সর্গ 41

41.1

বিসৃজ্য চ মহাবাহুর্ঋক্ষবানররাক্ষসান্ ।
ভ্রাতৃভিঃ সহিতো রামঃ প্রমুমোদ সুখং সুখী ।। ৭.৪১.১ ॥

অথাপরাহ্ণসময়ে ভ্রাতৃভিঃ সহ রাঘবঃ ।
শুশ্রাব মধুরাং বাণীমন্তরিক্ষাৎ প্রভাষিতাম্ ।। ৭.৪১.২ ॥

সৌম্য রাম নিরীক্ষস্ব সৌম্যেন বদনেন মাম্ ।
কুবেরভবনাত্প্রাপ্তং বিদ্ধি মাং পুষ্পকং প্রভো ।। ৭.৪১.৩ ॥

তব শাসনমাজ্ঞায় গতো ঽস্মি ভবনং প্রতি ।
উপস্থাতুং নরশ্রেষ্ঠ স চ মাং প্রত্যভাষত ।। ৭.৪১.৪ ॥

নির্জিতস্ত্বং নরেন্দ্রেণ রাঘবেণ মহাত্মনা ।
নিহত্য যুধি দুর্ধর্ষং রাবণং রাক্ষসেশ্বরম্ ।। ৭.৪১.৫ ॥

মমাপি পরমা প্রীতর্হতে তস্মিন্দুরাত্মনি ।
রাবণে সগণে চৈব সপুত্রে সহবান্ধবে ।। ৭.৪১.৬ ॥

স ত্বং রামেণ লঙ্কায়াং নির্জিতঃ পরমাত্মনা ।
বহ সৌম্য তমেব ত্বমহমাজ্ঞাপয়ামি তে ।। ৭.৪১.৭ ॥

পরমো হ্যেষ মে কামো যত্ত্বং রাঘবনন্দনম্ ।
বহের্লোকস্য সংয়ানং গচ্ছস্ব বিগতজ্বরঃ ।। ৭.৪১.৮ ॥

সো ঽহং শাসনমাজ্ঞায় ধনদস্য মহাত্মনঃ ।
ত্বত্সকাশমনুপ্রাপ্তো নির্বিশঙ্কঃ প্রতীক্ষ মাম্ ।। ৭.৪১.৯ ॥

অদৃষ্যঃ সর্বভূতানাং সর্বেষাং ধনদাজ্ঞয়া ।
চরাম্যহং প্রভাবেণ তবাজ্ঞাং পরিপালয়ন্ ।। ৭.৪১.১০ ॥

এবমুক্তস্তদা রামঃ পুষ্পকেণ মহাবলঃ ।
উবাচ পুষ্পকং দৃষ্ট্বা বিমানং পুনরাগতম্ ।। ৭.৪১.১১ ॥

যদ্যেবং স্বাগতং তে ঽস্তু বিমানবর পুষ্পক ।
আনুকূল্যাদ্ধনেশস্য বৃত্তদোষো ন নো ভবেৎ ।। ৭.৪১.১২ ॥

লাজৈশ্চৈব তথা পুষ্পৈর্ধূপৈশ্চৈব সুগন্ধিভিঃ ।
পূজয়িত্বা মহাবাহূ রাঘবঃ পুষ্পকং তদা ।। ৭.৪১.১৩ ॥

গম্যতামিতি চোবাচ আগচ্ছ ত্বং স্মরে যদা ।
সিদ্ধানাং চ গতৌ সৌম্য মা বিষাদেন যোজয় ।প্রতিঘাতশ্চ তে মা ভূদ্যথেষ্টং গচ্ছতো দিশঃ ।। ৭.৪১.১৪ ॥

এবমস্ত্বিতি রামেণ পূজয়িত্বা বিসর্জিতম্ ।
অভিপ্রেতাং দিশং তস্মাত্প্রায়াত্তত্পুষ্পকং তদা ।। ৭.৪১.১৫ ॥

এবমন্তর্হিতে তস্মিন্পুষ্পকে সুকৃতাত্মনি ।
ভরতঃ প্রাঞ্জলির্বাক্যমুবাচ রঘুনন্দনম্ ।। ৭.৪১.১৬ ॥

বিবিধাত্মনি দৃশ্যন্তে ত্বয়ি বীর প্রশাসতি ।
অমানুষাণাং সত্ত্বানাং ব্যাহৃতানি মুহুর্মুহুঃ ।। ৭.৪১.১৭ ॥

অনাময়শ্চ সত্বানাং সাগ্রো মাসো গতো হ্যয়ম্ ।
জীর্ণানামপি সত্ত্বানাং মৃত্যুর্নায়াতি রাঘব ।। ৭.৪১.১৮ ॥

অরোগপ্রসবা নার্যো বপুষ্মন্তো হি মানবাঃ ।
হর্ষশ্চাভ্যধিকো রাজঞ্জনস্য পুরবাসিনঃ ।। ৭.৪১.১৯ ॥

কালে বর্ষতি পর্জন্যঃ পাতয়ন্নমৃতং পয়ঃ ।
বাতাশ্চাপি প্রবান্ত্যেতে স্পর্শয়ুক্তাঃ সুখাঃ শিবাঃ ।। ৭.৪১.২০ ॥

ঈদৃশো ঽনশ্বরো রাজা ভবেদিতি নরেশ্বরঃ ।
কথয়ন্তি পুরে রাজন্পৌরজানপদাস্তথা ।। ৭.৪১.২১ ॥

এতা বাচঃ সুমধুরা ভরতেন সমীরিতাঃ ।
শ্রুত্বা রামো মুদা যুক্তো বভূব নৃপসত্তমঃ ।। ৭.৪১.২২ ।।