Utshovসর্গ 28
28.1
সুমালিনং হতং দৃষ্ট্বা বসুনা ভস্মসাত্কৃতম্ ।
স্বসৈন্যং বিদ্রুতং চাপি লক্ষয়িত্বা ঽর্দিতং সুরৈঃ ।। ৭.২৮.১ ॥
28.2
ততঃ স বলবান্ক্রুদ্ধো রাবণস্য সুতস্তদা ।
নিবর্ত্য রাক্ষসান্সর্বান্মেঘনাদো ব্যবস্থিতঃ ।। ৭.২৮.২ ॥
28.3
সুরথেনাগ্নিবর্ণেন কামগেন মহারথঃ ।
অভিদুদ্রাব সেনাং তাং বনান্যগ্নিরিব জ্বলন্ ।। ৭.২৮.৩ ॥
28.4
ততঃ প্রবিশতস্তস্য বিবিধায়ুধধারিণঃ ।
বিদুদ্রুবুর্দিশঃ সর্বা দর্শনাদেব দেবতাঃ ।। ৭.২৮.৪ ॥
28.5
ন বভূব তদা কশ্চিদ্যুয়ুত্সোরস্য সম্মুখে ।
সর্বানাবিদ্ধ্য বিত্রস্তাংস্ততঃ শক্রো ঽব্রবীত্সুরান্ ।। ৭.২৮.৫ ॥
28.6
ন ভেতব্যং ন গন্তব্যং নিবর্তধ্বং রণে সুরাঃ ।
এষ গচ্ছতি পুত্রো মে যুদ্ধার্থমপরাজিতঃ ।। ৭.২৮.৬ ॥
28.7
ততঃ শক্রসুতো দেবো জয়ন্ত ইতি বিশ্রুতঃ ।
রথেনাদ্ভুতকল্পেন সঙ্গ্রামে সো ঽভ্যবর্তত ।। ৭.২৮.৭ ॥
28.8
ততস্তে ত্রিদশাঃ সর্বে পরিবার্য শচীসুতম্ ।
রাবণস্য সুতং যুদ্ধে সমাসাদ্য প্রজঘ্নিরে ।। ৭.২৮.৮ ॥
28.9
তেষাং যুদ্ধং সমভবত্সদৃশং দেবরক্ষসাম্ ।
মহেন্দ্রস্য চ পুত্রস্য রাক্ষসেন্দ্রসুতস্য চ ।। ৭.২৮.৯ ॥
28.10
ততো মাতলিপুত্রে তু গোমুখে রাক্ষসাত্মজঃ ।
সারথৌ পাতয়ামাস শরান্কনকভূষণান্ ।। ৭.২৮.১০ ॥
28.11
শচীসুতশ্চাপি তথা জয়ন্তস্তস্য সারথিম্ ।
তং চাপি রাবণিঃ ক্রুদ্ধঃ সমন্তাত্প্রত্যবিধ্যত ।। ৭.২৮.১১ ॥
28.12
স হি ক্রোধসমাবিষ্টো বলী বিস্ফারিতেক্ষণঃ ।
রাবণিঃ শক্রতনয়ং শরবর্ষৈরবাকিরৎ ।। ৭.২৮.১২ ॥
28.13
ততো নানাপ্রহরণাঞ্ছিতধারান্সহস্রশঃ ।
পাতয়ামাস সঙ্ক্রুদ্ধঃ সুরসৈন্যেষু রাবণিঃ ।। ৭.২৮.১৩ ॥
28.14
শতঘ্নীমুসলপ্রাসগদাখড্গপরশ্বধান্ ।
মহান্তি গিরিশৃঙ্গাণি পাতয়ামাস রাবণিঃ ।। ৭.২৮.১৪ ॥
28.15
ততঃ প্রব্যথিতা লোকাঃ সঞ্জজ্ঞে চ তমো ঽভবৎ ।
তস্য রাবণপুত্রস্য শত্রুসৈন্যানি নিঘ্নতঃ ।। ৭.২৮.১৫ ॥
28.16
ততস্তদ্দৈবতবলং সমন্তাত্তং শচীসুতম্ ।
বহুপ্রকারমস্বস্থমভবচ্ছরপীডিতম্ ।। ৭.২৮.১৬ ॥
28.17
নাভ্যজানন্ত চান্যোন্যং রক্ষো বা দেবতা ঽথবা ।
