Utshovসর্গ 2
2.1
তস্য তদ্বচনং শ্রুত্বা রাঘবস্য মহাত্মনঃ ।
কুম্ভয়োনির্মিহাতেজা রামমেতদুবাচ হ ।। ৭.২.১ ॥
2.2
শৃণু রাম কথাবৃত্তং তস্য তেজোবলং মহৎ ।
জঘান শত্রূন্যেনাসৌ ন চ বধ্যঃ স শত্রুভিঃ ।। ৭.২.২ ॥
2.3
তাবত্তে রাবণস্যেদং কুলং জন্ম চ রাঘব ।
বরপ্রদানং চ তথা তস্মৈ দত্তং ব্রবীমি তে ।। ৭.২.৩ ॥
2.4
পুরা কৃতয়ুগে রাম প্রজাপতিসুতঃ প্রভুঃ ।
পুলস্ত্যো নাম ব্রহ্মর্ষিঃ সাক্ষাদিব পিতামহঃ ।। ৭.২.৪ ॥
2.5
নানুকীর্ত্যা গুণাস্তস্য ধর্মতঃ শীলতস্তথা ।
প্রজাপতেঃ পুত্র ইতি বক্তুং শক্যং হি নামতঃ ।। ৭.২.৫ ॥
2.6
প্রজাপতিসুতত্বেন দেবানাং বল্লভো হি সঃ ।
হৃষ্টঃ সর্বস্য লোকস্য গুণৈঃ শুভ্রৈর্মহামতিঃ ।। ৭.২.৬ ॥
2.7
স তু ধর্মপ্রসঙ্গেন মেরোঃ পার্শ্বে মহাগিরেঃ ।
তৃণবিন্দ্বাশ্রমং গত্বা ন্যবসন্মুনিপুঙ্গবঃ ।। ৭.২.৭ ॥
2.8
তপস্তেপে স ধর্মাত্মা স্বাধ্যায়নিয়তেন্দ্রিয়ঃ ।
গত্বাশ্রমপদং তস্য বিঘ্নং কুর্বন্তি কন্যকাঃ ।। ৭.২.৮ ॥
2.9
দেবপন্নগকন্যাশ্চ রাজর্ষিতনয়াশ্চ যাঃ ।
ক্রীডন্ত্যো ঽপ্সরসশ্চৈব তং দেশমুপপেদিরে ।। ৭.২.৯ ॥
2.10
সর্বর্তুষৃপভোগ্যত্বাদ্রম্যত্বাত্কাননস্য চ ।
নিত্যশস্তাস্তু তং দেশং গত্বা ক্রীডন্তি কন্যকাঃ ।। ৭.২.১০ ॥
2.11
দেশস্য রমণীয়ত্বাত্পুলস্ত্যো যত্র স দ্বিজঃ ।
গায়ন্ত্যো বাদয়ন্ত্যশ্চ লাসয়ন্ত্যস্তথৈব চ ।মুনেস্তপস্বিনস্তস্য বিঘ্নং চক্রুরনিন্দিতাঃ ।। ৭.২.১১ ॥
2.12
অথ ক্রুদ্ধো মহাতেজা ব্যাজহার মহামুনিঃ ।
যা মে দর্শনমাগচ্ছেত্সা গর্ভং ধারয়িষ্যতি ।। ৭.২.১২ ॥
2.13
তাস্তু সর্বাঃ প্রতিশ্রুত্য তস্য বাক্যং মহাত্মনঃ ।
ব্রহ্মশাপভয়াদ্ভীতাস্তং দেশং নোপচক্রমুঃ ।। ৭.২.১৩ ॥
2.14
তৃণবিন্দোস্তু রাজর্ষেস্তনয়া ন শৃণোতি তৎ ।
। ৭.২.১৪ ॥
2.15
গত্বাশ্রমপদং তত্র বিচচার সুনির্ভয়া ।
ন সাপশ্যত্স্থিতা তত্র কাঞ্চিদভ্যাগতাং সখীম্ ।। ৭.২.১৫ ॥
2.16
তস্মিন্কালে মহাতেজাঃ প্রাজাপত্যো মহানৃষিঃ ।
স্বাধ্যায়মকরোত্তত্র তপসা ভাবিতঃ স্বয়ম্ ।। ৭.২.১৬ ॥
2.17
সা তু বেদশ্রুতিং শ্রুত্বা দৃষ্ট্বা বৈ তপসো নিধিম্ ।
অভবত্পাণ্ডুদেহা সা সুব্যঞ্জিতশরীরজা ।। ৭.২.১৭ ॥
2.18
