Utshovসর্গ 56
56.1
রামস্য ভাষিতং শ্রুত্বা লক্ষ্মণঃ পরবীরহা ।
উবাচ প্রাঞ্জলির্বাক্যং রাঘবং দীপ্ততেজসম্ ।। ৭.৫৬.১ ॥
56.2
নিক্ষিপ্তদেহৌ কাকুত্স্য কথং তৌ দ্বিজপার্থিবৌ ।
পুনর্দেহেন সংয়োগং জগ্মতুর্দেবসম্মতৌ ।। ৭.৫৬.২ ॥
56.3
লক্ষ্মণেনৈবমুক্তস্তু রামশ্চেক্ষ্বাকুনন্দনঃ ।
প্রত্যুবাচ মহাতেজা লক্ষ্মণং পুরুষর্ষভঃ ।। ৭.৫৬.৩ ॥
56.4
তৌ পরস্পরশাপেন দেহাবুত্সৃজ্য ধার্মিকৌ ।
অভূতাং নৃপবিপ্রর্ষী বায়ুভূতৌ তপোধনৌ ।। ৭.৫৬.৪ ॥
56.5
অশরীরঃ শরীরস্য কৃতে ঽন্যস্য মহামুনিঃ ।
বসিষ্ঠঃ সুমহাতেজা জগাম পিতুরন্তিকম্ ।। ৭.৫৬.৫ ॥
56.6
সো ঽভিবাদ্য ততঃ পাদৌ দেবদেবস্য ধর্মবিৎ ।
পিতামহমথোবাচ বায়ুভূত ইদং বচঃ ।। ৭.৫৬.৬ ॥
56.7
ভগবন্নিমিশাপেন বিদেহত্বমুপাগমম্ ।
লোকনাথ মহাদেব অণ্ডজো ঽপি ত্বমব্জজঃ ।। ৭.৫৬.৭ ॥
56.8
সর্বেষাং দেহহীনানাং মহদ্দুঃখং ভবিষ্যতি ।
লুপ্যন্তে সর্বকার্যণি হীনদেহস্য বৈ প্রভো ।দেহস্যান্যস্য সদ্ভাবে প্রসাদং কর্তুমর্হসি ।। ৭.৫৬.৮ ॥
56.9
তমুবাচ ততো ব্রহ্মা স্বয়ম্ভূরমিতপ্রভঃ ।
মিত্রাবরুণজং তেজ প্রবিশ ত্বং মহায়শঃ ।। ৭.৫৬.৯ ॥
56.10
অয়োনিজস্ত্বং ভবিতা তত্রাপি দ্বিজসত্তম ।
ধর্মেণ মহতা যুক্তঃ পুনরেষ্যসি মে বশম্ ।। ৭.৫৬.১০ ॥
56.11
এবমুক্তস্তু দেবেন চাভিবাদ্য প্রদক্ষিণম্ ।
কৃত্বা পিতামহং তূর্ণং প্রয়য়ৌ বরুণালয়ম্ ।। ৭.৫৬.১১ ॥
56.12
তমেব কালং মিত্রো ঽপি বরুণত্বমকারয়ৎ ।
ক্ষীরোদেন সহোপেতঃ পূজ্যমানঃ সুরোত্তমৈঃ ।। ৭.৫৬.১২ ॥
56.13
এতস্মিন্নেব কালে তু উর্বশী পরমাপ্সরাঃ ।
যদৃচ্ছয়া তমুদ্দেশমায়য়ৌ সখিভির্বৃতা ।। ৭.৫৬.১৩ ॥
56.14
তাং দৃষ্ট্বা রূপসম্পন্নাং ক্রীডন্তীং বরুণালয়ে ।
আবিশত্পরমো হর্ষো বরুণং চোর্বশীকৃতে ।। ৭.৫৬.১৪ ॥
56.15
স তাং পদ্মপলাশাক্ষীং পূর্ণচন্দ্রনিভাননাম্ ।
বরুণো বরয়ামাস মৈথুনায়াপ্সরোবরাম্ ।। ৭.৫৬.১৫ ॥
