Utshovসর্গ 23
23.1
ততো জিত্বা দশগ্রীবো যমং ত্রিদশপুঙ্গবম্ ।
রাবণস্তু রণশ্লাঘী স্বসহায়ান্দদর্শ হ ।। ৭.২৩.১ ॥
23.2
ততো রুধিরসিক্তাঙ্গং প্রহারৈর্জর্জরীকৃতম্ ।
রাবণং রাক্ষসা দৃষ্ট্বা হ্যষ্টবৎ সমুপাগমন্ ।। ৭.২৩.২ ॥
23.3
জয়েন বর্ধয়িত্বা চ মারীচপ্রমুখাস্ততঃ ।
পুষ্পকং ভেজিরে সর্বে সান্ত্বিতা রাবণেন তু ।। ৭.২৩.৩ ॥
23.4
ততো রসাতলং গচ্ছন্ প্রবিষ্টঃ পয়সাং নিধিম্ ।
দৈত্যোরগগণাধ্যুষ্টং বরুণেন সুরক্ষিতম্ ।। ৭.২৩.৪ ॥
23.5
স তু ভোগবতীং গত্বা পুরীং বাসুকিপালিতাম্ ।
কৃত্বা নাগান্বশে হৃষ্টো যয়ৌ মণিময়ীং পুরীম্ ।। ৭.২৩.৫ ॥
23.6
নিবাতকবচাস্তত্র দৈত্যা লব্ধবরা বসন্ ।
রাক্ষসান্তান্সমাগম্য যুদ্ধায় সমুপাহ্বয়ৎ ।। ৭.২৩.৬ ॥
23.7
তে তু সর্বে সুবিক্রান্তা দৈতেয়া বলশালিনঃ ।
নানাপ্রহরণাস্তত্র প্রহৃষ্টা যুদ্ধদুর্মদাঃ ।। ৭.২৩.৭ ॥
23.8
শূলৈস্ত্রিশূলৈঃ কুলিশৈঃ পট্টিশাসিপরশ্বধৈঃ ।
অন্যোন্যং বিভিদুঃ ক্রুদ্ধা রাক্ষসা দানবাস্তথা ।। ৭.২৩.৮ ॥
23.9
তেষাং তু যুধ্যমানানাং সাগ্রঃ সংবত্সরো গতঃ ।
ন চান্যতরয়োস্তত্র বিজয়ো বা ক্ষয়ো ঽপি বা ।। ৭.২৩.৯ ॥
23.10
ততঃ পিতামহস্তত্র ত্রৈলোক্যগতিরব্যয়ঃ ।
আজগাম দ্রুতং দেবো বিমানবরমাস্থিতঃ ।। ৭.২৩.১০ ॥
23.11
নিবাতকবচানাং তু নিবার্য রণকর্ম তৎ ।
বৃদ্ধঃ পিতামহো বাক্যমুবাচ বিদিতার্থবৎ ।। ৭.২৩.১১ ॥
23.12
নহ্যয়ং রাবণো যুদ্ধে শক্যো জেতুং সুরাসুরৈঃ ।
ন ভবন্তঃ ক্ষয়ং নেতুমপি সামরদানবৈঃ ।। ৭.২৩.১২ ॥
23.13
রাক্ষসস্য সখিত্বং চ ভবদ্ভিঃ সহ রোচতে ।
অবিভক্তাশ্চ সর্বার্থাঃ সুহৃদাং নাত্র সংশয়ঃ ।। ৭.২৩.১৩ ॥
23.14
ততো ঽগ্নিসাক্ষিকং সখ্যং কৃতবাংস্তত্র রাবণঃ ।
নিবাতকবচৈঃ সার্ধং প্রীতিমানভবত্তদা ।। ৭.২৩.১৪ ॥
23.15
অর্থতস্তৈর্যথান্যায়ং সংবত্সরমথোষিতঃ ।
স্বপুরান্নির্বিশেষং চ প্রিয়ং প্রাপ্তো দশাননঃ ।। ৭.২৩.১৫ ॥
23.16
ততোপধার্য মায়ানাং শতমেকং সমাপ্তবান্ ।
সলিলেন্দ্রপুরান্বেষী ভ্রমতি স্ম রসাতলম্ ।। ৭.২৩.১৬ ॥
23.17
ততো ঽশ্মনগরং নাম কালকেয়ৈরধিষ্ঠিতম্ ।
গত্বা তু কালকেয়াংশ্চ হত্বা তত্র বলোত্কটান্ ।। ৭.২৩.১৭ ॥
23.18
শূর্পণখ্যাশ্চ ভর্তারমসিনা প্রাচ্ছিনত্তদা ।
শ্যালং চ বলবন্তং চ বিদ্যুজ্জিহ্বং বলোত্কটম্ ।জিহ্বয়া সংলিহন্তং চ রাক্ষসং সমরে তথা ।। ৭.২৩.১৮ ॥
