Utshovসর্গ 29
29.1
ততস্তমসি সঞ্জাতে সর্বে তে দেবরাক্ষসাঃ ।
অয়ুদ্ধ্যন্ত বলোন্মত্তাঃ সূদয়ন্তঃ পরস্পরম্ ।। ৭.২৯.১ ॥
29.2
ততস্তু দেবসৈন্যেন রাক্ষসানাং বৃহদ্বলম্ ।
দশাংশং স্থাপিতং যুদ্ধে শেষং নীতং যমক্ষয়ম্ ।। ৭.২৯.২ ॥
29.3
তস্মিংস্তু তামসে যুদ্ধে সর্বে তে দেবরাক্ষসাঃ ।
অন্যোন্যং নাভ্যজানন্ত যুধ্যমানাঃ পরস্পরম্ ।। ৭.২৯.৩ ॥
29.4
ইন্দ্রশ্চ রাবণশ্চৈব রাবণিশ্চ মহাবলঃ ।
তস্মিংস্তমোজালবৃতে মোহমীয়ুর্ন তে ত্রয়ঃ ।। ৭.২৯.৪ ॥
29.5
স তু দৃষ্ট্বা বলং সর্বং রাবণো নিহতং ক্ষণাৎ ।
ক্রোধমভ্যগমত্তীব্রং মহানাদং চ মুক্তবান্ ।। ৭.২৯.৫ ॥
29.6
ক্রোধাত্সূতং চ দুর্ধর্ষঃ স্যন্দনস্থমুবাচ হ ।
পরসৈন্যস্য মধ্যেন যাবদন্তো নয়স্ব মাম্ ।। ৭.২৯.৬ ॥
29.7
অদ্যৈতান্ ত্রিদশান্সর্বান্বিক্রমৈঃ সমরে স্বয়ম্ ।
নানাশস্ত্রৈর্মহাঘোরৈর্নয়ামি যমসাদনম্ ।। ৭.২৯.৭ ॥
29.8
অহমিন্দ্রং বধিষ্যামি ধনদং বরুণং যমম্ ।
ত্রিদশান্বিনিহত্যাথ স্বয়ং স্থাস্যাম্যথোপরি ।বিষাদো ন চ কর্তব্যঃ শীঘ্রং বাহয় মে রথম্ ।। ৭.২৯.৮ ॥
29.9
দ্বিঃ খলু ত্বাং ব্রবীম্যদ্য যাবদন্তো নয়স্ব মাম্ ।
। ৭.২৯.৯ ॥
29.10
অয়ং স নন্দনোদ্দেশো যত্র বর্তামহে বয়ম্ ।
নয় মামদ্য তত্র ত্বমুদয়ো যত্র পর্বতঃ ।। ৭.২৯.১০ ॥
29.11
তস্য তদ্বচনং শ্রুত্বা তুরগান্স মনোজবান্ ।
আদিদেশাথ শত্রণাং মধ্যেনৈব চ সারথিঃ ।। ৭.২৯.১১ ॥
29.12
তস্য তং নিশ্চয়ং জ্ঞাত্বা শক্রো দেবেশ্বরস্তদা ।
রথস্থঃ সমরস্থস্তান্দেবান্বাক্যমথাব্রবীৎ ।। ৭.২৯.১২ ॥
29.13
সুরাঃ শৃণুত মদ্বাক্যং যত্তাবন্মম রোচতে ।
জীবন্নেব দশগ্রীবঃ সাধু রক্ষো নিগৃহ্যতাম্ ।। ৭.২৯.১৩ ॥
29.14
এষ হ্যতিবলঃ সৈন্যৈ রথেন পবনৌজসা ।
গমিষ্যতি প্রবৃদ্ধোর্মিঃ সমুদ্র ইব পর্বণি ।। ৭.২৯.১৪ ॥
29.15
নহ্যেষ হন্তুং শক্যো ঽদ্য বরদানাত্সুনির্ভয়ঃ ।
