Utshovসর্গ 53
53.1
লক্ষ্মণস্য তু তদ্বাক্যং নিশম্য পরমাদ্ভুতম্ ।
সুপ্রীতশ্চাভবদ্রামো বাক্যমেতদুবাচ হ ।। ৭.৫৩.১ ॥
53.2
দুর্লভস্ত্বীদৃশো বন্ধুরস্মিন্কালে বিশেষতঃ ।
যাদৃশস্ত্বং মহাবুদ্ধের্মম সৌম্য মনো ঽনুগঃ ।। ৭.৫৩.২ ॥
53.3
যচ্চ মে হৃদয়ে কিঞ্চিদ্বর্ততে শুভলক্ষণ ।
তন্নিশাময় চ শ্রুত্বা কুরুষ্ব বচনং মম ।। ৭.৫৩.৩ ॥
53.4
চত্বারো দিবসাঃ সৌম্য কার্যং পৌরজনস্য বৈ ।
অকুর্বাণস্য সৌমিত্রে তন্মে মর্মাণি কৃন্ততি ।। ৭.৫৩.৪ ॥
53.5
আহূয়ন্তাং প্রকৃতয়ঃ পুরোধা মন্ত্রিণস্তথা ।
কার্যার্থিনশ্চ পুরুষাঃ স্ত্রিয়শ্চ পুরুষর্ষভ ।। ৭.৫৩.৫ ॥
53.6
পৌরকার্যাণি যো রাজা ন করোতি দিনে দিনে ।
সংবৃতে নরকে ঘোরে পতিতো নাত্র সংশয়ঃ ।। ৭.৫৩.৬ ॥
53.7
শ্রূয়তে হি পুরা রাজা নৃগো নাম মহায়শাঃ ।
বভূব পৃথিবীপালো ব্রহ্মণ্যঃ সত্যবাক্ শুচিঃ ।। ৭.৫৩.৭ ॥
53.8
স কদাচিদ্গবাং কোটীঃ সবত্সাঃ স্বর্ণভূষিতাঃ ।
নৃদেবো ভূমিদেবেভ্যঃ পুষ্করেষু দদৌ নৃপঃ ।। ৭.৫৩.৮ ॥
53.9
ততঃ সঙ্গাদ্গতা ধেনুঃ সবত্সা স্পর্শিতা ঽনঘ ।
ব্রাহ্মণস্যাহিতাগ্নেশ্চ দরিদ্রস্যোঞ্ছবর্তিনঃ ।। ৭.৫৩.৯ ॥
53.10
স নষ্টাং গাং ক্ষুধার্তো বৈ অন্বিষংস্তত্র তত্র চ ।
নাপশ্যত্সর্বরাজ্যেষু সংবত্সরগণান্বহূন্ ।। ৭.৫৩.১০ ॥
53.11
ততঃ কনখলং গত্বা জীর্ণবত্সাং নিরাময়াম্ ।
দদর্শ গাং স্বকাং ধেনুং ব্রাহ্মণস্য নিবেশনে ।। ৭.৫৩.১১ ॥
53.12
অথ তাং নামধেয়েন স্বকেনোবাচ স দ্বিজঃ ।
আগচ্ছ শবলেত্যেবং সা তু শুশ্রাব গৌঃ স্বরম্ ।। ৭.৫৩.১২ ॥
53.13
তস্য তং স্বরমাজ্ঞায় ক্ষুধার্তস্য দ্বিজস্য বৈ ।
অন্বগাত্পৃষ্ঠতঃ সা গৌর্গচ্ছন্তং পাবকোপমম্ ।। ৭.৫৩.১৩ ॥
53.14
যো ঽপি পালয়তে বিপ্রঃ সো ঽপি গামন্বগাদ্দ্রুতম্ ।
গত্বা তমৃষিমাচষ্ট মম গৌরিতি সত্বরম্ ।। ৭.৫৩.১৪ ॥
53.15
স্পর্শিতা রাজসিংহেন মম দত্তা নৃগেণ হ ।
তয়োর্ব্রাহ্মণয়োর্বাদো মহানাসীদ্বিপশ্চিতোঃ ।। ৭.৫৩.১৫ ॥
53.16
বিবদন্তৌ ততো ঽন্যোন্যং দাতারমভিজগ্মতুঃ ।
তৌ রাজভবনদ্বারি ন প্রাপ্তৌ নৃগশাসনম্ ।। ৭.৫৩.১৬ ॥
53.17
অহোরাত্রাণ্যনেকানি বসন্তৌ ক্রোধমীয়তুঃ ।
ঊচতুশ্চ মহাত্মানৌ তাবুভৌ দ্বিজসত্তমৌ ॥ক্রুদ্ধৌ পরমসম্প্রাপ্তৌ বাক্যং ঘোরাভিসংহিতম্ ।। ৭.৫৩.১৭ ॥
53.18
অর্থিনাং কার্যসিদ্ধ্যর্থং যস্মাত্ত্বং নৈষি দর্শনম্ ।
অদৃশ্যঃ সর্বভূতানাং কৃকলাসো ভবিষ্যসি ।। ৭.৫৩.১৮ ॥
53.19
বহুবর্ষসহস্রাণি বহুবর্ষশতানি চ ।
শ্বভ্রে ঽস্মিন্ কৃকলাসো বৈ দীর্ঘকালং বসিষ্যসি ।। ৭.৫৩.১৯ ॥
53.20
উত্পত্স্যতে হি লোকে ঽস্মিন্যদূনাং কীর্তিবর্ধনঃ ।
বাসুদেব ইতি খ্যাতো বিষ্ণুঃ পুরুষবিগ্রহঃ ।। ৭.৫৩.২০ ॥
53.21
স তে মোক্ষয়িতা রাজংস্তস্মাচ্ছাপাদ্ভবিষ্যসি ।
কৃতা চ তেন কালেন নিষ্কৃতিস্তে ভবিষ্যতি ।। ৭.৫৩.২১ ॥
53.22
ভারাবতরণার্থং হি নরনারায়ণাবুভৌ ।
উত্পত্স্যেতে মহাবীর্যৌ কলৌ যুগ উপস্থিতে ।। ৭.৫৩.২২ ॥
53.23
এবং তৌ শাপমুত্সৃজ্য ব্রাহ্মণৌ বিগতজ্বরৌ ।
তাং গাং হি দুর্বলাং বৃদ্ধাং দদতুর্ব্রাহ্মণায় বৈ ।। ৭.৫৩.২৩ ॥
53.24
এবং স রাজা তং শাপমুপভুঙ্ক্তে সুদারুণম্ ।
। ৭.৫৩.২৪ ॥
53.25
কার্যার্থিনাং বিমর্দো হি রাজ্ঞাং দোষায় কল্পতে ।
তচ্ছীঘ্রং দর্শনং মহ্যমভিবর্তন্তু কার্যিণঃ ।। ৭.৫৩.২৫ ॥
53.26
সুকৃতস্য হি কার্যস্য ফলং নাপৈতি পার্থিবঃ ।
তস্মাদ্গচ্ছ প্রতীক্ষস্ব সৌমিত্রে কার্যবাঞ্জনঃ ।। ৭.৫৩.২৬ ।।