Utshovসর্গ 48
48.1
লক্ষ্মণস্য বচঃ শ্রুত্বা দারুণং জনকাত্মজা ।
পরং বিষাদমাগম্য বৈদেহী নিপপাত হ ।। ৭.৪৮.১ ॥
48.2
সা মুহূর্তমিবাসঞ্জ্ঞা বাষ্পপর্যাকুলেক্ষণা ।
লক্ষ্মণং দীনয়া বাচা উবাচ জনকাত্মজা ।। ৭.৪৮.২ ॥
48.3
মামিকেয়ং তনুর্নূনং সৃষ্টা দুঃখায় লক্ষ্মণ ।
ধাত্রা যস্যাস্তথা মে ঽদ্য দুঃখমূর্তিঃ প্রদৃশ্যতে ।। ৭.৪৮.৩ ॥
48.4
কিং নু পাপং কৃতং পূর্বং কো বা দারৈর্বিয়োজিতঃ ।
যা ঽহং শুদ্ধসমাচারা ত্যক্তা নৃপতিনা সতী ।। ৭.৪৮.৪ ॥
48.5
পুরা ঽহমাশ্রমে বাসং রামপাদানুবর্তিনী ।
অনুরুধ্যাপি সৌমিত্রে দুঃখে চ পরিবর্তিনী ।। ৭.৪৮.৫ ॥
48.6
সা কথং হ্যাশ্রমে সৌম্য বত্স্যামি বিজনীকৃতা ।
আখ্যাস্যামি চ কস্যাহং দুঃখং দুঃখপরায়ণা ।। ৭.৪৮.৬ ॥
48.7
কিং নু বক্ষ্যামি মুনিষু কর্ম বা সত্কৃতং চ কিম্ ।
কস্মিংশ্চিৎ কারণে ত্যক্তা রাঘবেণ মহাত্মনা ।। ৭.৪৮.৭ ॥
48.8
ন খল্বদ্যৈব সৌমিত্রে জীবিতং জাহ্নবীজলে ।
ত্যজেয়ং রাজবংশস্তু ভর্তুর্মে পরিহাস্যতে ।। ৭.৪৮.৮ ॥
48.9
যথাজ্ঞং কুরু সোমিত্রে ত্যজ মাং দুঃখভাগিনীম্ ।
নিদেশে স্থীয়তাং রাজ্ঞঃ শৃণু চেদং বচো মম ।। ৭.৪৮.৯ ॥
48.10
শ্বশ্রূণামবিশেষেণ প্রাঞ্জলিপ্রগ্রহেণ চ ।
শিরসা ঽ ঽবন্দ্য চরণৌ কুশলং ব্রূহি পার্থিবম্ ।। ৭.৪৮.১০ ॥
48.11
শিরসা ঽভিনতো ব্রূয়াঃ সর্বাসামেব লক্ষ্মণ ।
বক্তব্যশ্চাপি নৃপতির্ধর্মেষু সুসমাহিতঃ ।। ৭.৪৮.১১ ॥
48.12
জানাসি চ যথা শুদ্ধা সীতা তত্ত্বেন রাঘব ।
ভক্ত্যা চ পরয়া যুক্তা হিতা চ তব নিত্যশঃ ।। ৭.৪৮.১২ ॥
48.13
অহং ত্যক্তা ত্বয়া বীর অয়শোভীরুণা জনে ।
যচ্চ তে বচনীয়ং স্যাদপবাদসমুত্থিতম্ ।ময়া চ পরিহর্তব্যং ত্বং হি মে পরমা গতিঃ ।। ৭.৪৮.১৩ ॥
48.14
বক্তব্যশ্চেতি নৃপতির্ধমেণ সুসমাহিতঃ ।
যথা ভ্রাতৃষু বর্তেথাস্তথা পৌরেষু নিত্যদা ।। ৭.৪৮.১৪ ॥
48.15
পরমো হ্যেষ ধর্মস্তে তস্মাত্কীর্তিরনুত্তমা ।
। ৭.৪৮.১৫ ॥
48.16
যত্তু পৌরজনো রাজন্ধর্মেণ সমবাপ্নুয়াৎ ।
অহং তু নানুশোচামি স্বশরীরং নরর্ষভ ।। ৭.৪৮.১৬ ॥
48.17
যথাপবাদং পৌরাণাং তথৈব রঘুনন্দন ।
পতির্হি দেবতা নার্যাঃ পতির্বন্ধুঃ পতির্গুরুঃ ।। ৭.৪৮.১৭ ॥
48.18
প্রাণৈরপি প্রিয়ং তস্মাদ্ভর্তুঃ কার্যং বিশেষতঃ ।
ইতি মদ্বচনাদ্রামো বক্তব্যো মম সঙ্গ্রহঃ ।নিরীক্ষ্য মা ঽদ্য গচ্ছ ত্বমৃতুকালাতিবর্তিনীম্ ।। ৭.৪৮.১৮ ॥
48.19
এবং ব্রুবন্ত্যাং সীতায়াং লক্ষ্মণো দীনচেতনঃ ।
শিরসা ঽ ঽবন্দ্য ধরণীং ব্যাহর্তুং ন শশাক হ ।। ৭.৪৮.১৯ ॥
48.20
প্রদক্ষিণং চ তাং কৃত্বা রুদন্নেব মহাস্বনঃ ।
ধ্যাত্বা মুহূর্তং তামাহ কিং মাং বক্ষ্যসি শোভনে ।। ৭.৪৮.২০ ॥
48.21
দৃষ্টপূর্বং ন তে রূপং পাদৌ দৃষ্টৌ তবানঘে ।
কথমত্র হি পশ্যামি রামেণ রহিতাং বনে ।। ৭.৪৮.২১ ॥
48.22
ইত্যুক্ত্বা তাং নমস্কৃত্য পুনর্নাবমুপারুহৎ ।
আরুহ্য চ পুনর্নাবং নাবিকং চাভ্যচোদয়ৎ ।। ৭.৪৮.২২ ॥
48.23
স গত্বা চোত্তরং তীরং শোকভারসমন্বিতঃ ।
সম্মূঢ ইব দুঃখেন রথমধ্যারুহদ্দ্রুতম্ ।। ৭.৪৮.২৩ ॥
48.24
মুহুর্মুহুঃ পরাবৃত্য দৃষ্ট্বা সীতামনাথবৎ ।
চেষ্টন্তীং পরতীরস্থাং লক্ষ্মণঃ প্রয়য়াবথ ।। ৭.৪৮.২৪ ॥
48.25
দূরস্থং রথমালোক্য লক্ষ্মণং চ মুহূর্মুহুঃ ।
নিরীক্ষমাণাং তূদ্বিগ্নাং সীতাং শোকঃ সমাবিশৎ ।। ৭.৪৮.২৫ ॥
48.26
সা দুঃখভারাবনতা যশস্বিনী যশোধনা নাথমপশ্যতী সতী ।
রুরোদ সা বর্হিণনাদিতে বনে মহাস্বনং দুঃখপরায়ণা সতী ।। ৭.৪৮.২৬ ।।