তদ্গ্রহীষ্যামহে রক্ষো যত্তা ভবত সংয়ুগে ।। ৭.২৯.১৫ ॥
29.16
যথা বলৌ নিরুদ্ধে চ ত্রৈলোক্যং ভুজ্যতে ময়া ।
এবমেতস্য পাপস্য নিরোধো মম রোচতে ।। ৭.২৯.১৬ ॥
29.17
ততো ঽন্যং দেশমাস্থায় শক্রঃ সন্ত্যজ্য রাবণম্ ।
অয়ুধ্যত মহারাজ রাক্ষসাংস্ত্রাসয়ন্রণে ।। ৭.২৯.১৭ ॥
29.18
উত্তরেণ দশগ্রীবঃ প্রবিবেশানিবর্তকঃ ।
দক্ষিণেন তু পার্শ্বেন প্রবিবেশ শতক্রতুঃ ।। ৭.২৯.১৮ ॥
29.19
ততঃ স যোজনশতং প্রবিষ্টো রাক্ষসাধিপঃ ।
দেবতানাং বলং সর্বং শরবর্ষৈরবাকিরৎ ।। ৭.২৯.১৯ ॥
29.20
ততঃ শক্রো নিরীক্ষ্যাথ প্রনষ্টং তু স্বকং বলম্ ।
ন্যবর্তয়দসম্ভ্রান্তঃ সমাবৃত্য দশাননম্ ।। ৭.২৯.২০ ॥
29.21
এতস্মিন্নন্তরে নাদো মুক্তো দানবরাক্ষসৈঃ ।
হা হতাঃ স্ম ইতি গ্রস্তং দৃষ্ট্বা শক্রেণ রাবণম্ ।। ৭.২৯.২১ ॥
29.22
ততো রথং সমাস্থায় রাবণিঃ ক্রোধমূর্চ্ছিতঃ ।
তত্সৈন্যমতিসঙ্ক্রুদ্ধঃ প্রবিবেশ সুদারুণম্ ।। ৭.২৯.২২ ॥
29.23
তাং প্রবিশ্য মহামায়াং প্রাপ্তাং গোপতিনা পুরা ।
প্রবিবেশ সুসংরব্ধস্তত্সৈন্যং সমভিদ্রবৎ ।। ৭.২৯.২৩ ॥
29.24
স সর্বা দেবতাস্ত্যক্ত্বা শক্রমেবাভ্যধাবত ।
মহেন্দ্রশ্চ মহাতেজা নাপশ্যচ্চ সুতং রিপোঃ ।। ৭.২৯.২৪ ॥
29.25
বিমুক্তকবচস্তত্র বধ্যমানো ঽপি রাবণিঃ ।
ত্রিদশৈঃ সুমহাবীর্যৈর্ন চকার চ কিঞ্চন ।। ৭.২৯.২৫ ॥
29.26
স মাতলিং সমায়ান্তং তাডয়িত্বা শরোত্তমৈঃ ।
মহেন্দ্রং বাণবর্ষেণ ভূয় এবাভ্যবাকিরৎ ।। ৭.২৯.২৬ ॥
29.27
ততস্ত্যক্ত্বা রথং শক্রো বিসসর্জ চ সারথিম্ ।
ঐরাবতং সমারুহ্য মৃগয়ামাস রাবণিম্ ।। ৭.২৯.২৭ ॥
29.28
স তত্র মায়াবলবানদৃশ্যো ঽথান্তরিক্ষগঃ ।
ইন্দ্রং মায়াপরিক্ষিপ্তং কৃত্বা স প্রাদ্রবচ্ছরৈঃ ।। ৭.২৯.২৮ ॥
29.29
স তং যদা পরিশ্রান্তমিন্দ্রং জজ্ঞে ঽথ রাবণিঃ ।
