সর্গ 44

44.1

বিসৃজ্য তু সুহৃদ্বর্গং বুদ্ধ্যা নিশ্চিত্য রাঘবঃ ।
সমীপে দ্বাঃস্থমাসীনমিদং বচনমব্রবীৎ ।। ৭.৪৪.১ ॥

শীঘ্রমানয় সৌমিত্রিং লক্ষ্মণং শুভলক্ষণম্ ।
ভরতং চ মহাভাগং শত্রুঘ্নমপরাজিতম্ ।। ৭.৪৪.২ ॥

রামস্য বচনং শ্রুত্বা দ্বাঃস্থো মূর্ধ্নি কৃতাঞ্জলিঃ ।
লক্ষ্মণস্য গৃহং গত্বা প্রবিবেশানিবারিতঃ ।। ৭.৪৪.৩ ॥

উবাচ সুমহাত্মানং বর্ধয়িত্বা কৃতাঞ্জলিঃ ।
দ্রষ্টুমিচ্ছতি রাজা ত্বাং গম্যতাং তত্র মা চিরম্ ।। ৭.৪৪.৪ ॥

বাঢমিত্যেব সৌমিত্রিঃ শ্রুত্বা রাঘবশাসনম্ ।
প্রাদ্রবদ্রথমারুহ্য রাঘবস্য নিবেশনম্ ।। ৭.৪৪.৫ ॥

প্রয়ান্তং লক্ষ্মণং দৃষ্ট্বা দ্বাঃস্থো ভরতমন্তিকাৎ ।
উবাচ ভরতং তত্র বর্ধয়িত্বা কৃতাঞ্জলিঃ ।। ৭.৪৪.৬ ॥

বিনয়াবনতো ভূত্বা রাজা ত্বাং দ্রষ্টুমিচ্ছতি ।
ভরতস্তু বচঃশ্রুত্বা দ্বাঃস্থাদ্রামসমীরিতম্ ।। ৭.৪৪.৭ ॥

উত্পপাতাসনাত্তূর্ণং পদ্ভ্যামেব যয়ৌ বলী ।
দৃষ্ট্বা প্রয়ান্তং ভরতং ত্বরমাণঃ কৃতাঞ্জলিঃ ।। ৭.৪৪.৮ ॥

শত্রুঘ্নভবনং গত্বা ততো বাক্যমুবাচ হ ।
এহ্যাগচ্ছ রঘুশ্রেষ্ঠ রাজা ত্বাং দ্রষ্টুমিচ্ছতি ।। ৭.৪৪.৯ ॥

গতো হি লক্ষ্মণঃ পূর্বং ভরতশ্চ মহায়শাঃ ।
শ্রুত্বা তু বচনং তস্য শত্রুঘ্নঃ পরমাসনাৎ ।। ৭.৪৪.১০ ॥

শিরসা ধরণীং প্রাপ্য প্রয়য়ৌ যত্র রাঘবঃ ।
দ্বাঃস্থস্ত্বাগম্য রামায় সর্বানেব কৃতাঞ্জলিঃ ।নিবেদয়ামাস তদা ভ্রাতঽন্স্বান্সমুপস্থিতান্ ।। ৭.৪৪.১১ ॥

কুমারানাগতাঞ্ছ্রুত্বা চিন্তাব্যাকুলিতেন্দ্রিয়ঃ ।
অবাঙ্মুখো দীনমনা দ্বাঃস্থং বচনমব্রবীৎ ।। ৭.৪৪.১২ ॥

প্রবেশয় কুমারাংস্ত্বং মত্সমীপং ত্বরান্বিতঃ ।
এতেষু জীবিতং মহ্যমেতে প্রাণাঃ প্রিয়া মম ।। ৭.৪৪.১৩ ॥

আজ্ঞপ্তাস্তু নরেন্দ্রেণ কুমারাঃ শক্রতেজসঃ ।
প্রহ্বাঃ প্রাঞ্জলয়ো ভূত্বা বিবিশুস্তে সমাহিতাঃ ।। ৭.৪৪.১৪ ॥

তে তু দৃষ্ট্বা মুখং তস্য সগ্রহং শশিনং যথা ।
সন্ধ্যাগতমিবাদিত্যং প্রভয়া পরিবর্জিতম্ ।। ৭.৪৪.১৫ ॥

বাষ্পপূর্ণে চ নয়নে দৃষ্ট্বা রামস্য ধীমতঃ ।
হতশোভং যথা পদ্মং মুখং বীক্ষ্য চ তস্য তে ।। ৭.৪৪.১৬ ॥

ততো ঽভিবাদ্য ত্বরিতাঃ পাদৌ রামস্য মূর্ধভিঃ ।
তস্থুঃ সমাহিতাঃ সর্বে রামস্ত্বশ্রূণ্যবর্তয়ৎ ।। ৭.৪৪.১৭ ॥

তান্পরিষ্বজ্য বাহুভ্যামুত্থাপ্য চ মহাবলঃ ।
আসনেষ্বাসতেত্যুক্ত্বা ততো বাক্যং জগাদ হ ।। ৭.৪৪.১৮ ॥

ভবন্তো মম সর্বস্বং ভবন্তো জীবিতং মম ।
ভবদ্ভিশ্চ কৃতং রাজ্যং পালয়ামি নরেশ্বরাঃ ।। ৭.৪৪.১৯ ॥

ভবন্তঃ কৃতশাস্ত্রার্থা বুদ্ধ্যা চ পরিনিষ্ঠিতাঃ ।
সম্ভূয় চ মদর্থো ঽয়মন্বেষ্টব্যো নরেশ্বরাঃ ।। ৭.৪৪.২০ ॥

তথা বদতি কাকুত্স্থে অবধানপরায়ণাঃ ।
উদ্বিগ্নমনসঃ সর্বে কিং নু রাজাভিধাস্যতি ।। ৭.৪৪.২১ ।।