UtshovSarga 60
60.1
तयोः संवदतोरेवं रामलक्ष्मणयोस्तदा ।
वासन्तिकी निशा प्राप्ता न शीता न च घर्मदा ।। ७.६०.१ ॥
Tayoh sanvadatorevam ramalakshmanayostada
Vasantiki nisha prapta na shita na cha gharmada
60.2
ततः प्रभाते विमले कृतपौर्वाह्णिकक्रियः ।
अभिचक्राम काकुत्स्थो दर्शनं पौरकार्यवित् ।। ७.६०.२ ॥
Tatah prabhate vimale kritapaurvahnikakriyah
Abhichakrama kakutstho darshanam paurakaryavit
60.3
ततः सुमन्त्रस्त्वागम्य राघवं वाक्यमब्रवीत् ।
एते प्रतिहता राजन्द्वारि तिष्ठन्ति तापसाः ।। ७.६०.३ ॥
Tatah sumantrastvagamya raghavam vakyamabravit
Ete pratihata rajandvari tishthanti tapasah
60.4
भार्गवच्यवनं चैव पुरस्कृत्य महर्षयः ।
दर्शनं ते महाराज्ञश्चोदयन्ति कृतत्वराः ।प्रीयमाणा नरव्याघ्र यमुनातीरवासिनः ।। ७.६०.४ ॥
Bhargavachyavanam chaiva puraskritya maharshayah
Darshanam te maharagyashchodayanti kritatvarah, priyamana naravyaghra yamunatiravasinah
60.5
तस्य तद्वचनं श्रुत्वा रामः प्रोवाच धर्मवित् ।
प्रवेश्यन्तां महाभागा भार्गवप्रमुखा द्विजाः ।। ७.६०.५ ॥
Tasya tadvachanam shrutva ramah provacha dharmavit
Praveshyantam mahabhaga bhargavapramukha dvijah
60.6
राज्ञस्त्वाज्ञां पुरस्कृत्य द्वाःस्थो मूर्ध्नि कृताञ्जलिः ।
प्रवेशयामास तदा तापसान्सुदुरासदान् ।। ७.६०.६ ॥
Ragyastvagyam puraskritya dvahstho murdhni kritanjalih
Praveshayamasa tada tapasansudurasadan
60.7
शतं समधिकं तत्र दीप्यमानं स्वतेजसा ।
प्रविष्टं राजभवनं तापसानां महात्मनाम् ।। ७.६०.७ ॥
Shatam samadhikam tatra dipyamanam svatejasa
Pravishtam rajabhavanam tapasanam mahatmanam
60.8
ते द्विजाः पूर्णकलशैः सर्वतीर्थाम्बुसत्कृतैः ।
गृहीत्वा फलमूलं च रामस्याभ्याहरन्बहु ।। ७.६०.८ ॥
Te dvijah purnakalashaih sarvatirthambusatkritaih
Grihitva phalamulam cha ramasyabhyaharanbahu
60.9
प्रतिगृह्य तु तत्सर्वं रामः प्रीतिपुरस्कृतः ।
तीर्थोदकानि सर्वाणि फलानि विविधानि च ।। ७.६०.९ ॥
Pratigrihya tu tatsarvam ramah pritipuraskritah
Tirthodakani sarvani phalani vividhani cha
60.10
उवाच च महाबाहुः सर्वानेव महामुनीन् ।
इमान्यासनमुख्यानि यथार्हमुपविश्यताम् ।। ७.६०.१० ॥
Uvacha cha mahabahuh sarvaneva mahamunin
Imanyasanamukhyani yatharhamupavishyatam
60.11
रामस्य भाषितं श्रुत्वा सर्व एव महर्षयः ।
बृसीषु रुचिराख्यासु निषेदुः काञ्चनीषु ते ।। ७.६०.११ ॥
Ramasya bhashitam shrutva sarva eva maharshayah
Brisishu ruchirakhyasu nisheduh kanchanishu te
60.12
उपविष्टानृषींस्तत्र दृष्ट्वा परपुरञ्जयः ।
प्रयतः प्राञ्जलिर्भूत्वा राघवो वाक्यमब्रवीत् ।। ७.६०.१२ ॥
Upavishtanrishinstatra drishtva parapuranjayah
Prayatah pranjalirbhutva raghavo vakyamabravit
60.13
किमागमनकार्यं वः किं करोमि समाहितः ।
आज्ञाप्यो ऽहं महर्षीणां सर्वकामकरः सुखम् ।। ७.६०.१३ ॥
Kimagamanakaryam vah kim karomi samahitah
Agyapyo ham maharshinam sarvakamakarah sukham
60.14
इदं राज्यं च सकलं जीवितं च हृदि स्थितम् ।
सर्वमेतद्द्विदार्थं मे सत्यमेतद्ब्रवीमि वः ।। ७.६०.१४ ॥
Idam rajyam cha sakalam jivitam cha hridi sthitam
Sarvametaddvidartham me satyametadbravimi vah
60.15
तस्य तद्वचनं श्रुत्वा साधुकारो महानभूत् ।
ऋषीणामुग्रतपसां यमुनातीरवासिनाम् ।। ७.६०.१५ ॥
Tasya tadvachanam shrutva sadhukaro mahanabhut
Rishinamugratapasam yamunatiravasinam
60.16
ऊचुश्च ते महात्मानो हर्षेण महता वृताः ।
उपपन्नं नरश्रेष्ठ तवैव भुवि नान्यतः ।। ७.६०.१६ ॥
Uchushcha te mahatmano harshena mahata vritah
Upapannam narashreshtha tavaiva bhuvi nanyatah
60.17
बहवः पार्थिवा राजन्नतिक्रान्ता महाबलाः ।
कार्यस्य गौरवं मत्वा प्रतिज्ञां नाभ्यरोचयन् ।। ७.६०.१७ ॥
Bahavah parthiva rajannatikranta mahabalah
Karyasya gauravam matva pratigyam nabhyarochayan
60.18
त्वया पुनर्ब्राह्मणगौरवादियं कृता प्रतिज्ञा ह्यनवेक्ष्य कारणम् ।
ततश्च कर्ता ह्यसि नात्र संशयो महाभयात्त्रातुमृषींस्त्वमर्हसि ।। ७.६०.१८ ।।
Tvaya punarbrahmanagauravadiyam krita pratigya hyanavekshya karanam
Tatashcha karta hyasi natra sanshayo mahabhayattratumrishinstvamarhasi