Utshovসর্গ 4
4.1
শ্রুত্বাগস্ত্যেরিতং বাক্যং রামো বিস্ময়মাগতঃ ।
কথমাসীত্তু লঙ্কায়াং সম্ভবো রক্ষসাং পুরা ।। ৭.৪.১ ॥
4.2
ততঃ শিরঃ কম্পয়িত্বা ত্রেতাগ্নিসমবিগ্রহম্ ।
তমগস্ত্যং মুহুর্দৃষ্ট্বা স্ময়মানো ঽভ্যভাষত ।। ৭.৪.২ ॥
4.3
ভগবন্পূর্বমপ্যেষা লঙ্কাসীত্পিশিতাশিনাম্ ।
শ্রুত্বেদং ভগবদ্বাক্যং জাতো মে বিস্ময়ঃ পরঃ ।। ৭.৪.৩ ॥
4.4
পুলস্ত্যবংশাদুদ্ভূতা রাক্ষসা ইতি নঃ শ্রুতম্ ।
ইদানীমন্যতশ্চাপি সম্ভবঃ কীর্তিতস্ত্বয়া ।। ৭.৪.৪ ॥
4.5
রাবণাত্কুম্ভকর্ণাচ্চ প্রহস্তাদ্বিকটাদপি ।
রাবণস্য চ পুত্রেভ্যঃ কিং নু তে বলবত্তরাঃ ।। ৭.৪.৫ ॥
4.6
ক এষাং পূর্বকো ব্রহ্মন্কিন্নামা চ বলোত্কটঃ ।
অপরাধং চ কং প্রাপ্য বিষ্ণুনা দ্রাবিতাঃ কথম্ ।। ৭.৪.৬ ॥
4.7
এতদ্বিস্তরতঃ সর্বং কথয়স্ব মমানঘ ।
কুতূহলমিদং মহ্যং নুদ ভানুর্যথা তমঃ ।। ৭.৪.৭ ॥
4.8
রাঘবস্য বচঃ শ্রুত্বা সংস্কারালঙ্কৃতং শুভম্ ।
ঈষদ্বিস্ময়মানস্তমগস্ত্যঃ প্রাহ রাঘবম্ ।। ৭.৪.৮ ॥
4.9
প্রজাপতিঃ পুরা সৃষ্ট্বা হ্যপঃ সলিলসম্ভবঃ ।
তাসাং গোপায়নে সত্ত্বানসৃজত্পদ্মসম্ভবঃ ।। ৭.৪.৯ ॥
4.10
তে সত্ত্বাঃ সত্ত্বকর্তারং বিনীতবদুপস্থিতাঃ ।
কিং কুর্ম ইতি ভাষন্তঃ ক্ষুত্পিপাসাভয়ার্দিতাঃ ।। ৭.৪.১০ ॥
4.11
প্রজাপতিস্তু তান্যাহ সত্বানি প্রহসন্নিব ।
আভাষ্য বাচা যত্নেন রক্ষধ্বমিতি মানদঃ ।। ৭.৪.১১ ॥
4.12
রক্ষামেতি চ তত্রান্যে জক্ষাম ইতি চাপরে ।
ভুক্ষিতাভুক্ষিতৈরুক্তস্ততস্তানাহ ভূতকৃৎ ।। ৭.৪.১২ ॥
4.13
রক্ষামেতি চ যৈরুক্তং রাক্ষসাস্তে ভবন্তু বঃ ।
জক্ষাম ইতি যৈরুক্তং যক্ষা এব ভবন্তু বঃ ।। ৭.৪.১৩ ॥
4.14
তত্র হেতিঃ প্রহেতিশ্চ ভ্রাতরৌ রাক্ষসাধিপৌ ।
মধুকৈটভসঙ্কাশৌ বভূবতুররিন্দমৌ ।। ৭.৪.১৪ ॥
4.15
প্রহেতির্ধার্মিকস্তত্র তপোবনগতস্তদা ।
হেতির্দারক্রিয়ার্থে তু পরং যত্নমথাকরোৎ ।। ৭.৪.১৫ ॥
4.16
স কালভগিনীং কন্যাং ভয়াং নাম ভয়াবহাম্ ।
উদাবহদমেয়াত্মা স্বয়মেব মহামতিঃ ।। ৭.৪.১৬ ॥
4.17
স তস্যাং জনয়ামাস হেতী রাক্ষসপুঙ্গবঃ ।