বভূব চ সমুদ্বিগ্না দৃষ্ট্বা তদ্দোষমাত্মনঃ ।
ইদং মে কিন্ত্বিতি জ্ঞাত্বা পিতুর্গত্বা ঽ ঽশ্রমে স্থিতা ।। ৭.২.১৮ ॥
2.19
তাং তু দৃষ্ট্বা তথাভূতাং তৃণবিন্দুরথাব্রবীৎ ।
কিং ত্বমেতত্ত্বসদৃশং ধারয়স্যাত্মনো বপুঃ ।। ৭.২.১৯ ॥
2.20
সা তু কৃত্বাঞ্জলিং দীনা কন্যোবাচ তপোধনম্ ।
ন জানে কারণং তাত যেন মে রূপমীদৃশম্ ।। ৭.২.২০ ॥
2.21
কিং তু পূর্বং গতাস্ম্যেকা মহর্ষের্ভাবিতাত্মনঃ ।
পুলস্ত্যস্যাশ্রমং দিব্যমন্বেষ্টুং স্বসখীজনম্ ।। ৭.২.২১ ॥
2.22
ন চ পশ্যাম্যহং তত্র কাঞ্চিদভ্যাগতাং সখীম্ ।
রূপস্য তু বিপর্যাসং দৃষ্ট্বা ত্রাসাদিহাগতা ।। ৭.২.২২ ॥
2.23
তৃণবিন্দুস্তু রাজর্ষিস্তপসা দ্যোতিতপ্রভঃ ।
ধ্যানং বিবেশ তচ্চাপি হ্যপশ্যদৃষিকর্মজম্ ।। ৭.২.২৩ ॥
2.24
স তু বিজ্ঞায় তং শাপং মহর্ষের্ভাবিতাত্মনঃ ।
গৃহীত্বা তনয়াং গত্বা পুলস্ত্যমিদমব্রবীৎ ।। ৭.২.২৪ ॥
2.25
ভগবংস্তনয়াং মে ত্বং গুণৈঃ স্বৈরেব ভূষিতাম্ ।
ভিক্ষাং প্রতিগৃহাণেমাং মহর্ষে স্বয়মুদ্যতাম্ ।। ৭.২.২৫ ॥
2.26
তপশ্চরণয়ুক্তস্য শ্রম্যমাণেন্দ্রিয়স্য তে ।
শুশ্রূষণপরা নিত্যং ভবিষ্যতি ন সংশয়ঃ ।। ৭.২.২৬ ॥
2.27
তং ব্রুবাণং তু তদ্বাক্যং রাজর্ষিং ধার্মিকং তদা ।
জিঘৃক্ষুরব্রবীত্কন্যাং বাঢমিত্যেব স দ্বিজঃ ।। ৭.২.২৭ ॥
2.28
দত্ত্বা স তু যথান্যায়ং স্বমাশ্রমপদং গতঃ ।
সাপি তত্রাবসত্কন্যা তোষয়ন্তী পতিং গুণৈঃ ।। ৭.২.২৮ ॥
2.29
তস্যাস্তু শীলবৃত্তাভ্যাং তুতোষ মুনিপুঙ্গবঃ ।
প্রীতঃ স তু মহাতেজা বাক্যমেতদুবাচ হ ।। ৭.২.২৯ ॥
2.30
পরিতুষ্টো ঽস্মি সুশ্রোণি গুণানাং সম্পদা ভৃশম্ ।
তস্মাদ্দেবি দদাম্যদ্য পুত্রমাত্মসমং তব ।। ৭.২.৩০ ॥
2.31
উভয়োর্বংশকর্তারং পৌলস্ত্য ইতি বিশ্রুতম্ ।
যস্মাত্তু বিশ্রুতো বেদস্ত্বয়ৈষো ঽধ্যয়তো মম ।। ৭.২.৩১ ॥
2.32
তস্মাত্স বিশ্রবা নাম ভবিষ্যতি ন সংশয়ঃ ।
এবমুক্তা তু সা দেবী প্রহৃষ্টেনান্তরাত্মনা ।। ৭.২.৩২ ॥
2.33
অচিরেণৈব কালেনাসূত বিশ্রবসং সুতম্ ।
ত্রিষু লোকেষু বিখ্যাতং যশোধর্মসমন্বিতম্ ।। ৭.২.৩৩ ॥
2.34
শ্রুতিমান্সমদর্শী চ ব্রতাচাররতস্তথা ।
পিতেব তপসা যুক্তো হ্যভবদ্বিশ্রবা মুনিঃ ।। ৭.২.৩৪ ।।