তদৈনং মায়য়া বদ্ধ্বা স্বসৈন্যমভিতো ঽনয়ৎ ।। ৭.২৯.২৯ ॥
29.30
তং তু দৃষ্ট্বা বলাত্তেন নীয়মানং মহারণাৎ ।
মহেন্দ্রমমরাঃ সর্বে কিং নু স্যাদিত্যচিন্তয়ন্ ।। ৭.২৯.৩০ ॥
29.31
দৃশ্যতে ন স মায়াবী শক্রজিত্সমিতিঞ্জয়ঃ ।
বিদ্যাবানপি যেনেন্দ্রো মায়য়া নীয়তে বলাৎ ।। ৭.২৯.৩১ ॥
29.32
এতস্মিন্নন্তরে ক্রুদ্ধাঃ সর্বে সুরগণাস্তদা ।
রাবণং বিমুখীকৃত্য শরবর্ষৈরবাকিরন্ ।। ৭.২৯.৩২ ॥
29.33
রাবণস্তু সমাসাদ্য আদিত্যাংশ্চ বসূংস্তদা ।
ন শশাক স সঙ্গ্রামে যোদ্ধুং শত্রুভিরর্দিতঃ ।। ৭.২৯.৩৩ ॥
29.34
স তং দৃষ্ট্বা পরিম্লানং প্রহারৈর্জর্জরীকৃতম্ ।
রাবণিঃ পিতরং যুদ্ধে দর্শনস্থো ঽব্রবীদিদম্ ।। ৭.২৯.৩৪ ॥
29.35
আগচ্ছ তাত গচ্ছামো রণকর্ম নিবর্ততাম্ ।
জিতং নো বিদিতং তে ঽস্তু স্বস্থো ভব গতজ্বরঃ ।। ৭.২৯.৩৫ ॥
29.36
অয়ং হি সুরসৈন্যস্য ত্রৈলোক্যস্য চ যঃ প্রভুঃ ।
স গৃহীতো দৈববলাদ্ভগ্নদর্পাঃ সুরাঃ কৃতাঃ ।। ৭.২৯.৩৬ ॥
29.37
যথেষ্টং ভুঙ্ক্ষ্ব লোকাংস্ত্রীন্নিগৃহ্যারাতিমোজসা ।
বৃথা কিং তে শ্রমেণেহ যুদ্ধমদ্য তু নিষ্ফলম্ ।। ৭.২৯.৩৭ ॥
29.38
ততস্তে দৈবতগণা নিবৃত্তা রণকর্মণঃ ।
তচ্ছ্রুত্বা রাবণের্বাক্যং স্বস্থচেতাঃ বভূব হ ।। ৭.২৯.৩৮ ॥
29.39
অথ স রণবিগতজ্বরঃ প্রভুর্বিজয়মবাপ্য নিশাচরাধিপঃ ।
স্বভবনমভিতো জগাম হৃষ্টঃ স্বসুতমবাপ্য চ বাক্যমব্রবীৎ ।। ৭.২৯.৩৯ ॥
29.40
অতিবলসদৃশৈঃ পরাক্রমৈস্তৈর্মম কুলমানবিবর্ধনং কৃতম্ ।
যদয়মতুল্যবলস্ত্বয়াদ্য বৈ ত্রিদশপতিস্ত্রিদশাশ্চ নির্জিতাঃ ।। ৭.২৯.৪০ ॥
29.41
নয় রথমধিরোপ্য বাসবং নগরমিতো ব্রজ সেনয়া বৃতস্ত্বম্ ।
অহমপি তব গচ্ছতো দ্রুতং সহ সচিবৈরনুয়ামি পৃষ্ঠতঃ ।। ৭.২৯.৪১ ॥
29.42
অথ স বলবৃতঃ সবাহনস্ত্রিদশপতিং পরিগৃহ্য রাবণিঃ ।
স্বভবনমভিগম্য বীর্যবান্কৃতসমরান্বিসসর্জ রাক্ষসান্ ।। ৭.২৯.৪২ ।।