সর্গ 43

43.1

তত্রোপবিষ্টং রাজানমুপাসন্তে বিচক্ষণাঃ ।
কথানাং বহুরূপাণাং হাস্যকারাঃ সমন্ততঃ ।। ৭.৪৩.১ ॥

বিজয়ো মধুমত্তশ্চ কাশ্যপো মঙ্গলঃ কুটঃ ।
সুরাজঃ কালিয়ো ভদ্রো দন্তবক্রঃ সুমাগধঃ ।। ৭.৪৩.২ ॥

এতে কথা বহুবিধাঃ পরিহাসসমন্বিতাঃ ।
কথয়ন্তি স্ম সংহৃষ্টা রাঘবস্য মহাত্মনঃ ।। ৭.৪৩.৩ ॥

ততঃ কথায়াং কস্যাঞ্চিদ্রাঘবঃ সমভাষত ।
কাঃ কথা নগরে ভদ্র বর্তন্তে বিষয়েষু চ ।। ৭.৪৩.৪ ॥

মামাশ্রিতানি কান্যাহুঃ পৌরজানপদা জনাঃ ।
কিং চ সীতাং সমাশ্রিত্য ভরতং কিং চ লক্ষ্মণম্ ।। ৭.৪৩.৫ ॥

কিং নু শত্রুঘ্নমুদ্দিশ্য কৈকয়ীং কিং নু মাতরম্ ।
বক্তব্যতাং চ রাজানো বরে রাজ্যে ব্রজন্তি চ ।। ৭.৪৩.৬ ॥

এবমুক্তে তু রামেণ ভদ্রঃ প্রাঞ্জলিরব্রবীৎ ।
স্থিতাঃ কথা শুভাঃ রাজন্বর্তন্তে পুরবাসিনাম্ ।। ৭.৪৩.৭ ॥

অমুং তু বিজয়ং সৌম্য দশগ্রীববধার্জিতম্ ।
ভূয়িষ্ঠং স্বপুরে পৌরৈঃ কথ্যন্তে পুরুষর্ষভ ।। ৭.৪৩.৮ ॥

এবমুক্তস্তু ভদ্রেণ রাঘবো বাক্যমব্রবীৎ ।
কথয়স্ব যথাতত্ত্বং সর্বং নিরবশেষতঃ ।। ৭.৪৩.৯ ॥

শুভাশুভানি বাক্যানি যান্যাহুঃ পুরবাসিনঃ ।
শ্রুত্বেদানীং শুভং কুর্যাং নকুর্যামশুভানি চ ।। ৭.৪৩.১০ ॥

কথয়স্ব চ বিস্রব্ধো নির্ভয়ং বিগতজ্বরঃ ।
কথয়ন্তি যথা পৌরাঃ পাপা জনপদেষু চ ।। ৭.৪৩.১১ ॥

রাঘবেণৈবমুক্তস্তু ভদ্রঃ সুরুচিরং বচঃ ।
প্রত্যুবাচ মহাবাহুং প্রাঞ্জলিঃ সুসমাহিতঃ ।। ৭.৪৩.১২ ॥

শৃণু রাজন্যথা পৌরাঃ কথয়ন্তি শুভাশুভম্ ।
চত্বরাপণরথ্যাসু বনেষূপবনেষু চ ।। ৭.৪৩.১৩ ॥

দুষ্করং কৃতবান্রামঃ সমুদ্রে সেতুবন্ধনম্ ।
অশ্রুতং পূর্বকৈঃ কৈশ্চিদ্দেবৈরপি সদানবৈঃ ।। ৭.৪৩.১৪ ॥

রাবণশ্চ দুরাধর্ষো হতঃ সবলবাহনঃ ।
বানরাশ্চ বশং নীতা ঋক্ষাশ্চ সহ রাক্ষসৈঃ ।। ৭.৪৩.১৫ ॥

হত্বা চ রাবণং সঙ্খ্যে সীতামাহৃত্য রাঘবঃ ।
অমর্ষং পৃষ্ঠতঃ কৃত্বা স্ববেশ্ম পুনরানয়ৎ ।। ৭.৪৩.১৬ ॥

কীদৃশং হৃদয়ে তস্য সীতাসম্ভোগজং সুখম্ ।
অঙ্কমারোপ্য তু পুরা রাবণেন বলাদ্ধৃতাম্ ।। ৭.৪৩.১৭ ॥

লঙ্কামপি পুরা নীতামশোকবনিকাং গতাম্ ।
রক্ষসাং বশমাপন্নাং কথং রামো ন কুত্সতে ।। ৭.৪৩.১৮ ॥

অস্মাকমপি দারেষু সহনীয়ং ভবিষ্যতি ।
যথা হি কুরুতে রাজা প্রজা তমনুবর্ততে ।। ৭.৪৩.১৯ ॥

এবং বহুবিধা বাচো বদন্তি পুরবাসিনঃ ।
নগরেষু চ সর্বেষু রাজঞ্জনপদেষু চ ।। ৭.৪৩.২০ ॥

তস্যৈবং ভাষিতং শ্রুত্বা রাঘবঃ পরমার্তবৎ ।
উবাচ সুহৃদঃ সর্বান্কথমেতদ্ব্রবীথ মাম্ ।। ৭.৪৩.২১ ॥

সর্বে তু শিরসা ভূমাবভিবাদ্য প্রণম্য চ ।
প্রত্যূচূ রাঘবং দীনমেবমেতন্ন সংশয়ঃ ।। ৭.৪৩.২২ ॥

শ্রুত্বা তু বাক্যং কাকুত্স্থঃ সর্বেষাং সমুদীরিতম্ ।
বিসর্জয়ামাস তদা বয়স্যাঞ্ছত্রুসূদনঃ ।। ৭.৪৩.২৩ ।।