সর্গ 52

52.1

তত্র তাং রজনীমুষ্য কেশিন্যাং রঘুনন্দনঃ ।
প্রভাতে পুনরুত্থায় লক্ষ্মণঃ প্রয়য়ৌ তদা ।। ৭.৫২.১ ॥

ততো ঽর্ধদিবসে প্রাপ্তে প্রবিবেশ মহারথঃ ।
অয়োধ্যাং রত্নসম্পূর্ণাং হৃষ্টপুষ্টজনাবৃতাম্ ।। ৭.৫২.২ ॥

সৌমিত্রিস্তু পরং দৈন্যং জগাম সুমহামতিঃ ।
রামপাদৌ সমাসাদ্য বক্ষ্যামি কিমহং গতঃ ।। ৭.৫২.৩ ॥

তস্যৈবং চিন্তয়ানস্য ভবনং শশিসন্নিভম্ ।
রামস্য পরমোদারং পুরস্তান্সমদৃশ্যত ।। ৭.৫২.৪ ॥

রাজ্ঞস্তু ভবনদ্বারি সো ঽবতীর্য রথোত্তমাৎ ।
অবাঙ্মুখো দীনমনাঃ প্রবিবেশানিবারিতঃ ।। ৭.৫২.৫ ॥

স দৃষ্ট্বা রাঘবং দীনমাসীনং পরমাসনে ।
নেত্রাভ্যামশ্রুপূর্ণাভ্যাং দদর্শাগ্রজমগ্রতঃ ।। ৭.৫২.৬ ॥

জগ্রাহ চরণৌ তস্য লক্ষ্মণো দীনচেতনঃ ।
উবাচ দীনয়া বাচা প্রাঞ্জলিঃ সুসমাহিতঃ ।। ৭.৫২.৭ ॥

আর্যস্যাজ্ঞাং পুরস্কৃত্য বিসৃজ্য জনকাত্মজাম্ ।
গঙ্গাতীরে যথোদ্দিষ্টে বাল্মীকেরাশ্রমে শুচৌ ।। ৭.৫২.৮ ॥

তত্র তাং চ শুভাচারামাশ্রমান্তে যশস্বিনীম্ ।
পুনরপ্যাগতো বীর পাদমূলমুপাসিতুম্ ।। ৭.৫২.৯ ॥

মা শুচঃ পুরুষব্যাঘ্র কালস্য গতিরীদৃশী ।
ত্বদ্বিধা ন হি শোচন্তি বুদ্ধিমন্তো মনস্বিনঃ ।। ৭.৫২.১০ ॥

সর্বে ক্ষয়ান্তা নিচয়াঃ পতনান্তাঃ সমুচ্ছ্রয়াঃ ।
সংয়োগা বিপ্রয়োগান্তা মরণান্তং চ জীবিতম্ ।। ৭.৫২.১১ ॥

তস্মাত্পুত্রেষু দারেষু মিত্রেষু চ ধনেষু চ ।
নাতিপ্রসঙ্গঃ কর্তব্যো বিপ্রয়োগো হি তৈর্ধ্রুবম্ ।। ৭.৫২.১২ ॥

শক্তস্ত্বমাত্মনা ঽ ঽত্মানং বিনেতুং মনসৈব হি ।
লোকান্সর্বাংশ্চ কাকুত্স্থ কিং পুনঃ শোকমাত্মনঃ ।। ৭.৫২.১৩ ॥

নেদৃশেষু বিমুহ্যন্তি ত্বদ্বিধাঃ পুরুষর্ষভাঃ ।
অপবাদঃ স কিল তে পুনরেষ্যতি রাঘব ।। ৭.৫২.১৪ ॥

যদর্থং মৈথিলী ত্যক্তা অপবাদভয়ান্নৃপ ।
সো ঽপবাদঃ পুরে রাজন্ভবিষ্যতি ন সংশয়ঃ ।। ৭.৫২.১৫ ॥

স ত্বং পুরুষশার্দূল ধৈর্যেণ সুসমাহিতঃ ।
ত্যজৈনাং দুর্বলাং বুদ্ধিং সন্তাপং মা কুরুষ্ব হ ।। ৭.৫২.১৬ ॥

এবমুক্তঃ স কাকুত্স্থো লক্ষ্মণেন মহাত্মনা ।
উবাচ পরয়া প্রীত্যা সৌমিত্রিং মিত্রবত্সলঃ ।। ৭.৫২.১৭ ॥

এবমেতন্নরশ্রেষ্ঠ যথা বদসি লক্ষ্মণ ।
পরিতোষশ্চ মে বীর মম কার্যানুশাসনে ।। ৭.৫২.১৮ ॥

নিবৃত্তিশ্চাগতা সৌম্য সন্তাপশ্চ নিরাকৃতঃ ।
ভবদ্বাক্যৈঃ সুরুচিরৈরনুনীতো ঽস্মি লক্ষ্মণ ।। ৭.৫২.১৯ ।।