23.19
তং বিজিত্য মুহূর্তেন জঘ্নে দৈত্যাংশ্চতুঃশতম্ ।
। ৭.২৩.১৯ ॥
23.20
ততঃ পাণ্ডুরমেঘাভং কৈলাসমিব ভাস্বরম্ ।
বরুণস্যালয়ং দিব্যমপশ্যদ্রাক্ষসাধিপঃ ।। ৭.২৩.২০ ॥
23.21
ক্ষরন্তীং চ পয়স্তত্র সুরভিং গামবস্থিতাম্ ।
যস্যাঃ পয়োভিনিষ্যন্দাত্ক্ষীরোদো নাম সাগরঃ ।। ৭.২৩.২১ ।।
23.22
দদর্শ রাবণস্তত্র গোবৃষেন্দ্রবরারণিম্ ।
যস্মাচ্চন্দ্রঃ প্রভবতি শীতরশ্মির্নিশাকরঃ ।। ৭.২৩.২২ ॥
23.23
যং সমাশ্রিত্য জীবন্তি ফেনপাঃ পরমর্ষয়ঃ ।
অমৃতং যত্র চোত্পন্নং স্বধা চ স্বধভোজিনাম্ ।। ৭.২৩.২৩ ॥
23.24
যাং ব্রুবন্তি নরা লোকে সুরভিং নাম নামতঃ ।
প্রদক্ষিণং তু তাং কৃত্বা রাবণঃ পরমাদ্ভুতাম্ ।। ৭.২৩.২৪ ॥
23.25
প্রবিবেশ মহাঘোরং গুপ্তং বহুবিধৈর্বলৈঃ ।
ততো ধারাশতাকীর্ণং শারদাভ্রনিভং তদা ।নিত্যপ্রহৃষ্টং দদৃশে বরুণস্য গৃহোত্তমম্ ।। ৭.২৩.২৫ ॥
23.26
ততো হত্বা বলাধ্যক্ষান্সমরে তৈশ্চ তাডিতঃ ।
অব্রবীচ্চ ততো যোধান্রাজা শীঘ্রং নিবেদ্যতাম্ ।। ৭.২৩.২৬ ॥
23.27
যুদ্ধার্থী রাবণঃ প্রাপ্তস্তস্য যুদ্ধং প্রদীয়তাম্ ।
বদ বা ন ভয়ং তে ঽস্তি নির্জিতো ঽস্মীতি সাঞ্জলিঃ ।। ৭.২৩.২৭ ॥
23.28
এতস্মিন্নন্তরে ক্রুদ্ধা বরুণস্য মহাত্মনঃ ।
পুত্রাঃ পৌত্রাশ্চ নিষ্ক্রামন্গৌশ্চ পুষ্কর এব চ ।। ৭.২৩.২৮ ॥
23.29
তে তু বীর্যগুণোপেতা বলৈঃ পরিবৃতাঃ স্বকৈঃ ।
যুঙ্ক্ত্বা রথান্কামগমানুদ্যদ্ভাস্বরবর্চসঃ ।। ৭.২৩.২৯ ॥
23.30
ততো যুদ্ধং সমভবদ্দারুণং রোমহর্ষণম্ ।
সলিলেন্দ্রস্য পুত্রাণাং রাবণস্য চ ধীমতঃ ।। ৭.২৩.৩০ ॥
23.31
অমাত্যৈশ্চ মহাবীর্যৈর্দশগ্রীবস্য রক্ষসঃ ।
বারুণং তদ্বলং কৃত্স্নং ক্ষণেন বিনিপাতিতম্ ।। ৭.২৩.৩১ ॥
23.32
সমীক্ষ্য স্ববলং সঙ্খ্যে বরুণস্য সুতাস্তদা ।
অর্দিতাঃ শরজালেন নিবৃত্তা রণকর্মণঃ ।। ৭.২৩.৩২ ॥
23.33
মহীতলগতাস্তে তু রাবণং দৃশ্য পুষ্পকে ।
আকাশমাশু বিবিশুঃ স্যন্দনৈঃ শীঘ্রগামিভিঃ ।। ৭.২৩.৩৩ ॥
23.34
মহাদাসীত্ততস্তেষাং তুল্যং স্থানমবাপ্য তৎ ।
আকাশয়ুদ্ধং তুমুলং দেবদানবয়োরিব ।। ৭.২৩.৩৪ ॥
23.35
ততস্তে রাবণং যুদ্ধে শরৈঃ পাবকসন্নিভৈঃ ।
বিমুখীকৃত্য সন্তুষ্টা বিনেদুর্বিবিধান্রবান্ ।। ৭.২৩.৩৫ ॥
23.36
ততো মহোদরঃ ক্রুদ্ধো রাজানং দৃশ্য ধর্ষিতম্ ।
ত্যক্ত্বা মৃত্যুভয়ং বীরো যুদ্ধকাঙ্ক্ষী ব্যলোকয়ৎ ।। ৭.২৩.৩৬ ॥
