UtshovSarga 52
52.1
तत्र तां रजनीमुष्य केशिन्यां रघुनन्दनः ।
प्रभाते पुनरुत्थाय लक्ष्मणः प्रययौ तदा ।। ७.५२.१ ॥
Tatra tam rajanimushya keshinyam raghunandanah
Prabhate punarutthaya lakshmanah prayayau tada
52.2
ततो ऽर्धदिवसे प्राप्ते प्रविवेश महारथः ।
अयोध्यां रत्नसम्पूर्णां हृष्टपुष्टजनावृताम् ।। ७.५२.२ ॥
Tato rdhadivase prapte pravivesha maharathah
Ayodhyam ratnasampurnam hrishtapushtajanavritam
52.3
सौमित्रिस्तु परं दैन्यं जगाम सुमहामतिः ।
रामपादौ समासाद्य वक्ष्यामि किमहं गतः ।। ७.५२.३ ॥
Saumitristu param dainyam jagama sumahamatih
Ramapadau samasadya vakshyami kimaham gatah
52.4
तस्यैवं चिन्तयानस्य भवनं शशिसन्निभम् ।
रामस्य परमोदारं पुरस्तान्समदृश्यत ।। ७.५२.४ ॥
Tasyaivam chintayanasya bhavanam shashisannibham
Ramasya paramodaram purastansamadrishyata
52.5
राज्ञस्तु भवनद्वारि सो ऽवतीर्य रथोत्तमात् ।
अवाङ्मुखो दीनमनाः प्रविवेशानिवारितः ।। ७.५२.५ ॥
Ragyastu bhavanadvari so vatirya rathottamat
Avanmukho dinamanah praviveshanivaritah
52.6
स दृष्ट्वा राघवं दीनमासीनं परमासने ।
नेत्राभ्यामश्रुपूर्णाभ्यां ददर्शाग्रजमग्रतः ।। ७.५२.६ ॥
Sa drishtva raghavam dinamasinam paramasane
Netrabhyamashrupurnabhyam dadarshagrajamagratah
52.7
जग्राह चरणौ तस्य लक्ष्मणो दीनचेतनः ।
उवाच दीनया वाचा प्राञ्जलिः सुसमाहितः ।। ७.५२.७ ॥
Jagraha charanau tasya lakshmano dinachetanah
Uvacha dinaya vacha pranjalih susamahitah
52.8
आर्यस्याज्ञां पुरस्कृत्य विसृज्य जनकात्मजाम् ।
गङ्गातीरे यथोद्दिष्टे वाल्मीकेराश्रमे शुचौ ।। ७.५२.८ ॥
Aryasyagyam puraskritya visrijya janakatmajam
Gangatire yathoddishte valmikerashrame shuchau
52.9
तत्र तां च शुभाचारामाश्रमान्ते यशस्विनीम् ।
पुनरप्यागतो वीर पादमूलमुपासितुम् ।। ७.५२.९ ॥
Tatra tam cha shubhacharamashramante yashasvinim
Punarapyagato vira padamulamupasitum
52.10
मा शुचः पुरुषव्याघ्र कालस्य गतिरीदृशी ।
त्वद्विधा न हि शोचन्ति बुद्धिमन्तो मनस्विनः ।। ७.५२.१० ॥
Ma shuchah purushavyaghra kalasya gatiridrishi
Tvadvidha na hi shochanti buddhimanto manasvinah
52.11
सर्वे क्षयान्ता निचयाः पतनान्ताः समुच्छ्रयाः ।
संयोगा विप्रयोगान्ता मरणान्तं च जीवितम् ।। ७.५२.११ ॥
Sarve kshayanta nichayah patanantah samuchchhrayah
Sanyoga viprayoganta maranantam cha jivitam
52.12
तस्मात्पुत्रेषु दारेषु मित्रेषु च धनेषु च ।
नातिप्रसङ्गः कर्तव्यो विप्रयोगो हि तैर्ध्रुवम् ।। ७.५२.१२ ॥
Tasmatputreshu dareshu mitreshu cha dhaneshu cha
Natiprasangah kartavyo viprayogo hi tairdhruvam
52.13
शक्तस्त्वमात्मना ऽ ऽत्मानं विनेतुं मनसैव हि ।
लोकान्सर्वांश्च काकुत्स्थ किं पुनः शोकमात्मनः ।। ७.५२.१३ ॥
Shaktastvamatmana tmanam vinetum manasaiva hi
Lokansarvanshcha kakutstha kim punah shokamatmanah
52.14
नेदृशेषु विमुह्यन्ति त्वद्विधाः पुरुषर्षभाः ।
अपवादः स किल ते पुनरेष्यति राघव ।। ७.५२.१४ ॥
Nedrisheshu vimuhyanti tvadvidhah purusharshabhah
Apavadah sa kila te punareshyati raghava
52.15
यदर्थं मैथिली त्यक्ता अपवादभयान्नृप ।
सो ऽपवादः पुरे राजन्भविष्यति न संशयः ।। ७.५२.१५ ॥
Yadartham maithili tyakta apavadabhayannripa
So pavadah pure rajanbhavishyati na sanshayah
52.16
स त्वं पुरुषशार्दूल धैर्येण सुसमाहितः ।
त्यजैनां दुर्बलां बुद्धिं सन्तापं मा कुरुष्व ह ।। ७.५२.१६ ॥
Sa tvam purushashardula dhairyena susamahitah
Tyajainam durbalam buddhim santapam ma kurushva ha
52.17
एवमुक्तः स काकुत्स्थो लक्ष्मणेन महात्मना ।
उवाच परया प्रीत्या सौमित्रिं मित्रवत्सलः ।। ७.५२.१७ ॥
Evamuktah sa kakutstho lakshmanena mahatmana
Uvacha paraya pritya saumitrim mitravatsalah
52.18
एवमेतन्नरश्रेष्ठ यथा वदसि लक्ष्मण ।
परितोषश्च मे वीर मम कार्यानुशासने ।। ७.५२.१८ ॥
Evametannarashreshtha yatha vadasi lakshmana
Paritoshashcha me vira mama karyanushasane
52.19
निवृत्तिश्चागता सौम्य सन्तापश्च निराकृतः ।
भवद्वाक्यैः सुरुचिरैरनुनीतो ऽस्मि लक्ष्मण ।। ७.५२.१९ ।।
Nivrittishchagata saumya santapashcha nirakritah
Bhavadvakyaih suruchirairanunito smi lakshmana