Utshovসর্গ 45
45.1
তেষাং সমুপবিষ্টানাং সর্বেষাং দীনচেতসাম্ ।
উবাচ বাক্যং কাকুত্স্থো মুখেন পরিশুষ্যতা ।। ৭.৪৫.১ ॥
45.2
সর্বে শৃণুত ভদ্রং বো মা কুরুধ্বং মনো ঽন্যথা ।
পৌরাণাং মম সীতায়াং যাদৃশী বর্ততে কথা ।। ৭.৪৫.২ ॥
45.3
পৌরাপবাদঃ সুমহাংস্তথা জনপদস্য চ ।
বর্ততে ময়ি বীভত্সা সা মে মর্মাণি কৃন্ততি ।। ৭.৪৫.৩ ॥
45.4
অহং কিল কুলে জাত ইক্ষ্বাকূণাং মহাত্মনাম্ ।
সীতা ঽপি সত্কুলে জাতা জনকানাং মহাত্মনাম্ ।। ৭.৪৫.৪ ॥
45.5
জানাসি ত্বং যথা সৌম্য দণ্ডকে বিজনে বনে ।
রাবণেন হৃতা সীতা স চ বিধ্বংসিতো ময়া ।। ৭.৪৫.৫ ॥
45.6
তত্র মে বুদ্ধিরুত্পন্না জনকস্য সুতাং প্রতি ।
অত্রোষিতামিমাং সীতামানয়েয়ং কথং পুরীম্ ।। ৭.৪৫.৬ ॥
45.7
প্রত্যয়ার্থং ততঃ সীতা বিবেশ জ্বলনং তদা ।
প্রত্যক্ষং তব সৌমিত্রে দেবানাং হব্যবাহনঃ ।অপাপাং মৈথিলীমাহ বায়ুশ্চাকাশগোচরঃ ।। ৭.৪৫.৭ ॥
45.8
চন্দ্রাদিত্যৌ চ শংসেতে সুরাণাং সন্নিধৌ পুরা ।
ঋষীণাং চৈব সর্বেষামপাপাং জনকাত্মজাম্ ।। ৭.৪৫.৮ ॥
45.9
এবং শুদ্ধসমাচারা দেবগন্ধর্বসন্নিধৌ ।
লঙ্কাদ্বীপে মহেন্দ্রেণ মম হস্তে নিবেশিতা ।। ৭.৪৫.৯ ॥
45.10
অন্তরাত্মা চ মে বেত্তি সীতাং শুদ্ধাং যশস্বিনীম্ ।
ততো গৃহীত্বা বৈদেহীময়োধ্যামহমাগতঃ ।। ৭.৪৫.১০ ॥
45.11
অয়ং তু মে মহান্বাদঃ শোকশ্চ হৃদি বর্ততে ।
পৌরাপবাদঃ সুমহাংস্তথা জনপদস্য চ ।। ৭.৪৫.১১ ॥
45.12
অকীর্তির্যস্য গীয়েত লোকে ভূতস্য কস্যচিৎ ।
পতত্যেবাধমাঁল্লোকান্যাবচ্ছব্দঃ প্রকীর্ত্যতে ।। ৭.৪৫.১২ ॥
45.13
অকীর্তির্নিন্দ্যতে দেবৈঃ কীর্তির্লোকেষু পূজ্যতে ।
কীর্ত্যর্থং তু সমারম্ভঃ সর্বেষাং সুমহাত্মনাম্ ।। ৭.৪৫.১৩ ॥
45.14
অপ্যহং জীবিতং জহ্যাং যুষ্মান্বা পুরুষর্ষভাঃ ।
অপবাদভয়াদ্ভীতঃ কিং পুনর্জনকাত্মজাম্ ।। ৭.৪৫.১৪ ॥
45.15
তস্মাদ্ভবন্তঃ পশ্যন্তু পতিতং শোকসাগরে ।
নহি পশ্যাম্যহং ভূতং কিঞ্চিদ্দুঃখমতো ঽধিকম্ ।। ৭.৪৫.১৫ ॥
45.16
শ্বস্ত্বং প্রভাতে সৌমিত্রে সুমন্ত্রাধিষ্ঠিতং রথম্ ।
আরুহ্য সীতামারোপ্য বিষয়ান্তে সমুত্সৃজ ।। ৭.৪৫.১৬ ॥
45.17
গঙ্গায়াস্তু পরে পারে বাল্মীকেস্তু মহাত্মনঃ ।
আশ্রমো দিব্যসঙ্কাশস্তমসাতীরমাশ্রিতঃ ।। ৭.৪৫.১৭ ॥
45.18
তত্রৈনাং বিজনে দেশে বিসৃজ্য রঘুনন্দন ।
শীঘ্রমাগচ্ছ ভদ্রং তে কুরুষ্ব বচনং মম ।। ৭.৪৫.১৮ ॥
45.19
ন চাস্মিন্ প্রতিবক্তব্যঃ সীতাং প্রতি কথঞ্চন ।
তস্মাত্ত্বং গচ্ছ সৌমিত্রে নাত্র কার্যা বিচারণা ।। ৭.৪৫.১৯ ॥
45.20
অপ্রীতির্হি পরা মহ্যং ত্বয়েতত্প্রতিবারিতে ।
শাপিতা হি ময়া যূয়ং ভুজাভ্যাং জীবিতেন চ ।। ৭.৪৫.২০ ॥
45.21
যে মাং বাক্যান্তরে ব্রূয়ুরনুনেতুং কথঞ্চন ।
অহিতা নাম তে নিত্যং মদভীষ্টবিঘাতনাৎ ।। ৭.৪৫.২১ ॥
45.22
মানয়ন্তু ভবন্তো মাং যদি মচ্ছাসনে স্থিতাঃ ।
ইতো ঽদ্য নীয়তাং সীতা কুরুষ্ব বচনং মম ।। ৭.৪৫.২২ ॥
45.23
পূর্বমুক্তো ঽহমনয়া গঙ্গাতীরে ঽহমাশ্রমান্ ।
পশ্যেয়মিতি তস্যাশ্চ কামঃ সংবর্ত্যতাময়ম্ ।। ৭.৪৫.২৩ ॥
45.24
এবমুক্ত্বা তু কাকুত্স্থো বাষ্পেণ পিহিতাননঃ ।
প্রবিবেশ স ধর্মাত্মা ভ্রাতৃভিঃ পরিবারিতঃ ।। ৭.৪৫.২৪ ॥
45.25
শোকসংলগ্নহৃদয়ো নিশশ্বাস যথা দ্বিপঃ ।
। ৭.৪৫.২৫ ।।