সর্গ 50

50.1

দৃষ্ট্বা তু মৈথিলীং সীতামাশ্রমে সম্প্রবেশিতাম্ ।
সন্তাপমগমদ্ঘোরং লক্ষ্মণো দীনচেতনঃ ।। ৭.৫০.১ ॥

অব্রবীচ্চ মহাতেজাঃ সুমন্ত্রং মন্ত্রসারথিম্ ।
সীতাসন্তাপজং দুঃখং পশ্য রামস্য সারথে ।। ৭.৫০.২ ॥

ততো দুঃখতরং কিং নু রাঘবস্য ভবিষ্যতি ।
পত্নীং শুদ্ধসমাচারাং বিসৃজ্য জনকাত্মজাম্ ।। ৭.৫০.৩ ॥

ব্যক্তং দৈবাদহং মন্যে রাঘবস্য বিনা ভবম্ ।
বৈদেহ্যা সারথে নিত্যং দৈবং হি দুরতিক্রমম্ ।। ৭.৫০.৪ ॥

যো হি দেবান্সগন্ধর্বানসুরান্সহ রাক্ষসৈঃ ।
নিহন্যাদ্রাঘবঃ ক্রুদ্ধঃ স দৈবমনুবর্ততে ।। ৭.৫০.৫ ॥

পুরা রামঃ পিতুর্বাক্যাদ্দণ্ডকে বিজনে বনে ।
উষিত্বা নব বর্ষাণি পঞ্চ চৈব মহাবনে ।। ৭.৫০.৬ ॥

ততো দুঃখতরং ভূয়ঃ সীতায়া বিপ্রবাসনম্ ।
পৌরাণাং বচনং শ্রুত্বা নৃশংসং প্রতিভাতি মে ।। ৭.৫০.৭ ॥

কো নু ধর্মাশ্রয়ঃ সূত কর্মণ্যস্মিন্যশোহরে ।
মৈথিলীং প্রতিসম্প্রাপ্তঃ পৌরৈর্হীনার্থবাদিভিঃ ।। ৭.৫০.৮ ॥

এতা বাচো বহুবিধাঃ শ্রুত্বা লক্ষ্মণভাষিতাঃ ।
সুমন্ত্রঃ শ্রদ্ধয়া প্রাজ্ঞো বাক্যমেতদুবাচ হ ।। ৭.৫০.৯ ॥

ন সন্তাপস্ত্বয়া কার্যঃ সৌমিত্রে মৈথিলীং প্রতি ।
দৃষ্টমেতত্পুরা বিপ্রৈঃ পিতুস্তে লক্ষ্মণাগ্রতঃ ।। ৭.৫০.১০ ॥

ভবিষ্যতি দৃঢং রামো দুঃখপ্রায়ো ঽপি সৌখ্যভাক্ ।
প্রাপ্স্যতে চ মহাবাহুর্বিপ্রয়োগং প্রিয়ৈর্ধ্রুবম্ ।। ৭.৫০.১১ ॥

ত্বাং চৈব মৈথিলীং চৈব শত্রুঘ্নভরতাবুভৌ ।
সন্ত্যজিষ্যতি ধর্মাত্মা কালেন মহতা মহান্ ।। ৭.৫০.১২ ॥

ইদং ত্বয়ি ন বক্তব্যং সৌমিত্রে ভরতে ঽপি বা ।
রাজ্ঞা বো ব্যাহৃতং বাক্যং দুর্বাসা যদুবাচ হ ।। ৭.৫০.১৩ ॥

মহাজনসমীপে চ মম চৈব নরর্ষভ ।
ঋষিণা ব্যাহৃতং বাক্যং বসিষ্ঠস্য চ সন্নিধৌ ।। ৭.৫০.১৪ ॥

ঋষেস্তু বচনং শ্রুত্বা মামাহ পুরুষর্ষভঃ ।
সূত ন ক্বচিদেবং তে বক্তব্যং জনসন্নিধৌ ।। ৭.৫০.১৫ ॥

তস্যাহং লোকপালস্য বাক্যং তত্সুসমাহিতঃ ।
নৈব জাত্বনৃতং কার্যমিতি মে সৌম্য দর্শনম্ ।। ৭.৫০.১৬ ॥

সর্বথৈব ন বক্তব্যং ময়া সৌম্য তবাগ্রতঃ ।
যদি তে শ্রবণে শ্রদ্ধা শ্রূয়তাং রঘুনন্দন ।। ৭.৫০.১৭ ॥

যদ্যপ্যহং নরেন্দ্রেণ রহস্যং শ্রাবিতঃ পুরা ।
তথাপ্যুদাহরিষ্যামি দৈবং হি দুরতিক্রমম্ ।। ৭.৫০.১৮ ॥

যেনেদমীদৃশং প্রাপ্তং দুঃখং শোকসমন্বিতম্ ।
ন ত্বয়া ভরতে বাচ্যং শত্রুঘ্নস্যাপি সন্নিধৌ ।। ৭.৫০.১৯ ॥

তচ্ছ্রুত্বা ভাষিতং তস্য গম্ভীরার্থপদং মহৎ ।
তথ্যং ব্রূহীতি সৌমিত্রিঃ সূতং বাক্যমথাব্রবীৎ ।। ৭.৫০.২০ ।।