56.16
প্রত্যুবাচ ততঃ সা তু বরুণং প্রাঞ্জলিঃ স্থিতা ।
মিত্রেণাহং বৃতা সাক্ষাত্পূর্বমেব সুরেশ্বর ।। ৭.৫৬.১৬ ॥
56.17
বরুণস্ত্বব্রবীদ্বাক্যং কন্দর্পশরপীডিতঃ ।
ইদং তেজঃ সমুত্স্রক্ষ্যে কুম্ভে ঽস্মিন্দেবনির্মিতে ।। ৭.৫৬.১৭ ॥
56.18
এবমুত্সৃজ্য সুশ্রোণি ত্বয্যহং বরবর্ণিনি ।
কৃতকামো ভবিষ্যামি যদি নেচ্ছসি সঙ্গমম্ ।। ৭.৫৬.১৮ ॥
56.19
তস্য তল্লোকপালস্য বরুণস্য সুভাষিতম্ ।
উর্বশী পরমপ্রীতা শ্রুত্বা বাক্যমুবাচ হ ।। ৭.৫৬.১৯ ॥
56.20
কামমেতদ্ভবত্বেবং হৃদয়ং মে ত্বয়ি স্থিতম্ ।
ভাবশ্চাপ্যধিকস্তুভ্যং দেহো মিত্রস্য তু প্রভো ।। ৭.৫৬.২০ ॥
56.21
উর্বশ্যা এবমুক্তস্তু রেতস্তন্মহদদ্ভুতম্ ।
জ্বলদগ্নিশিখাপ্রখ্যং তস্মিন্কুম্ভে হ্যপাসৃজৎ ।। ৭.৫৬.২১ ॥
56.22
উর্বশী ত্বগমত্তত্র মিত্রো বৈ যত্র দেবতা ।
তাং তু মিত্রঃ সুসঙ্ক্রম্য উর্বশীমিদমব্রবীৎ ।। ৭.৫৬.২২ ॥
56.23
ময়া নিমন্ত্রিতা পূর্বং কস্মাত্ত্বমবসর্জিতা ।
পতিমন্যং বৃতবতী তস্মাত্ত্বং দুষ্টচারিণী ।। ৭.৫৬.২৩ ॥
56.24
অনেন দুষ্কৃতেন ত্বং মত্ক্রোধকলুষীকৃতা ।
মনুষ্যলোকমাস্থায় কঞ্চিত্কালং নিবত্স্যসি ।। ৭.৫৬.২৪ ॥
56.25
বুধস্য পুত্রো রাজর্ষিঃ কাশীরাজঃ পুরূরবাঃ ।
তমদ্য গচ্ছ দুর্বুদ্ধে স তে ভর্তা ভবিষ্যতি ।। ৭.৫৬.২৫ ॥
56.26
ততঃ সা শাপদোষেণ পুরূরবসমভ্যগাৎ ।
প্রতিয়াতে পুরূরবং বুধস্যাত্মজমৌরসম্ ।। ৭.৫৬.২৬ ॥
56.27
তস্য জজ্ঞে ততঃ শ্রীমানায়ুঃ পুত্রো মহাবলঃ ।
নহুষো যস্য পুত্রস্তু বভূবেন্দ্রসমদ্যুতিঃ ।। ৭.৫৬.২৭ ॥
56.28
বজ্রমুত্সৃজ্য বৃত্রায় ভ্রান্তে ঽথ ত্রিদিবেশ্বরে ।
শতং বর্ষসহস্রাণি যেনেন্দ্রত্বং প্রশাসিতম্ ।। ৭.৫৬.২৮ ॥
56.29
সা তেন শাপেন জগাম ভূমিং তদোর্বশী চারুদতী সুনেত্রা ।
বহূনি বর্ষাণ্যবসচ্চ সুভ্রূঃ শাপক্ষয়াদিন্দ্রসদো যয়ৌ চ ।। ৭.৫৬.২৯ ।।