Utshovসর্গ 22
22.1
স তস্য তু মহানাদং শ্রুত্বা বৈবস্বতঃ প্রভুঃ ।
শত্রুং বিজয়িনং মেনে স্ববলস্য চ সঙ্ক্ষয়ম্ ।। ৭.২২.১ ॥
22.2
স হি যোধান্হতান্মত্বা ক্রোধসংরক্তলোচনঃ ।
অব্রবীত্ত্বরিতং সূতং রথো ঽয়মুপনীয়তাম্ ।। ৭.২২.২ ॥
22.3
তস্য সূতস্তদা দিব্যমুপস্থাপ্য মহারথম্ ।
স্থিতঃ স চ মহাতেজা হ্যধ্যারোহত তং রথম্ ।প্রাশমুদ্গরহস্তশ্চ মৃত্যুস্তস্যাগ্রতঃ স্থিতঃ ।। ৭.২২.৩ ॥
22.4
যেন সঙ্ক্ষিপ্যতে সর্বং ত্রৈলোক্যমিদমব্যয়ম্ ।
কালদণ্ডস্তু পার্শ্বস্থো মূর্তিমানস্য চাভবৎ ।যমপ্রহরণং দিব্যং তেজসা জ্বলদগ্নিমৎ ।। ৭.২২.৪ ॥
22.5
তস্য পার্শ্বেষু নিচ্ছিদ্রাঃ কালপাশাঃ প্রতিষ্ঠিতাঃ ।
। ৭.২২.৫ ।।পাবকস্পর্শসঙ্কাশঃ স্থিতো মূর্তশ্চ মুদ্গরঃ ।। ৭.২২.৬ ॥
22.6
ততো লোকত্রয়ং ক্ষুব্ধমকম্পন্ত দিবৌকসঃ ।
কালং দৃষ্ট্বা তথা ক্রুদ্ধং সর্বলোকভয়াবহম্ ।। ৭.২২.৭ ॥
22.7
ততঃ প্রচোদয়ন্সূতস্তানশ্বান্রুচিরপ্রভান্ ।
প্রয়য়ৌ ভীমসন্নাদো যত্র রক্ষঃপতিঃ স্থিতঃ ।। ৭.২২.৮ ॥
22.8
মুহূর্তেন যমং তে তু হয়া হরিহয়োপমাঃ ।
প্রাপয়ন্মনসস্তুল্যা যত্র তত্প্রস্তুতং রণম্ ।। ৭.২২.৯ ॥
22.9
দৃষ্ট্বা তথৈব বিকৃতং রথং মৃত্যুসমন্বিতম্ ।
সচিবা রাক্ষসেন্দ্রস্য সহসা বিপ্রদুদ্রুবুঃ ।। ৭.২২.১০ ॥
22.10
লঘুসত্ত্বতয়া তে হি নষ্টসঞ্জ্ঞা ভয়ার্দিতাঃ ।
নেহ যোদ্ধুং সমর্থাঃ স্ম ইত্যুক্ত্বা প্রয়য়ুর্দিশঃ ।। ৭.২২.১১ ॥
22.11
স তু তং তাদৃশং দৃষ্ট্বা রথং লোকভয়াবহম্ ।
নাক্ষুভ্যত দশগ্রীবো ন চাপি ভয়মাবিশৎ ।। ৭.২২.১২ ॥
22.12
স তু রাবণমাসাদ্য ব্যসৃজচ্ছক্তিতোমরান্ ।
যমো মর্মাণি সঙ্ক্রুদ্ধো রাবণস্যোপকৃন্তত ।। ৭.২২.১৩ ॥
22.13
রাবণস্তু ততঃ স্বস্থঃ শরবর্ষং মুমোচ হ ।
তস্মিন্বৈবস্বতরথে তোয়বর্ষমিবাম্বুদঃ ।। ৭.২২.১৪ ॥
22.14
ততো মহাশক্তিশরৈঃ পাত্যমানৈর্মহোরসি (পাত্যমানো) ।
নাশক্নোত্প্রতিকর্তুং স রাক্ষসঃ শল্যপীডিতঃ ।। ৭.২২.১৫ ॥
22.15
এবং নানাপ্রহরণৈর্যমেনামিত্রকর্ষিণা ।
সপ্তরাত্রং কৃতঃ সঙ্খ্যে বিসঞ্জ্ঞো বিমুখো রিপুঃ ।। ৭.২২.১৬ ॥
22.16
তদাসীত্তুমুলং যুদ্ধং যমরাক্ষসয়োর্দ্বয়োঃ ।
জয়মাকাঙ্ক্ষতোর্বীর সমরেষ্বনিবর্তিনোঃ ।। ৭.২২.১৭ ॥
