Utshovসর্গ 18
18.1
প্রবিষ্টায়াং হুতাশং তু বেদবত্যাং স রাবণঃ ।
পুষ্পকং তু সমারুহ্য পরিচক্রাম মেদিনীম্ ।। ৭.১৮.১ ॥
18.2
ততো মরুত্তং নৃপতিং যজন্তং সহ দৈবতৈঃ ।
উশীরবীজমাসাদ্য দদর্শ স তু রাবণঃ ।। ৭.১৮.২ ॥
18.3
সংবর্তো নাম ব্রহ্মর্ষিঃ সাক্ষাদ্ভ্রাতা বৃহস্পতেঃ ।
যাজয়ামাস ধর্মজ্ঞঃ সর্বৈর্দেবগণৈর্বৃতঃ ।। ৭.১৮.৩ ॥
18.4
দৃষ্ট্বা দেবাস্তু তদ্রক্ষো বরদানেন দুর্জয়ম্ ।
তির্যগ্যোনিং সমাবিষ্টাস্তস্য দর্শনভীরবঃ ।। ৭.১৮.৪ ॥
18.5
ইন্দ্রো ময়ূরঃ সংবৃত্তো ধর্মরাজস্তু বায়সঃ ।
কৃকলাসো ধনাধ্যক্ষো হংসশ্চ বরুণো ঽভবৎ ।। ৭.১৮.৫ ॥
18.6
অন্যেষ্বপি গতেষ্বেবং দেবেষ্বরিনিষূদন ।
রাবণঃ প্রাবিশদ্যজ্ঞং সারমেয় ইবাশুচিঃ ।। ৭.১৮.৬ ॥
18.7
তং চ রাজানমাসাদ্য রাবণো রাক্ষসাধিপঃ ।
প্রাহ যুদ্ধং প্রয়চ্ছেতি নির্জিতো ঽস্মীতি বা বদ ।। ৭.১৮.৭ ॥
18.8
ততো মরুত্তো নৃপতিঃ কো ভবানিত্যুবাচ তম্ ।
অপহাসং ততো মুক্ত্বা রাবণো বাক্যমব্রবীৎ ।। ৭.১৮.৮ ॥
18.9
অকুতূহলভাবেন প্রীতো ঽস্মি তব পার্থিব ।
ধনদস্যানুজং যো মাং নাবগচ্ছসি রাবণম্ ।। ৭.১৮.৯ ॥
18.10
ত্রিষু লোকেষু কো ঽন্যো ঽস্তি যো ন জানাতি মে বলম্ ।
ভ্রাতরং যেন নির্জিত্য বিমানমিদমাহৃতম্ ।ততো মরুত্তঃ স নৃপস্তং রাবণমথাব্রবীৎ ।। ৭.১৮.১০ ॥
18.11
ধন্যঃ খলু ভবান্যেন জ্যেষ্ঠো ভ্রাতা রণে জিতঃ ।
ন ত্বয়া সদৃশঃ শ্লাধ্যস্ত্রিষু লোকেষু বিদ্যতে ।। ৭.১৮.১১ ॥
18.12
নাধর্মসহিতং শ্লাধ্যং তল্লোকং প্রতিসংহিতম্ ।
কর্ম দৌরাত্ম্যকং কৃত্বা শ্লাঘ্যসে ভ্রাতৃনির্জয়াৎ ।। ৭.১৮.১২ ॥
18.13
ক ত্বং প্রাক্কেবলং ধর্মং চরিত্বা লব্ধবান্বরম্ ।
শ্রূতপূর্বং হি ন ময়া ভাষসে যাদৃশং স্বয়ম্ ।। ৭.১৮.১৩ ॥
18.14
তিষ্ঠেদানীং ন মে জীবন্প্রতিয়াস্যসি দুর্মতে ।
অদ্য ত্বাং নিশিতৈর্বাণৈঃ প্রেষয়ামি যমক্ষয়ম্ ।। ৭.১৮.১৪ ॥
18.15
ততঃ শরাসনং গৃহ্য সায়কাংশ্চ নরাধিপঃ ।
রণায় নির্যয়ৌ ক্রুদ্ধঃ সংবর্তো মার্গমাবৃণোৎ ।। ৭.১৮.১৫ ॥
18.16
সো ঽব্রবীত্স্নেহসংয়ুক্তং মরুত্তং তং মহানৃষিঃ ।
শ্রোতব্যং যদি মদ্বাক্যং সম্প্রহারো ন তে ক্ষমঃ ।। ৭.১৮.১৬ ॥
18.17
মাহেশ্বরমিদং সত্রমসমাপ্তং কুলং দহেৎ ।
। ৭.১৮.১৭ ॥
18.18
দীক্ষিতস্য কুতো যুদ্ধং ক্রোধিত্বং দীক্ষিতে কুতঃ ।
সংশয়শ্চ জয়ে নিত্যং রাক্ষসশ্চ সুদুর্জয়ঃ ।। ৭.১৮.১৮ ॥
18.19
স নিবৃত্তো গুরোর্বাক্যান্মরুত্তঃ পৃথিবীপতিঃ ।