23.37
তেন তে দারুণা যুদ্ধে কামগাঃ পবনোপমাঃ ।
মহোদরেণ গদয়া হতা বৈ প্রয়য়ুঃ ক্ষিতিম্ ।। ৭.২৩.৩৭ ॥
23.38
তেষাং বরুণপুত্রাণাং হত্বা যোধান্হয়াঞ্ছতান্ ।
মুমোচাশু মহানাদং বিরথান্প্রেক্ষ্য তান্স্থিতান্ ।। ৭.২৩.৩৮ ॥
23.39
তে তু তেষাং রথাঃ সাশ্বাঃ সহ সারথিভির্হতৈঃ ।
মহোদরেণ নিহতাঃ পতিতাঃ পৃথিবীতলে ।। ৭.২৩.৩৯ ॥
23.40
তে তু ত্যক্ত্বা রথান্পুত্রা বরুণস্য মহাত্মনঃ ।
আকাশে বিষ্ঠিতাঃ শূরাঃ স্বপ্রভাবান্ন বিব্যথুঃ ।। ৭.২৩.৪০ ॥
23.41
ধনূংষি কৃত্বা সজ্জানি বিনির্ভিদ্য মহোদরম্ ।
রাবণং সমরে ক্রুদ্ধাঃ সহিতাঃ সমভিদ্রবন্ ।। ৭.২৩.৪১ ॥
23.42
সায়কৈশ্চাপবিভ্রষ্টৈর্বজ্রকল্পৈঃ সুদারুণৈঃ ।
দারয়ন্তি স্ম সঙ্ক্রুদ্ধা মেঘা ইব মহাগিরিম্ ।। ৭.২৩.৪২ ॥
23.43
ততঃ ক্রুদ্ধো দশগ্রীবঃ কালাগ্নিরিব নির্গতঃ ।
শরবর্ষৈর্মহাঘোরৈস্তেষাং মর্মস্বতাডয়ৎ ।। ৭.২৩.৪৩ ॥
23.44
ততস্তেনৈব সহসা সীদন্তি স্ম পদাতয়ঃ ।
মুসলানি বিচিত্রাণি ততো ভল্লশতানি চ ।। ৭.২৩.৪৪ ॥
23.45
পট্টিশাংশ্চৈব শক্তীশ্চ শতঘ্নীস্তোমরাংস্তথা ।
পাতয়ামাস দুর্ধর্ষস্তেষামুপরি বিষ্ঠিতঃ ।। ৭.২৩.৪৫ ॥
23.46
অপবিদ্ধাস্তু তে বীরা বিনিষ্পেতুঃ পদাতয়ঃ ।
মহাপঙ্কমিবাসাদ্য কুঞ্জরাষ্ষষ্টিহায়নাঃ ।। ৭.২৩.৪৬ ॥
23.47
সীদমানান্সুতান্দৃষ্ট্বা বিহ্বলান্সুমহৌজসঃ ।
ননাদ রাবণো হর্ষান্মহানম্বুধরো যথা ।। ৭.২৩.৪৭ ॥
23.48
ততো রক্ষো মহানাদান্মুক্ত্বা হন্তি স্ম বারুণান্ ।
নানাপ্রহরণোপেতৈর্ধারাপাতৈরিবাম্বুদঃ ।। ৭.২৩.৪৮ ॥
23.49
ততস্তে বিমুখাঃ সর্বে পতিতা ধরণীতলে ।
রণাত্স্বপুরুষৈঃ শীঘ্রং গৃহাণ্যেব প্রবেশিতাঃ ।। ৭.২৩.৪৯ ॥
23.50
তানব্রবীত্ততো রক্ষো বরুণায় নিবেদ্যতাম্ ।
। ৭.২৩.৫০ ॥
23.51
রাবণং ত্বব্রবীন্মন্ত্রী প্রহস্তো (প্রহসো) নাম বারুণঃ ।
গতঃ খলু মহারাজো ব্রহ্মলোকং জলেশ্বরঃ ।। ৭.২৩.৫১ ॥
23.52
গান্ধর্বং বরুণঃ শ্রোতুং যং ত্বমাহ্বয়সে যুধি ।
তত্কিং তব বৃথা বীর পরিশ্রম্য গতে নৃপে ।যে তু সন্নিহিতা বীরাঃ কুমারাস্তে পরাজিতাঃ ।। ৭.২৩.৫২ ॥
23.53
রাক্ষসেন্দ্রস্তু তচ্ছ্রুত্বা নাম বিশ্রাব্য চাত্মনঃ ।
হর্ষান্নাদং বিমুঞ্চন্বৈ নিষ্ক্রান্তো বরুণালয়াৎ ।। ৭.২৩.৫৩ ॥
23.54
আগতস্তু পথা যেন তেনৈব বিনিবৃত্য সঃ ।
লঙ্কামভিমুখো রক্ষো নভস্তলগতো যয়ৌ ।। ৭.২৩.৫৪ ।।