিশা প্রাপ্তা ন শীতা ন চ ঘর্মদা ।। ৭.৬০.১ ॥

ততঃ প্রভাতে বিমলে কৃতপৌর্বাহ্ণিকক্রিয়ঃ ।
অভিচক্রাম কাকুত্স্থো দর্শনং পৌরকার্যবিৎ ।। ৭.৬০.২ ॥

ততঃ সুমন্ত্রস্ত্বাগম্য রাঘবং বাক্যমব্রবীৎ ।
এতে প্রতিহতা রাজন্দ্বারি তিষ্ঠন্তি তাপসাঃ ।। ৭.৬০.৩ ॥

ভার্গবচ্যবনং চৈব পুরস্কৃত্য মহর্ষয়ঃ ।
দর্শনং তে মহারাজ্ঞশ্চোদয়ন্তি কৃতত্বরাঃ ।প্রীয়মাণা নরব্যাঘ্র যমুনাতীরবাসিনঃ ।। ৭.৬০.৪ ॥

তস্য তদ্বচনং শ্রুত্বা রামঃ প্রোবাচ ধর্মবিৎ ।
প্রবেশ্যন্তাং মহাভাগা ভার্গবপ্রমুখা দ্বিজাঃ ।। ৭.৬০.৫ ॥

রাজ্ঞস্ত্বাজ্ঞাং পুরস্কৃত্য দ্বাঃস্থো মূর্ধ্নি কৃতাঞ্জলিঃ ।
প্রবেশয়ামাস তদা তাপসান্সুদুরাসদান্ ।। ৭.৬০.৬ ॥

শতং সমধিকং তত্র দীপ্যমানং স্বতেজসা ।
প্রবিষ্টং রাজভবনং তাপসানাং মহাত্মনাম্ ।। ৭.৬০.৭ ॥

তে দ্বিজাঃ পূর্ণকলশৈঃ সর্বতীর্থাম্বুসত্কৃতৈঃ ।
গৃহীত্বা ফলমূলং চ রামস্যাভ্যাহরন্বহু ।। ৭.৬০.৮ ॥

প্রতিগৃহ্য তু তত্সর্বং রামঃ প্রীতিপুরস্কৃতঃ ।
তীর্থোদকানি সর্বাণি ফলানি বিবিধানি চ ।। ৭.৬০.৯ ॥

উবাচ চ মহাবাহুঃ সর্বানেব মহামুনীন্ ।
ইমান্যাসনমুখ্যানি যথার্হমুপবিশ্যতাম্ ।। ৭.৬০.১০ ॥

রামস্য ভাষিতং শ্রুত্বা সর্ব এব মহর্ষয়ঃ ।
বৃসীষু রুচিরাখ্যাসু নিষেদুঃ কাঞ্চনীষু তে ।। ৭.৬০.১১ ॥

উপবিষ্টানৃষীংস্তত্র দৃষ্ট্বা পরপুরঞ্জয়ঃ ।
প্রয়তঃ প্রাঞ্জলির্ভূত্বা রাঘবো বাক্যমব্রবীৎ ।। ৭.৬০.১২ ॥

কিমাগমনকার্যং বঃ কিং করোমি সমাহিতঃ ।
আজ্ঞাপ্যো ঽহং মহর্ষীণাং সর্বকামকরঃ সুখম্ ।। ৭.৬০.১৩ ॥

ইদং রাজ্যং চ সকলং জীবিতং চ হৃদি স্থিতম্ ।
সর্বমেতদ্দ্বিদার্থং মে সত্যমেতদ্ব্রবীমি বঃ ।। ৭.৬০.১৪ ॥

তস্য তদ্বচনং শ্রুত্বা সাধুকারো মহানভূৎ ।
ঋষীণামুগ্রতপসাং যমুনাতীরবাসিনাম্ ।। ৭.৬০.১৫ ॥

ঊচুশ্চ তে মহাত্মানো হর্ষেণ মহতা বৃতাঃ ।
উপপন্নং নরশ্রেষ্ঠ তবৈব ভুবি নান্যতঃ ।। ৭.৬০.১৬ ॥

বহবঃ পার্থিবা রাজন্নতিক্রান্তা মহাবলাঃ ।
কার্যস্য গৌরবং মত্বা প্রতিজ্ঞাং নাভ্যরোচয়ন্ ।। ৭.৬০.১৭ ॥

ত্বয়া পুনর্ব্রাহ্মণগৌরবাদিয়ং কৃতা প্রতিজ্ঞা হ্যনবেক্ষ্য কারণম্ ।
ততশ্চ কর্তা হ্যসি নাত্র সংশয়ো মহাভয়াত্ত্রাতুমৃষীংস্ত্বমর্হসি ।। ৭.৬০.১৮ ।।