22.17
ততো দেবাঃ সগন্ধর্বাঃ সিদ্ধাশ্চ পরমর্ষয়ঃ ।
প্রজাপতিং পুরস্কৃত্য সমেতাস্তদ্রণাজিরম্ ।। ৭.২২.১৮ ॥
22.18
সংবর্ত ইব লোকানাং ক্রুধ্যতোরভবত্তদা ।
রাক্ষসানাং চ মুখ্যস্য প্রেতানামীশ্বরস্য চ ।। ৭.২২.১৯ ॥
22.19
রাক্ষসেন্দ্রো ঽপি বিস্ফার্য চাপমিন্দ্রাশনিপ্রভম্ ।
নিরন্তরমিবাকাশং কুর্বন্বাণাংস্ততো ঽসৃজৎ ।। ৭.২২.২০ ॥
22.20
মৃত্যুং চতুর্ভির্বিশিখৈঃ সূতং সপ্তভিরার্দয়ৎ ।
যমং শতসহস্রেণ শীঘ্রং মর্মস্বতাডয়ৎ ।। ৭.২২.২১ ॥
22.21
ততঃ ক্রুদ্ধস্য বদনাদ্যমস্য সমজায়ত ।
জ্বালামালী সনিঃশ্বাসঃ সধূমঃ কোপপাবকঃ ।। ৭.২২.২২ ॥
22.22
তদাশ্চর্যমথো দৃষ্ট্বা দেবদানবসন্নিধৌ ।
প্রহর্ষিতৌ সুসংরব্ধৌ মৃত্যুকালৌ বভূবতুঃ ।। ৭.২২.২৩ ॥
22.23
ততো মৃত্যুঃ ক্রুদ্ধতরো বৈবস্বতমভাষত ।
মুঞ্চ মাং সমরে যাবদ্ধন্মীমং পাপরাক্ষসম্ ।নৈষা রক্ষো ভবেদদ্য মর্যাদা হি নিসর্গতঃ ।। ৭.২২.২৪ ॥
22.24
হিরণ্যকশিপুঃ শ্রীমান্নমুচিঃ শম্বরস্তথা ।
বিসন্ধির্ধূমকেতুশ্চ বলির্বৈরোচনো ঽপি চ ।। ৭.২২.২৫ ॥
22.25
দম্ভুর্দৈত্যমহারাজো বৃত্রো বাণস্তথৈব চ ।
রাজর্ষয়ঃ শাস্ত্রবিদো গন্ধর্বাঃ সমহোরগাঃ ।। ৭.২২.২৬ ॥
22.26
ঋষয়ঃ পন্নগা দৈত্যা যক্ষাশ্চাপ্যপ্সরোগণাঃ ।
যুগান্তপরিবর্তে চ পৃথিবী সমহার্ণবা ।। ৭.২২.২৭ ॥
22.27
ক্ষয়ং নীতা মহারাজ সপর্বতসরিদ্দ্রুমা ।
এতে চান্যে চ বহবো বলবন্তো দুরাসদাঃ ।। ৭.২২.২৮ ॥
22.28
বিনিপন্না ময়া দৃষ্টাঃ কিমুতায়ং নিশাচরঃ ।
। ৭.২২.২৯ ॥
22.29
মুঞ্চং মাং সাধু ধর্মজ্ঞ যাবদেনং নিহন্ম্যহম্ ।
নহি কশ্চিন্ময়া দৃষ্টো বলবানপি জীবতি ।। ৭.২২.৩০ ॥
22.30
বলং মম ন খল্বেতন্মর্যাদৈষা নিসর্গতঃ ।
স দৃষ্টো ন ময়া কালং মুহুর্তমাপি জীবতি ।। ৭.২২.৩১ ॥
22.31
তস্যৈবং বচনং শ্রুত্বা ধর্মরাজঃ প্রতাপবান্ ।
অব্রবীত্তত্র তং মুত্যুং ত্বং তিষ্ঠৈনং নিহন্ম্যহম্ ।। ৭.২২.৩২ ॥
22.32
ততঃ সংরক্তনয়নঃ ক্রুদ্ধো বৈবস্বতঃ প্রভুঃ ।
কালদণ্ডমমোঘং তু তোলয়ামাস পাণিনা ।। ৭.২২.৩৩ ॥
22.33
যস্য পার্শ্বেষু নিখিলা কালপাশাঃ প্রতিষ্ঠিতাঃ ।
পাবকাশনিসঙ্কাশো মুদ্গরো মূর্তিমান্স্থিতঃ ।। ৭.২২.৩৪ ॥
22.34