বিসৃজ্য সশরং চাপং স্বস্থো মখমুখো ঽভবৎ ।। ৭.১৮.১৯ ॥
18.20
ততস্তং নির্জিতং মত্বা ঘোষয়ামাস বৈ শুকঃ ।
রাবণো জয়তীত্যুচ্চৈর্হর্ষান্নাদং বিমুক্তবান্ ।। ৭.১৮.২০ ॥
18.21
তান্ভক্ষয়িত্বা তত্রস্থান্মহর্ষীন্যজ্ঞমাগতান্ ।
বিতৃপ্তো রুধিরৈস্তেষাং পুনঃ সম্প্রয়য়ৌ মহীম্ ।। ৭.১৮.২১ ॥
18.22
রাবণে তু গতে দেবাঃ সেন্দ্রাশ্চৈব দিবৌকসঃ ।
ততঃ স্বাং যোনিমাসাদ্য তানি সত্ত্বানি চাব্রুবন্ ।। ৭.১৮.২২ ॥
18.23
হর্ষাত্তদাব্রবীদিন্দ্রো ময়ূরং নীলবর্হিণম্ ।
প্রীতো ঽস্মি তব ধর্মজ্ঞ ভুজঙ্গাদ্ধি ন তে ভয়ম্ ।। ৭.১৮.২৩ ॥
18.24
ইদং নেত্রসহস্রং তু যত্ত্বদ্বর্হে ভবিষ্যতি ।
বর্ষমাণে ময়ি মুদং প্রাপ্স্যসে প্রীতিলক্ষণাম্ ।এবমিন্দ্রো বরং প্রাদান্ময়ূরস্য সুরেশ্বরঃ ।। ৭.১৮.২৪ ॥
18.25
নীলাঃ কিল পুরা বর্হা ময়ূরাণাং নরাধিপ ।
সুরাধিপাদ্বরং প্রাপ্য গতাঃ সর্বে ঽপি বর্হিণঃ ।। ৭.১৮.২৫ ॥
18.26
ধর্মরাজো ঽব্রবীদ্রাম প্রাগ্বংশে বায়সং স্থিতম্ ।
পক্ষিংস্তবাস্মি সুপ্রীতঃ প্রীতস্য বচনং শৃণু ।। ৭.১৮.২৬ ॥
18.27
যথান্যে বিবিধৈ রোগৈ; পীড্যন্তে প্রাণিনো ময়া ।
তে ন তে প্রভবিষ্যন্তি ময়ি প্রীতে ন সংশয়ঃ ।। ৭.১৮.২৭ ॥
18.28
মৃত্যুতস্তে ভয়ং নাস্তি বরান্মম বিহঙ্গম ।
যাবত্ত্বাং ন বধিষ্যন্তি নরাস্তাবদ্ভবিষ্যসি ।। ৭.১৮.২৮ ॥
18.29
এতে মদ্বিষয়স্থা বৈ মানবাঃ ক্ষুদ্ভয়ার্দিতাঃ ।
ত্বয়ি ভুক্তে তু তৃপ্তাস্তে ভবিষ্যন্তি সবান্ধবাঃ ।। ৭.১৮.২৯ ॥
18.30
বরুণস্ত্বব্রবীদ্ধংসং গঙ্গাতোয়বিহারিণম্ ।
শ্রূয়তাং প্রীতিসংয়ুক্তং বচঃ পত্ররথেশ্বর ।। ৭.১৮.৩০ ॥
18.31
বর্ণো মনোহরঃ সৌম্যশ্চন্দ্রমণ্ডলসন্নিভঃ ।
ভবিষ্যতি তবোদগ্রঃ শুদ্ধফেনসমপ্রভঃ ।। ৭.১৮.৩১ ॥
18.32
মচ্ছরীরং সমাসাদ্য কান্তো নিত্যং ভবিষ্যসি ।
প্রাপ্স্যসে চাতুলাং প্রীতিমেতন্মে প্রীতিলক্ষণম্ ।। ৭.১৮.৩২ ॥
18.33
হংসানাং হি পুরা রাম নীলবর্ণঃ সপাণ্ডুরঃ ।
পক্ষা নীলাগ্রসংবীতাঃ ক্রোডাঃ শষ্পাগ্রনির্মলাঃ ।। ৭.১৮.৩৩ ॥
18.34
অথাব্রবীদ্বৈশ্রবণঃ কৃকলাসং গিরৌ স্থিতম্ ।
হৈরণ্যং সম্প্রয়চ্ছামি বর্ণং প্রীতস্তবাপ্যহম্ ।। ৭.১৮.৩৪ ॥
18.35
সদ্রব্যং চ শিরো নিত্যং ভবিষ্যতি তবাক্ষয়ম্ ।
এষ কাঞ্চনকো বর্ণো মত্প্রীত্যা তে ভবিষ্যতি ।। ৭.১৮.৩৫ ॥
18.36
এবং দত্ত্বা বরাংস্তেভ্যস্তস্মিন্যজ্ঞোত্সবে সুরাঃ ।
নিবৃত্তাঃ সহ রাজ্ঞা তে পুনঃ স্বভবনং গতাঃ ।। ৭.১৮.৩৬ ।।