Utshovসর্গ 42
42.1
স বিসৃজ্য ততো রামঃ পুষ্পকং হেমভূষিতম্ ।
প্রবিবেশ মহাবাহুরশোকবনিকাং তদা ।। ৭.৪২.১ ॥
42.2
চন্দনাগুরুচূতৈশ্চ তুঙ্গকালেয়কৈরপি ।
দেবদারুবনৈশ্চাপি সমন্তাদুপশোভিতাম্ ।। ৭.৪২.২ ॥
42.3
চম্পকাশোকপুন্নাগমধূকপনসাসনৈঃ ।
শোভিতাং পারিজাতৈশ্চ বিধূমজ্বলনপ্রভৈঃ ।। ৭.৪২.৩ ॥
42.4
লোধ্রনীপার্জুনৈর্নাগৈঃ সপ্তপর্ণাতিমুক্তকৈঃ ।
মন্দারকদলীগুল্মলতাজালসমাবৃতাম্ ।। ৭.৪২.৪ ॥
42.5
প্রিয়ঙ্গুভিঃ কদম্বৈশ্চ তথা চ বকুলৈরপি ।
জম্বূভির্দাডিমৈশ্চৈব কোবিদারৈশ্চ শোভিতাম্ ।। ৭.৪২.৫ ॥
42.6
সর্বদা কুসুমৈ রম্যৈঃ ফলবদ্ভির্মনোরমৈঃ ।
দিব্যগন্ধরসোপেতৈস্তরুণাঙ্কুরপল্লবৈঃ ।। ৭.৪২.৬ ॥
42.7
তথৈব তরুভির্দিব্যৈঃ শিল্পিভিঃ পরিকল্পিতৈঃ ।
চারুপল্লবপুষ্পাঢ্যৈর্মত্তভ্রমরসঙ্কুলৈঃ ।। ৭.৪২.৭ ॥
42.8
কোকিলৈর্ভৃঙ্গরাজৈশ্চ নানাবর্ণৈশ্চ পক্ষিভিঃ ।
শোভিতাং শতশশ্চিত্রাং চূতবৃক্ষাবতংসকৈঃ ।। ৭.৪২.৮ ॥
42.9
শাতকুম্ভনিভাঃ কেচিত্কেচিদগ্নিশিখোপমাঃ ।
নীলাঞ্জননিভাশ্চান্যে ভান্তি তত্রত্যপাদপাঃ ।। ৭.৪২.৯ ॥
42.10
সুরভীণি চ পুষ্পাণি মাল্যানি বিবিধানি চ ।
দীর্ঘিকা বিবিধাকারাঃ পূর্ণাঃ পরমবারিণা ।। ৭.৪২.১০ ॥
42.11
মাণিক্যকৃতসোপানাঃ স্ফাটিকান্তরকুট্টিমাঃ ।
ফুল্লপদ্মোত্পলবনাশ্চক্রবাকোপশোভিতাঃ ।। ৭.৪২.১১ ॥
42.12
দাত্যূহশুকসঙ্ঘুষ্টা হংসসারসনাদিতাঃ ।
তরুভিঃ পুষ্পবদ্ভিশ্চ তীরজৈরুপশোভিতাঃ ।। ৭.৪২.১২ ॥
42.13
প্রাকারৈর্বিবিধাকারৈঃ শোভিতাশ্চ শিলাতলৈঃ ।
তত্রৈব চ বনোদ্দেশে বৈডূর্যমণিসন্নিভৈঃ ।। ৭.৪২.১৩ ॥
42.14
শাদ্বলৈঃ পরমোপেতাং পুষ্পিতদ্রুমকাননাম্ ।
তত্র সঙ্ঘর্ষজাতানাং বৃক্ষাণাং পুষ্পশালিনাম্ ।। ৭.৪২.১৪ ॥
42.15
প্রস্তরাঃ পুষ্পশবলা নভস্তারাগণৈরিব ।
নন্দনং হি যথেন্দ্রস্য ব্রাহ্মং চৈত্ররথং যথা ।তথাভূতং হি রামস্য কাননং সন্নিবেশনম্ ।। ৭.৪২.১৫ ॥
42.16
বহ্বাসনগৃহোপেতাং লতাগৃহসমাবৃতাম্ ।
অশোকবনিকাং স্ফীতাং প্রবিশ্য রঘুনন্দনঃ ।। ৭.৪২.১৬ ॥
42.17
আসনে চ শুভাকারে পুষ্পপ্রকরভূষিতে ।
কুশাস্তরণসংস্তীর্ণে রামঃ সন্নিষসাদ হ ।। ৭.৪২.১৭ ॥
42.18
সীতামাদায়ং হস্তেন মধুমৈরেয়কং শুচি ।
পায়য়ামাস কাকুত্স্থঃ শচীমিব পুরন্দরঃ ।। ৭.৪২.১৮ ॥