তত্র তত্র বিপর্যস্তং সমন্তাত্পরিধাবতি ।। ৭.২৮.১৭ ॥
28.18
দেবা দেবান্নিজঘ্নুস্তে রাক্ষসান্রাক্ষসাস্তথা ।
সম্মূঢাস্তমসাচ্ছন্না ব্যদ্রবন্নপরে তথা ।। ৭.২৮.১৮ ॥
28.19
এতস্মিন্নন্তরে বীরঃ পুলোমা নাম বীর্যবান্ ।
দৈত্যেন্দ্রস্তেন সঙ্গৃহ্য শচীপুত্রো ঽপবাহিতঃ ।। ৭.২৮.১৯ ॥
28.20
সঙ্গৃহ্য তং তু দৌহিত্রং প্রবিষ্টঃ সাগরং তদা ।
আর্যকঃ স হি তস্যাসীত্পুলোমা যেন সা শচী ।। ৭.২৮.২০ ॥
28.21
জ্ঞাত্বা প্রণাশং তু তদা জয়ন্তস্যাথ দেবতাঃ ।
অপ্রহৃষ্টাস্ততঃ সর্বা ব্যথিতাঃ সম্প্রদুদ্রুবুঃ ।। ৭.২৮.২১ ॥
28.22
রাবণিস্ত্বথ সঙ্ক্রুদ্ধো বলৈঃ পরিবৃতঃ স্বকৈঃ ।
অভ্যধাবত দেবাংস্তান্মুমোচ চ মহাস্বনম্ ।। ৭.২৮.২২ ॥
28.23
দৃষ্ট্বা প্রণাশং পুত্রস্য দৈবতেষু চ বিদ্রুতম্ ।
মাতলিং চাহ দেবেশো রথঃ সমুপনীয়তাম্ ।। ৭.২৮.২৩ ॥
28.24
স তু দিব্যো মহাভীমঃ সজ্জ এব মহারথঃ ।
উপস্থিতো মাতলিনা বাহ্যমানো মহাজবঃ ।। ৭.২৮.২৪ ॥
28.25
ততো মেঘা রথে তস্মিংস্তডিত্ত্বন্তো মহাবলাঃ ।
অগ্রতো বায়ুচপলা নেদুঃ পরমনিঃস্বনাঃ ।। ৭.২৮.২৫ ॥
28.26
নানাবাদ্যানি বাদ্যন্ত গন্ধর্বাশ্চ সমাহিতাঃ ।
ননৃতুশ্চাপ্সরঃসঙ্ঘা নির্যাতে ত্রিদশেশ্বরে ।। ৭.২৮.২৬ ॥
28.27
রুদ্রৈর্বসুভিরাদিত্যৈস্সাধ্যৈশ্চ সমরুদ্গণৈঃ ।
বৃতো নানাপ্রহরণৈর্নির্যয়ৌ ত্রিদশাধিপঃ ।। ৭.২৮.২৭ ॥
28.28
নির্গচ্ছতস্তু শক্রস্য পরুষং পবনো ববৌ ।
ভাস্করো নিষ্প্রভশ্চাসীন্মহোল্কাশ্চ প্রপেদিরে ।। ৭.২৮.২৮ ॥
28.29
এতস্মিন্নন্তরে শূরো দশগ্রীবঃ প্রতাপবান্ ।
আরুরোহ রথং দিব্যং নির্মিতং বিশ্বকর্মণা ।। ৭.২৮.২৯ ॥
28.30
পন্নগৈঃ সুমহাকার্যৈর্বেষ্টিতং রোমহর্ষণৈঃ ।
তেষাং নিঃশ্বাসবাতেন প্রদীপ্তমিব সংয়ুগে ।। ৭.২৮.৩০ ॥
28.31
দৈত্যৈর্নিশাচরৈশ্চৈব স রথঃ পরিবারিতঃ ।
সমরাভিমুখো দৈত্যো মহেন্দ্রং সো ঽভ্যবর্তত ।। ৭.২৮.৩১ ॥
28.32
পুত্রং তং বারয়িত্বা তু স্বয়মেব ব্যবস্থিতঃ ।
সো ঽপি যুদ্ধাদ্বিনিষ্ক্রম্য রাবণিঃ সমুপাবিশৎ ।। ৭.২৮.৩২ ॥
28.33
ততো যুদ্ধং প্রবৃত্তং তু সুরাণাং রাক্ষসৈঃ সহ ।
শস্ত্রাণি বর্ষতাং ঘোরং মেঘানামিব সংয়ুগে ।। ৭.২৮.৩৩ ॥
