UtshovSarga 41
41.1
विसृज्य च महाबाहुर्ऋक्षवानरराक्षसान् ।
भ्रातृभिः सहितो रामः प्रमुमोद सुखं सुखी ।। ७.४१.१ ॥
Visrijya cha mahabahurrikshavanararakshasan
Bhratribhih sahito ramah pramumoda sukham sukhi
41.2
अथापराह्णसमये भ्रातृभिः सह राघवः ।
शुश्राव मधुरां वाणीमन्तरिक्षात् प्रभाषिताम् ।। ७.४१.२ ॥
Athaparahnasamaye bhratribhih saha raghavah
Shushrava madhuram vanimantarikshat prabhashitam
41.3
सौम्य राम निरीक्षस्व सौम्येन वदनेन माम् ।
कुबेरभवनात्प्राप्तं विद्धि मां पुष्पकं प्रभो ।। ७.४१.३ ॥
Saumya rama nirikshasva saumyena vadanena mam
Kuberabhavanatpraptam viddhi mam pushpakam prabho
41.4
तव शासनमाज्ञाय गतो ऽस्मि भवनं प्रति ।
उपस्थातुं नरश्रेष्ठ स च मां प्रत्यभाषत ।। ७.४१.४ ॥
Tava shasanamagyaya gato smi bhavanam prati
Upasthatum narashreshtha sa cha mam pratyabhashata
41.5
निर्जितस्त्वं नरेन्द्रेण राघवेण महात्मना ।
निहत्य युधि दुर्धर्षं रावणं राक्षसेश्वरम् ।। ७.४१.५ ॥
Nirjitastvam narendrena raghavena mahatmana
Nihatya yudhi durdharsham ravanam rakshaseshvaram
41.6
ममापि परमा प्रीतर्हते तस्मिन्दुरात्मनि ।
रावणे सगणे चैव सपुत्रे सहबान्धवे ।। ७.४१.६ ॥
Mamapi parama pritarhate tasminduratmani
Ravane sagane chaiva saputre sahabandhave
41.7
स त्वं रामेण लङ्कायां निर्जितः परमात्मना ।
वह सौम्य तमेव त्वमहमाज्ञापयामि ते ।। ७.४१.७ ॥
Sa tvam ramena lankayam nirjitah paramatmana
Vaha saumya tameva tvamahamagyapayami te
41.8
परमो ह्येष मे कामो यत्त्वं राघवनन्दनम् ।
वहेर्लोकस्य संयानं गच्छस्व विगतज्वरः ।। ७.४१.८ ॥
Paramo hyesha me kamo yattvam raghavanandanam
Vaherlokasya sanyanam gachchhasva vigatajvarah
41.9
सो ऽहं शासनमाज्ञाय धनदस्य महात्मनः ।
त्वत्सकाशमनुप्राप्तो निर्विशङ्कः प्रतीक्ष माम् ।। ७.४१.९ ॥
So ham shasanamagyaya dhanadasya mahatmanah
Tvatsakashamanuprapto nirvishankah pratiksha mam
41.10
अदृष्यः सर्वभूतानां सर्वेषां धनदाज्ञया ।
चराम्यहं प्रभावेण तवाज्ञां परिपालयन् ।। ७.४१.१० ॥
Adrishyah sarvabhutanam sarvesham dhanadagyaya
Charamyaham prabhavena tavagyam paripalayan
41.11
एवमुक्तस्तदा रामः पुष्पकेण महाबलः ।
उवाच पुष्पकं दृष्ट्वा विमानं पुनरागतम् ।। ७.४१.११ ॥
Evamuktastada ramah pushpakena mahabalah
Uvacha pushpakam drishtva vimanam punaragatam
41.12
यद्येवं स्वागतं ते ऽस्तु विमानवर पुष्पक ।
आनुकूल्याद्धनेशस्य वृत्तदोषो न नो भवेत् ।। ७.४१.१२ ॥
Yadyevam svagatam te stu vimanavara pushpaka
Anukulyaddhaneshasya vrittadosho na no bhavet
41.13
लाजैश्चैव तथा पुष्पैर्धूपैश्चैव सुगन्धिभिः ।
पूजयित्वा महाबाहू राघवः पुष्पकं तदा ।। ७.४१.१३ ॥
Lajaishchaiva tatha pushpairdhupaishchaiva sugandhibhih
Pujayitva mahabahu raghavah pushpakam tada
41.14
गम्यतामिति चोवाच आगच्छ त्वं स्मरे यदा ।
सिद्धानां च गतौ सौम्य मा विषादेन योजय ।प्रतिघातश्च ते मा भूद्यथेष्टं गच्छतो दिशः ।। ७.४१.१४ ॥
Gamyatamiti chovacha agachchha tvam smare yada
Siddhanam cha gatau saumya ma vishadena yojaya, pratighatashcha te ma bhudyatheshtam gachchhato dishah
41.15
एवमस्त्विति रामेण पूजयित्वा विसर्जितम् ।
अभिप्रेतां दिशं तस्मात्प्रायात्तत्पुष्पकं तदा ।। ७.४१.१५ ॥
Evamastviti ramena pujayitva visarjitam
Abhipretam disham tasmatprayattatpushpakam tada
41.16
एवमन्तर्हिते तस्मिन्पुष्पके सुकृतात्मनि ।
भरतः प्राञ्जलिर्वाक्यमुवाच रघुनन्दनम् ।। ७.४१.१६ ॥
Evamantarhite tasminpushpake sukritatmani
Bharatah pranjalirvakyamuvacha raghunandanam
41.17
विविधात्मनि दृश्यन्ते त्वयि वीर प्रशासति ।
अमानुषाणां सत्त्वानां व्याहृतानि मुहुर्मुहुः ।। ७.४१.१७ ॥
Vividhatmani drishyante tvayi vira prashasati
Amanushanam sattvanam vyahritani muhurmuhuh
41.18
अनामयश्च सत्वानां साग्रो मासो गतो ह्ययम् ।
जीर्णानामपि सत्त्वानां मृत्युर्नायाति राघव ।। ७.४१.१८ ॥
Anamayashcha satvanam sagro maso gato hyayam
Jirnanamapi sattvanam mrityurnayati raghava
41.19
अरोगप्रसवा नार्यो वपुष्मन्तो हि मानवाः ।
हर्षश्चाभ्यधिको राजञ्जनस्य पुरवासिनः ।। ७.४१.१९ ॥
Arogaprasava naryo vapushmanto hi manavah
Harshashchabhyadhiko rajanjanasya puravasinah
41.20
काले वर्षति पर्जन्यः पातयन्नमृतं पयः ।
वाताश्चापि प्रवान्त्येते स्पर्शयुक्ताः सुखाः शिवाः ।। ७.४१.२० ॥
Kale varshati parjanyah patayannamritam payah
Vatashchapi pravantyete sparshayuktah sukhah shivah
41.21
ईदृशो ऽनश्वरो राजा भवेदिति नरेश्वरः ।
कथयन्ति पुरे राजन्पौरजानपदास्तथा ।। ७.४१.२१ ॥
Idrisho nashvaro raja bhavediti nareshvarah
Kathayanti pure rajanpaurajanapadastatha
41.22
एता वाचः सुमधुरा भरतेन समीरिताः ।
श्रुत्वा रामो मुदा युक्तो बभूव नृपसत्तमः ।। ७.४१.२२ ।।
Eta vachah sumadhura bharatena samiritah
Shrutva ramo muda yukto babhuva nripasattamah