Utshovসর্গ 49
49.1
সীতাং তু রুদতীং দৃষ্ট্বা তে তত্র মুনিদারকাঃ ।
প্রাদ্রবন্যত্র ভগবানাস্তে বাল্মীকিরুগ্রধীঃ ।। ৭.৪৯.১ ॥
49.2
অভিবাদ্য মুনেঃ পাদৌ মুনিপুত্রা মহর্ষয়ে ।
সর্বং নিবেদয়ামাসুস্তস্যাস্তু রুদিতস্বনম্ ।। ৭.৪৯.২ ॥
49.3
অদৃষ্টপূর্বা ভগবন্কস্যাপ্যেষা মহাত্মনঃ ।
পত্নী শ্রীরিব সম্মোহাদ্বিরৌতি বিকৃতাননা ।। ৭.৪৯.৩ ॥
49.4
ভগবন্সাধু পশ্য ত্বং দেবতামিব খাচ্চ্যুতাম্ ।
নদ্যাস্তু তীরে ভগবন্বরস্ত্রী কাপি দুঃখিতা ।। ৭.৪৯.৪ ॥
49.5
দৃষ্টাস্মাভিঃ প্ররুদিতা দৃঢং শোকপরায়ণা ।
অনর্হা দুঃখশোকাভ্যামেকাং দীনাং হ্যনাথবৎ ।। ৭.৪৯.৫ ॥
49.6
ন হ্যেনাং মানুষীং বিদ্মঃ সত্ক্রিয়া ঽস্যাঃ প্রয়ুজ্যতাম্ ।
আশ্রমস্যাবিদূরে চ ত্বামিয়ং শরণং গতা ।। ৭.৪৯.৬ ॥
49.7
ত্রাতারমিচ্ছতে সাধ্বী ভগবংস্ত্রাতুমর্হসি ।
তেষাং তু বচনং শ্রুত্বা বুদ্ধ্যা নিশ্চিত্য ধর্মবিৎ ।তপসা লব্ধচক্ষুষ্মান্ প্রাদ্রবদ্যত্র মৈথিলী ।। ৭.৪৯.৭ ॥
49.8
তং প্রয়ান্তমভিপ্রেত্য শিষ্যা হ্যেনং মহামতিম্ ।
তং তু দেশমভি প্রেত্য কিঞ্চিত্পদ্ভ্যাং মহামতিঃ ।। ৭.৪৯.৮ ॥
49.9
অর্ঘ্যমাদায় রুচিরং জাহ্নবীতীরমাগমৎ ।
দদর্শ রাঘবস্যেষ্টাং সীতাং পত্নীমনাথবৎ ।। ৭.৪৯.৯ ।।
49.10
তাং সীতাং শোকভারার্তাং বাল্মীকির্মুনিপুঙ্গবঃ ।
উবাচ মধুরাং বাণীং হ্লাদয়ন্নিব তেজসা ।। ৭.৪৯.১০ ॥
49.11
স্নুষা দশরথস্য ত্বং রামস্য মহিষী প্রিয়া ।
জনকস্য সুতা রাজ্ঞঃ স্বাগতং তে পতিব্রতে ।। ৭.৪৯.১১ ॥
49.12
আয়ান্তী চাসি বিজ্ঞাতা ময়া ধর্মসমাধিনা ।
কারণং চৈব সর্বং মে হৃদয়েনোপলক্ষিতম্ ।। ৭.৪৯.১২ ॥
49.13
তব চৈব মহাভাগে বিদিতং মম তত্ত্বতঃ ।
সর্বং চ বিদিতং মহ্যং ত্রৈলোক্যে যদ্ধি বর্ততে ।। ৭.৪৯.১৩ ॥
49.14
অপাপাং বেদ্মি সীতে ত্বাং তপোলব্ধেন চক্ষুষা ।
বিস্রব্ধা ভব বৈদেহি সাম্প্রতং ময়ি বর্তসে ।। ৭.৪৯.১৪ ॥
49.15
আশ্রমস্যাবিদূরে মে তাপস্যস্তপসি স্থিতাঃ ।
তাস্ত্বাং বত্সে যথা বত্সং পালয়িষ্যন্তি নিত্যশঃ ।। ৭.৪৯.১৫ ॥
49.16
ইদমর্ধ্যং প্রতীচ্ছ ত্বং বিস্রব্ধা বিগতজ্বরা ।
যথা স্বগৃহমভ্যেত্য বিষাদং চৈব মা কৃথাঃ ।। ৭.৪৯.১৬ ॥
49.17
শ্রুত্বা তু ভাষিতং সীতা মুনেঃ পরমমদ্ভুতম্ ।
শিরসা ঽ ঽবন্দ্য চরণৌ তথেত্যাহ কৃতাঞ্জলিঃ ।। ৭.৪৯.১৭ ॥
49.18
তং প্রয়ান্তং মুনিং সীতা প্রাঞ্জলিঃ পৃষ্ঠতো ঽন্বগাৎ ।
। ৭.৪৯.১৮ ॥
49.19
তং দৃষ্ট্বা মুনিমায়ান্তং বৈদেহ্যা মুনিপত্নয়ঃ ।
উপাজগ্মুর্মুদা যুক্তা বচনং চেদমব্রুবন্ ।। ৭.৪৯.১৯ ॥
49.20
স্বাগতং তে মুনিশ্রেষ্ঠ চিরস্যাগমনং চ তে ।
অভিবাদয়ামস্ত্বাং সর্বা উচ্যতাং কি চ কুর্মহে ।। ৭.৪৯.২০ ॥
49.21
তাসাং তদ্বচনং শ্রুত্বা বাল্মীকিরিদমব্রবীৎ ।
সীতেয়ং সমনুপ্রাপ্তা পত্নী রামস্য ধীমতঃ ।। ৭.৪৯.২১ ॥
49.22
স্নুষা দশরথস্যৈষা জনকস্য সুতা সতী ।
অপাপা পতিনা ত্যক্তা পরিপাল্যা ময়া সদা ।। ৭.৪৯.২২ ॥
49.23
ইমাং ভবন্ত্যঃ(?) পশ্যন্তু স্নেহেন পরমেণ হি ।
গৌরবান্মম বাক্যাচ্চ পূজ্যা বো ঽস্তু বিশেষতঃ ।। ৭.৪৯.২৩ ॥
49.24
মুহুর্মুহুশ্চ বৈদেহীং প্রণিধায় মহায়শাঃ ।
স্বমাশ্রমং শিষ্যবৃতঃ পুনরায়ান্মহাতপাঃ ।। ৭.৪৯.২৪ ।।