পুত্রং পুত্রবতাং শ্রেষ্ঠো বিদ্যুত্কেশ ইতি শ্রুতম্ ।। ৭.৪.১৭ ॥
4.18
বিদ্যুত্কেশো হেতিপুত্রঃ স দীপ্তার্কসমপ্রভঃ ।
ব্যবর্ধত মহাতেজাস্তোয়মধ্য ইবাম্বুদঃ ।। ৭.৪.১৮ ॥
4.19
স যদা যৌবনং ভদ্রমনুপ্রাপ্তো নিশাচরঃ ।
ততো দারক্রিয়াং তস্য কর্তুং ব্যবসিতঃ পিতা ।। ৭.৪.১৯ ॥
4.20
সন্ধ্যায়াস্তনয়াং সো ঽথ সন্ধ্যাতুল্যাং প্রভাবতঃ ।
বরয়ামাস পুত্রার্থং হেতী রাক্ষসপুঙ্গবঃ ।। ৭.৪.২০ ॥
4.21
অবশ্যমেব দাতব্যা পরস্মৈ সেতি সন্ধ্যয়া ।
চিন্তয়িত্বা সুতা দত্তা বিদ্যুত্কেশায় রাঘব ।। ৭.৪.২১ ॥
4.22
সন্ধ্যায়াস্তনয়াং লব্ধ্বা বিদ্যুত্কেশো নিশাচরঃ ।
রমতে স্ম তয়া সার্ধং পৌলোম্যা মঘবানিব ।। ৭.৪.২২ ॥
4.23
কেনচিত্ত্বথ কালেন রাম সালকটঙ্কটা ।
বিদ্যুত্কেশাদ্গর্ভমাপ ঘনরাজিরিবার্ণবাৎ ।। ৭.৪.২৩ ॥
4.24
ততঃ সা রাক্ষসী গর্ভং ঘনগর্ভসমপ্রভম্ ।
প্রসূতা মন্দরং গত্বা গঙ্গা গর্ভমিবাগ্নিজম্ ।। ৭.৪.২৪ ॥
4.25
সমুত্সৃজ্য তু সা গর্ভং বিদ্যুত্কেশরতার্থিনী ।
রেমে তু সার্ধং পতিনা বিস্মৃত্য সুতমাত্মজম্ ।। ৭.৪.২৫ ॥
4.26
উত্সৃষ্টস্তু তদা গর্ভো ঘনশব্দসমস্বনঃ ।
তয়োত্সৃষ্টঃ স তু শিশুঃ শরদর্কসমদ্যুতিঃ ।নিধায়াস্যে স্বয়ং মুষ্টিং রুরোদ শনকৈস্তদা ।। ৭.৪.২৬ ॥
4.27
ততো বৃষভমাস্থায় পার্বত্যা সহিতঃ শিবঃ ।
বায়ুমার্গেণ গচ্ছন্বৈ শুশ্রাব রুদিতস্বনম্ ।। ৭.৪.২৭ ॥
4.28
অপশ্যদুময়া সার্ধং রুদন্তং রাক্ষসাত্মজম্ ।
কারুণ্যভাবাত্পার্বত্যা ভবস্ত্রিপুরসূদনঃ ।। ৭.৪.২৮ ॥
4.29
তং রাক্ষসাত্মজং চক্রে মাতুরেব বয়ঃসমম্ ।
অমরং চৈব তং কৃত্বা মহাদেবো ঽক্ষরো ঽব্যয়ঃ ।। ৭.৪.২৯ ॥
4.30
পুরমাকাশগং প্রাদাত্পার্বত্যাঃ প্রিয়কাম্যয়া ।
উময়াপি বরো দত্তো রাক্ষসানাং নৃপাত্মজ ।। ৭.৪.৩০ ॥
4.31
সদ্যোপলব্ধির্গর্ভস্য প্রসূতিঃ সদ্য এব চ ।
সদ্য এব বয়ঃপ্রাপ্তির্মাতুরেব বয়স্সমম্ ।। ৭.৪.৩১ ॥
4.32
ততঃ সুকেশো বরদানগর্বিতঃ শ্রিয়ং প্রভোঃ প্রাপ্য হরস্য পার্শ্বতঃ ।
চচার সর্বত্র মহান্মহামতিঃ খগং পুরং প্রাপ্য পুরন্দরো যথা ।। ৭.৪.৩২ ।।