42.19
মাংসানি চ সমৃষ্টানি ফলানি বিবিধানি চ ।
রামস্যাভ্যবহারার্থং কিঙ্করাস্তূর্ণমাহরন্ ।। ৭.৪২.১৯ ॥
42.20
উপানৃত্যংশ্চ রাজানং নৃত্যগীতবিশারদাঃ ।
বালাশ্চ রূপবত্যশ্চ স্ত্রিয়ঃ পানবশানুগাঃ ।। ৭.৪২.২০ ॥
42.21
মনোভিরামা রামাস্তা রামো রময়তাং বরঃ ।
রময়ামাস ধর্মাত্মা নিত্যং পরমভূষিতঃ ।। ৭.৪২.২১ ॥
42.22
স তয়া সীতয়া সার্ধমাসীনো বিররাজ হ ।
অরুন্ধত্যা সহাসীনো বসিষ্ঠ ইব তেজসা ।। ৭.৪২.২২ ॥
42.23
এবং রামো মুদা যুক্তঃ সীতাং সুরসুতোপমাম্ ।
রময়ামাস বৈদেহীমহন্যহনি দেববৎ ।। ৭.৪২.২৩ ॥
42.24
তথা তয়োর্বিহরতোঃ সীতারাঘবয়োশ্চিরম্ ।
অত্যক্রামচ্ছুভঃ কালঃ শৈশিরো ভোগদঃ সদা ।। ৭.৪২.২৪ ॥
42.25
দশবর্ষসহস্রাণি গতানি সুমহাত্মনোঃ ।
প্রাপ্তয়োর্বিবিধান্ভোগানতীতঃ শিশিরাগমঃ ।। ৭.৪২.২৫ ॥
42.26
পূর্বাহ্ণে ধর্মকার্যাণি কৃত্বা ধর্মেণ ধর্মবিৎ ।
শেষং দিবসভাগার্ধমন্তঃপুরগতো ঽভবৎ ।। ৭.৪২.২৬ ॥
42.27
সীতাপি দেবকার্যাণি কৃত্বা পৌর্বাহ্ণিকানি বৈ ।
শ্বশ্রূণামকরোত্পূজাং সর্বাসামবিশেষতঃ ।। ৭.৪২.২৭ ॥
42.28
অভ্যগচ্ছত্ততো রামং বিচিত্রাভরণাম্বরা ।
ত্রিবিষ্টপে সহস্রাক্ষমুপবিষ্টং যথা শচী ।। ৭.৪২.২৮ ॥
42.29
দৃষ্ট্বা তু রাঘবঃ পত্নীং কল্যাণেন সমন্বিতাম্ ।
প্রহর্ষমতুলং লেভে সাধু সাধ্বিতি চাব্রবীৎ ।। ৭.৪২.২৯ ॥
42.30
অব্রবীচ্চ বরারোহাং সীতাং সুরসুতোপমাম্ ।
অপত্যলাভো বৈদেহি ত্বয়ি মে সমুপস্থিতঃ ।। ৭.৪২.৩০ ॥
42.31
কিমিচ্ছসি বরারোহে কামঃ কিং ক্রিয়তাং তব ।
। ৭.৪২.৩১ ॥
42.32
স্মিতং কৃত্বা তু বৈদেহী রামং বাক্যমথাব্রবীৎ ।
তপোবনানি পুণ্যানি দ্রষ্টুমিচ্ছামি রাঘব ।। ৭.৪২.৩২ ॥
42.33
গঙ্গাতীরোপবিষ্টানামৃষীণামুগ্রতেজসাম্ ।
ফলমূলাশিনাং দেব পাদমূলেষু বর্তিতুম্ ।। ৭.৪২.৩৩ ॥
42.34
এষ মে পরমঃ কামো যন্মূলফলভোজিনাম্ ।
অপ্যেকরাত্রং কাকুত্স্থ নিবসেয়ং তপোবনে ।। ৭.৪২.৩৪ ॥
42.35
তথেতি চ প্রতিজ্ঞাতং রামেণাক্লিষ্টকর্মণা ।
বিস্রব্ধা ভব বৈদেহি শ্বো গমিষ্যস্যসংশয়ম্ ।। ৭.৪২.৩৫ ॥
42.36
এবমুক্ত্বা তু কাকুত্স্থো মৈথিলীং জনকাত্মজাম্ ।
মধ্যকক্ষান্তরং রামো নির্জগাম সুহৃদ্বৃতঃ ।। ৭.৪২.৩৬ ।।