সর্গ 47

47.1

অথ নাবং সুবিস্তীর্ণাং নৈষাদীং রাঘবানুজঃ ।
আরুরোহ সমায়ুক্তাং পূর্বমারোপ্য মৈথিলীম্ ।। ৭.৪৭.১ ॥

সুমন্ত্রং চৈব সরথং স্থীয়তামিতি লক্ষ্মণঃ ।
উবাচ শোকসন্তপ্তঃ প্রয়াহীতি চ নাবিকম্ ।। ৭.৪৭.২ ॥

ততস্তীরমুপাগম্য ভাগীরথ্যাঃ স লক্ষ্মণঃ ।
উবাচ মৈথিলীং বাক্যং প্রাঞ্জলির্বাষ্পসম্প্লুতঃ ।। ৭.৪৭.৩ ॥

হৃদ্গতং মে মহচ্ছল্যং যস্মাদার্যেণ ধীমতা ।
অস্মিন্নিমিত্তে বৈদেহি লোকস্য বচনীকৃতঃ ।। ৭.৪৭.৪ ॥

শ্রেয়ো হি মরণং মে ঽদ্য মৃত্যুর্বা যত্পরং ভবেৎ ।
ন চাস্মিন্নীদৃশে কার্যে নিয়োজ্যো লোকনিন্দিতে ।। ৭.৪৭.৫ ॥

প্রসীদ চ ন মে পাপং কর্তুমর্হসি শোভনে ।
ইত্যঞ্জলিকৃতো ভূমৌ নিপপাত স লক্ষ্মণঃ ।। ৭.৪৭.৬ ॥

রুদন্তং প্রাঞ্জলিং দৃষ্ট্বা কাঙ্ক্ষন্তং মৃত্যুমাত্মনঃ ।
মৈথিলী ভৃশসংবিগ্না লক্ষ্মণং বাক্যমব্রবীৎ ।। ৭.৪৭.৭ ॥

কিমিদং নাবগচ্ছামি ব্রূহি তত্ত্বেন লক্ষ্মণ ।
পশ্যামি ত্বাং ন চ স্বস্থমপি ক্ষেমং মহীপতেঃ ।। ৭.৪৭.৮ ॥

শাপিতো ঽসি নরেন্দ্রেণ যত্ত্বং সন্তাপমাগতঃ ।
তদ্ব্রূয়াঃ সন্নিধৌ মহ্যমহমাজ্ঞাপয়ামি তে ।। ৭.৪৭.৯ ॥

বৈদেহ্যা চোদ্যমানস্তু লক্ষ্মণো দীনচেতনঃ ।
অবাঙ্মুখো বাষ্পকলং বাক্যমেতদুবাচ হ ।। ৭.৪৭.১০ ॥

শ্রুত্বা পরিষদো মধ্যে হ্যপবাদং সুদারুণম্ ।
পুরে জনপদে চৈব ত্বত্কৃতে জনকাত্মজে ।রামঃ সন্তপ্তহৃদয়ো মা নিবেদ্য গৃহং গতঃ ।। ৭.৪৭.১১ ॥

ন তানি বচনীয়ানি ময়া দেবি তবাগ্রতঃ ।
যানি রাজ্ঞা হৃদি ন্যস্তান্যমর্ষাত্পৃষ্ঠতঃ কৃতঃ ।। ৭.৪৭.১২ ॥

সা ত্বং ত্যক্তা নৃপতিনা নির্দোষা মম সন্নিধৌ ।
পৌরাপবাদভীতেন গ্রাহ্যং দেবি ন তে ঽন্যথা ।। ৭.৪৭.১৩ ॥

আশ্রমান্তেষু চ ময়া ত্যক্তব্যা ত্বং ভবিষ্যসি ।
রাজ্ঞঃ শাসনমাজ্ঞায় তবেদং কিল দৌর্হৃদম্ ।। ৭.৪৭.১৪ ॥

তদেতজ্জাহ্নবীতীরে ব্রহ্মর্ষীণাং তপোবনম্ ।
পুণ্যং চ রমণীয়ং চ মা বিষাদং কৃথাঃ শুভে ।। ৭.৪৭.১৫ ॥

রাজ্ঞো দশরথস্যেষ্টঃ পিতুর্মে মুনিপুঙ্গবঃ ।
সখা পরমকো বিপ্রো বাল্মীকিঃ সুমহায়শাঃ ।। ৭.৪৭.১৬ ॥

পাদচ্ছায়ামুপাগম্য সুখমস্য মহাত্মনঃ ।
উপবাসপরৈকাগ্রা বস ত্বং জনকাত্মজে ।। ৭.৪৭.১৭ ॥

পতিব্রতাত্বমাস্থায় রামং কৃত্বা সদা হৃদি ।
শ্রেয়স্তে পরমং দেবি তথা কৃত্বা ভবিষ্যতি ।। ৭.৪৭.১৮ ।।