সর্গ 55

55.1

এষ তে নৃগশাপস্য বিস্তরো ঽভিহিতো ময়া ।
যদ্যস্তি শ্রবণে শ্রদ্ধা শৃণুষ্বেহাপরাং কথাম্ ।। ৭.৫৫.১ ॥

এবমুক্তস্তু রামেণ সৌমিত্রিঃ পুনরব্রবীৎ ।
তৃপ্তিরাশ্চর্যভূতানাং কথানাং নাস্তি মে নৃপ ।। ৭.৫৫.২ ॥

লক্ষ্মণেনৈবমুক্তস্তু রাম ইক্ষ্বাকুনন্দনঃ ।
কথাং পরমধর্মিষ্ঠাং ব্যাহর্তুমুপচক্রমে ।। ৭.৫৫.৩ ॥

আসীদ্রাজা নিমির্নাম ইক্ষ্বাকূণাং মহাত্মনাম্ ।
পুত্রো দ্বাদশমো বীর্যে ধর্মে চ পরিনিষ্ঠিতঃ ।। ৭.৫৫.৪ ॥

স রাজা বীর্যসম্পন্নঃ পুরং দেবপুরোপমম্ ।
নিবেশয়ামাস তদা অভ্যাশে গৌতমস্য তু ।। ৭.৫৫.৫ ॥

পুরস্য সুকৃতং নাম বৈজয়ন্তমিতি শ্রুতম্ ।
নিবেশং যত্র রাজর্ষির্নিমিশ্চক্রে মহায়শাঃ ।। ৭.৫৫.৬ ॥

তস্য বুদ্ধিঃ সমুত্পন্না নিবেশ্য সুমহাপুরম্ ।
যজেয়ং দীর্ঘসত্রেণ পিতুঃ প্রহ্লাদয়ন্মনঃ ।। ৭.৫৫.৭ ॥

ততঃ পিতরমামন্ত্র্য ইক্ষ্বাকুং হি মনোঃ সুতম্ ।
বসিষ্ঠং বরয়ামাস পূর্বং ব্রহ্মর্ষিসত্তমম্ ।। ৭.৫৫.৮ ॥

অনন্তরং স রাজর্ষির্নিমিরিক্ষ্বাকুনন্দনঃ ।
অত্রিমঙ্গিরসং চৈব ভৃগুং চৈব তপোধনম্ ।। ৭.৫৫.৯ ॥

তমুবাচ বসিষ্ঠস্তু নিমিং রাজর্ষিসত্তমম্ ।
বৃতো ঽহং পূর্বমিন্দ্রেণ অন্তরং প্রতিপালয় ।। ৭.৫৫.১০ ॥

অনন্তরং মহাবিপ্রো গৌতমঃ প্রত্যপূরয়ৎ ।
বসিষ্ঠো ঽপি মহাতেজা ইন্দ্রয়জ্ঞমথাকরোৎ ।। ৭.৫৫.১১ ॥

নিমিস্তু রাজা বিপ্রাংস্তান্সমানীয় নরাধিপঃ ।
অয়জদ্ধিমবত্পার্শ্বে স্বপুরস্য সমীপতঃ ।পঞ্চবর্ষসহস্রাণি রাজা দীক্ষামুপাগমৎ ।। ৭.৫৫.১২ ॥

ইন্দ্রয়জ্ঞাবসানে তু বসিষ্ঠো ভগবনৃষিঃ ।
সকাশমাগতো রাজ্ঞো হৌত্রং কর্তুমনিন্দিতঃ ।। ৭.৫৫.১৩ ॥

তদন্তরমথাপশ্যদ্গৌতমেনাভিপূরিতম্ ।
কোপেন মহতাবিষ্টো বসিষ্ঠো ব্রহ্মণঃ সুতঃ ।। ৭.৫৫.১৪ ॥

স রাজ্ঞো দর্শনাকাঙ্ক্ষী মুহূর্তং সমুপাবিশৎ ।
তস্মিন্নহনি রাজর্ষির্নিদ্রয়া ঽপহৃতো ভৃশম্ ।। ৭.৫৫.১৫ ॥

ততো মন্যুর্বসিষ্ঠস্য প্রাদুরাসীন্মহাত্মনঃ ।
অদর্শনেন রাজর্ষের্ব্যাহর্তুমুপচক্রমে ।। ৭.৫৫.১৬ ॥

যস্মাত্ত্বমন্যং বৃতবান্মামবজ্ঞায় পার্থিব ।
চেতনেন বিনাভূতো দেহস্তব ভবিষ্যতি ।। ৭.৫৫.১৭ ॥

ততঃ প্রবুদ্ধো রাজর্ষিঃ শ্রুত্বা শাপমুদাহৃতম্ ।
ব্রহ্ময়োনিমথোবাচ সংরম্ভাৎ ক্রোধমূর্চ্ছিতঃ ।। ৭.৫৫.১৮ ॥

অজানতঃ শয়ানস্য ক্রোধেন কলুষীকৃতঃ ।
মুক্তবান্ময়ি শাপাগ্নিং যমদণ্ডমিবাপরম্ ।। ৭.৫৫.১৯ ॥

তস্মাত্তবাপি ব্রহ্মর্ষে চেতনেন বিনা কৃতঃ ।
দেহঃ সুরুচিরপ্রখ্যো ভবিষ্যতি ন সংশয়ঃ ।। ৭.৫৫.২০ ॥

ইতি রোষবশাদুভৌ তদানীমন্যোন্যং শপিতৌ নৃপদ্বিজেন্দ্রৌ ।
সহসৈব বভূবতুর্বিদেহৌ তত্তুল্যাধিগতপ্রভাববন্তৌ ।। ৭.৫৫.২১ ।।