সর্গ 57

57.1

তাং শ্রুত্বা দিব্যসঙ্কাশাং কথামদ্ভুতদর্শনাম্ ।
লক্ষ্মণঃ পরমপ্রীতো রাঘবং বাক্যমব্রবীৎ ।। ৭.৫৭.১ ॥

নিক্ষিপ্তদেহৌ কাকুত্স্থ কথং তৌ দ্বিজপার্থিবৌ ।
পুনর্দেহেন সংয়োগং জগ্মুর্দেবসম্মতৌ ।। ৭.৫৭.২ ॥

তস্য তদ্ভাষিতং শ্রুত্বা রামঃ সত্যপরাক্রমঃ ।
তাং কথাং কথয়ামাস বসিষ্ঠস্য মহাত্মনঃ ।। ৭.৫৭.৩ ॥

যস্তু কুম্ভো রঘুশ্রেষ্ঠ তেজঃপূর্ণো মহাত্মনোঃ ।
তস্মিংস্তেজোময়ৌ বিপ্রৌ সম্ভূতাবৃষিসত্তমৌ ।। ৭.৫৭.৪ ॥

পূর্বং সমভবত্তত্র হ্যগস্ত্যো ভগবানৃষিঃ ।
নাহং সুতস্তবেত্যুক্ত্বা মিত্রং তস্মাদপাক্রমৎ ।। ৭.৫৭.৫ ॥

তদ্ধি তেজস্তু মিত্রস্য উর্বস্যাঃ পূর্বমাহিতম্ ।
তস্মিন্সমভবত্কুম্ভে তত্তেজো যত্র বারুণম্ ।। ৭.৫৭.৬ ॥

কস্যচিত্ত্বথ কালস্য মিত্রাবরুণসম্ভবঃ ।
বসিষ্ঠস্তেজসা যুক্তো জজ্ঞে ইক্ষ্বাকুদৈবতম্ ।। ৭.৫৭.৭ ॥

তমিক্ষ্বাকুর্মহাতেজা জাতমাত্রমনিন্দিতম্ ।
বব্রে পুরোধসং সৌম্য বংশস্যাস্য ভবায় নঃ ।। ৭.৫৭.৮ ॥

এবং ত্বপূর্বদেহস্য বসিষ্ঠস্য মহাত্মনঃ ।
কথিতো নির্গমঃ সৌম্য নিমেঃ শৃণু যথা ঽভবৎ ।। ৭.৫৭.৯ ॥

দৃষ্ট্বা বিদেহং রাজানমৃষয়ঃ সর্ব এব তে ।
তং চ তে যোজয়ামাসুর্যাগদীক্ষাং মনীষিণঃ ।। ৭.৫৭.১০ ॥

তং চ দেহং নরেন্দ্রস্য রক্ষন্তি স্ম দ্বিজোত্তমাঃ ।
গন্ধৈর্মাল্যৈশ্চ বস্ত্রৈশ্চ পৌরভৃত্যসমন্বিতাঃ ।। ৭.৫৭.১১ ॥

ততো যজ্ঞে সমাপ্তে তু ভৃগুস্তত্রেদমব্রবীৎ ।
আনয়িষ্যামি তে চেতস্তুষ্টো ঽস্মি তব পার্থিব ।। ৭.৫৭.১২ ॥

সুপ্রীতাশ্চ সুরাঃ সর্বে নিমেশ্চেতস্তথাব্রুবন্ ।
বরং বরয় রাজর্ষে ক্ব তে চেতো নিরূপ্যতাম্ ।। ৭.৫৭.১৩ ॥

এবমুক্তঃ সুরৈঃ সর্বৈর্নিমেশ্চেতস্তদাব্রবীৎ ।
নেত্রেষু সর্বভূতানাং বসেয়ং সুরসত্তমাঃ ।। ৭.৫৭.১৪ ॥

বাঢমিত্যেব বিবুধা নিমেশ্চেতস্তদা ঽব্রুবন্ ।
নেত্রেষু সর্বভূতানাং বায়ুভূতশ্চরিষ্যসি ।। ৭.৫৭.১৫ ॥

ত্বত্কৃতে চ নিমিষ্যন্তি চক্ষূংষি পৃথিবীপতে ।
বায়ুভূতেন চরতা বিশ্রমার্থং মুহুর্মুহুঃ ।। ৭.৫৭.১৬ ॥

এবমুক্ত্বা তু বিবুধাঃ সর্বে জগ্মুর্যথাগতম্ ।
ঋষয়ো ঽপি মহাত্মানো নিমের্দেহং সমাহরন্ ।। ৭.৫৭.১৭ ॥

অরণিং তত্র নিক্ষিপ্য মথনং চক্রুরোজসা ।
মন্ত্রহোমৈর্মহাত্মানঃ পুত্রহেতোর্নিমেস্তদা ।। ৭.৫৭.১৮ ॥

অরণ্যাং মথ্যামানায়াং প্রাদুর্ভূতো মহাতপাঃ ।
মথনান্মিথিরিত্যাহুর্জননাজ্জনকো ঽভবৎ ।যস্মাদ্বিদেহাত্সম্ভূতো বৈদেহস্তু ততঃ স্মৃতঃ ।। ৭.৫৭.১৯ ॥

এবং বিদেহরাজশ্চ জনকঃ পূর্বকো ঽভবৎ ।
মিথির্নাম মহাতেজাস্তেনায়ং মৈথিলো ঽভবৎ ।। ৭.৫৭.২০ ।।