28.34
কুম্ভকর্ণস্তু দুষ্টাত্মা নানাপ্রহরণোদ্যতঃ ।
নাজ্ঞায়ত তদা যুদ্ধে সহ কেনাপ্যয়ুধ্যত ।। ৭.২৮.৩৪ ॥
28.35
দন্তৈঃ ভুজাভ্যাং পদ্মাং চ শক্তিতোমরসায়কৈঃ ।
যেন কেনৈব সংরব্ধস্তাডয়ামাস বৈ সুরান্ ।। ৭.২৮.৩৫ ॥
28.36
ততো রুদ্রৈর্মহাঘোরৈঃ সঙ্গম্যাথ নিশাচরঃ ।
প্রয়ুদ্ধস্তৈশ্চ সঙ্গ্রামে ক্ষতঃ শস্ত্রৈর্নিরন্তরম্ ।। ৭.২৮.৩৬ ॥
28.37
বভৌ শস্ত্রাচিততনুঃ কুম্ভকর্ণঃ ক্ষরন্নসৃক্ ।
বিদ্যুত্স্তনিতনির্ঘোষো ধারবানিব তোয়দঃ ।। ৭.২৮.৩৭ ॥
28.38
ততস্তদ্রাক্ষসং সৈন্যং প্রয়ুদ্ধং সমরুদ্গণৈঃ ।
রণে বিদ্রাবিতং সর্বং নানাপ্রহরণৈঃ শিতৈঃ ।। ৭.২৮.৩৮ ॥
28.39
কেচিদ্বিনিহতাঃ কৃত্তাশ্চেষ্টন্তি স্ম মহীতলে ।
বাহনেষ্ববসক্তাশ্চ স্থিতা এবাপরে রণে ।। ৭.২৮.৩৯ ॥
28.40
রথান্নাগান্খরানুষ্ট্রান্পন্নগাংস্তুরগান্ রণে ।
শিংশুমারান্বরাহাংশ্চ পিশাচবদনান্তথা ।। ৭.২৮.৪০ ॥
28.41
তান্সমালিঙ্গ্য বাহুভ্যাং বিষ্টব্ধাঃ কেচিদুচ্ছ্রুতাঃ ।
দেবৈস্তু শস্ত্রসম্ভিন্না মম্রিরে চ নিশাচরাঃ ।। ৭.২৮.৪১ ॥
28.42
চিত্রকর্ম ইবাভাতি স তেষাং রণসম্প্লবঃ ।
নিহতানাং প্রমত্তানাং রাক্ষসানাং মহীতলে ।। ৭.২৮.৪২ ॥
28.43
শোণিতোদকনিষ্পন্দকঙ্কগৃধ্রসমাকুলা ।
প্রবৃত্তা সংয়ুগমুখে শস্ত্রগ্রাহবতী নদী ।। ৭.২৮.৪৩ ॥
28.44
এতস্মিন্নন্তরে ক্রুদ্ধো দশগ্রীবঃ প্রতাপবান্ ।
নিরীক্ষ্য তদ্বলং কৃত্স্নং দৈবতৈর্বিনিপাতিতম্ ।। ৭.২৮.৪৪ ॥
28.45
স তং প্রতি বিগাহ্যাশু প্রবৃদ্ধং সৈন্যসাগরম্ ।
ত্রিদশান্সমরে নিঘ্নঞ্ছক্রমেবাভ্যবর্তত ।। ৭.২৮.৪৫ ॥
28.46
আগাচ্ছক্রো মহচ্চাপং বিস্ফার্য সুমহাস্বনম্ ।
যস্য বিস্ফারঘোষেণ স্তনন্তি স্ম দিশো দশ ।। ৭.২৮.৪৬ ॥
28.47
তদ্বিকৃষ্য মহচ্চাপমিন্দ্রো রাবণমূর্ধনি ।
নিপাতয়ামাস শরান্পাবকাদিত্যবর্চসঃ ।। ৭.২৮.৪৭ ॥
28.48
তথৈব চ মহাবাহুর্দশগ্রীবো ব্যবস্থিতঃ ।
শক্রং কার্মুকবিভ্রষ্টৈঃ শরবর্ষৈরবাকিরৎ ।। ৭.২৮.৪৮ ॥
28.49
প্রয়ুধ্যতোরথ তয়োর্বাণবর্ষৈঃ সমন্ততঃ ।
ন জ্ঞায়তে তদা কিঞ্চিত্সর্বং হি তমসা বৃতম্ ।। ৭.২৮.৪৯ ।।