দর্শনাদেব যঃ প্রাণান্প্রাণিনামপকর্ষতি ।
কিং পুনঃ স্পৃশ্যমানস্য পাত্যমানস্য বা পুনঃ ।। ৭.২২.৩৫ ॥
22.35
স জ্বালাপরিবারস্তু নির্দহন্নিব রাক্ষসম্ ।
তেন স্পৃষ্টো বলবতা মহাপ্রহরণো ঽস্ফুরৎ ।। ৭.২২.৩৬ ॥
22.36
ততো বিদুদ্রুবুঃ সর্বে তস্মাত্রস্তা রণাজিরে ।
সুরাশ্চ ক্ষুভিতাঃ সর্বে দৃষ্ট্বা দণ্ডোদ্যতং যমম্ ।। ৭.২২.৩৭ ॥
22.37
তস্মিন্প্রহর্তুকামে তু যমে দণ্ডেন রাবণম্ ।
যমং পিতামহঃ সাক্ষাদ্দর্শয়িত্বেদমব্রবীৎ ।। ৭.২২.৩৮ ॥
22.38
বৈবস্বত মহাবাহো ন খল্বমিতবিক্রম ।
ন হন্তব্যস্ত্বয়া তেন দণ্ডেনৈব নিশাচরঃ ।। ৭.২২.৩৯ ॥
22.39
বরঃ খলু ময়ৈতস্মৈ দত্তস্ত্রিদশপুঙ্গব ।
স ত্বয়া নানৃতঃ কার্যো যন্ময়া ব্যাহৃতং বচঃ ।। ৭.২২.৪০ ॥
22.40
যো হি মামনৃতং কুর্যাদ্দেবো বা মানুষো ঽপি বা ।
ত্রৈলোক্যমনৃতং তেন কৃতং স্যান্নাত্র সংশয়ঃ ।। ৭.২২.৪১ ॥
22.41
ক্রুদ্ধেন বিপ্রমুক্তো ঽয়ং নির্বিশেষং প্রিয়াপ্রিয়ে ।
প্রজাঃ সংহরতে রৌদ্রো লোকত্রয়ভয়াবহঃ ।। ৭.২২.৪২ ॥
22.42
অমোঘো হ্যেষ সর্বেষাং প্রাণিনামমিতপ্রভঃ ।
কালদণ্ডো ময়া সৃষ্টঃ পূর্বং মৃত্যুপুরস্কৃতঃ ।। ৭.২২.৪৩ ॥
22.43
তন্ন খল্বেষ তে সৌম্য পাত্যো রাবণমূর্ধনি ।
নহ্যস্মিন্পতিতে কশ্চিন্মুহূর্তমপি জীবতি ।। ৭.২২.৪৪ ॥
22.44
যদি হ্যন্মিন্নিপতিতে ন ম্রিয়েতৈষ রাক্ষসঃ ।
ম্রিয়তে বা দশগ্রীবস্তদাপ্যুভয়তো ঽনৃতম্ ।। ৭.২২.৪৫ ॥
22.45
তন্নিবর্তয় লঙ্কেশং দ্দণ্ডমেতং সমুদ্যতম্ ।
সত্যং চ মাং কুরুষ্বাদ্য লোকাংস্ত্বং যদ্যবেক্ষসে ।। ৭.২২.৪৬ ॥
22.46
এবমুক্তস্তু ধর্মাত্মা প্রত্যুবাচ যমস্তদা ।
এষ ব্যাবর্তিতো দণ্ডঃ প্রভবিষ্ণুর্হি নো ভবান্ ।। ৭.২২.৪৭ ॥
22.47
কিং ন্বিদানীং ময়া শক্যং কর্তুং রণগতেন হি ।
ন ময়া যদ্যয়ং শক্যো হন্তুং বরপুরস্কৃতঃ ।। ৭.২২.৪৮ ॥
22.48
এষ তস্মাত্প্রণশ্যামি দর্শনাদস্য রক্ষসঃ ।
ইত্যুক্ত্বা সরথঃ সাশ্বস্তত্রৈবান্তরধীয়ত ।। ৭.২২.৪৯ ॥
22.49
দশগ্রীবস্তু তং জিত্বা নাম বিশ্রাব্য চাত্মনঃ ।
আরুহ্য পুষ্পকং ভূয়ো নিষ্ক্রান্তো যমসাদনাৎ ।। ৭.২২.৫০ ॥
22.50
স তু বৈবস্বতো দেবৈঃ সহ ব্রহ্মপুরোগমৈঃ ।
জগাম ত্রিদিবং হৃষ্টো নারদশ্চ মহামুনিঃ ।। ৭.২২.৫১ ।।