Utshovসর্গ 15
15.1
ততস্তাঁল্লক্ষ্য বিত্রস্তান্যক্ষেন্দ্রাংশ্চ সহস্রশঃ ।
ধনাধ্যক্ষো মহায়ক্ষং মাণিচারমথাব্রবীৎ ।। ৭.১৫.১ ॥
15.2
রাবণং জহি যক্ষেন্দ্র দুর্বৃত্তং পাপচেতসম্ ।
শরণং ভব বীরাণাং যক্ষাণাং যুদ্ধশালিনাম্ ।। ৭.১৫.২ ॥
15.3
এবমুক্তো মহাবাহুর্মাণিভদ্রঃ সুদুর্জয়ঃ ।
বৃতো যক্ষসহস্রৈস্তু চতুর্ভিঃ সময়োধয়ৎ ।। ৭.১৫.৩ ॥
15.4
তে গদামুসলপ্রাসৈঃ শক্তিতোমরমুদ্গরৈঃ ।
অভিঘ্নন্তস্তদা যক্ষা রাক্ষসান্সমুপাদ্রবন্ ।। ৭.১৫.৪ ॥
15.5
কুর্বন্তস্তুমুলং যুদ্ধং চরন্তঃ শ্যেনবল্লঘু ।
বাঢং প্রয়চ্ছন্নেচ্ছামি দীয়তামিতি ভাষিণঃ ।। ৭.১৫.৫ ॥
15.6
ততো দেবাঃ সগন্ধর্বা ঋষয়ো ব্রহ্মবাদিনঃ ।
দৃষ্ট্বা তত্তুমুলং যুদ্ধং পরং বিস্ময়মাগমন্ ।। ৭.১৫.৬ ॥
15.7
যক্ষাণাং তু প্রহস্তেন সহস্রং নিহতং রণে ।
মহোদরেণ চানিন্দ্যং সহস্রমপরং হতম্ ।। ৭.১৫.৭ ॥
15.8
ক্রুদ্ধেন চ তদা রাজন্মারীচেন যুয়ুত্সুনা ।
নিমেষান্তরমাত্রেণ দ্বে সহস্রে নিপাতিতে ।। ৭.১৫.৮ ॥
15.9
ক্ব চ যক্ষার্জবং যুদ্ধং ক্ব চ মায়াবলাশ্রয়ম্ ।
রক্ষসাং পুরুষব্যাঘ্র তেন তে ঽভ্যধিকা যুধি ।। ৭.১৫.৯ ॥
15.10
ধূম্রাক্ষেণ সমাগম্য মাণিভদ্রো মহারণে ।
মুসলেনোরসি ক্রোধাত্তডিতো ন চ কম্পিতঃ ।। ৭.১৫.১০ ॥
15.11
ততো গদাং সমাবিধ্য মাণিভদ্রেণ রাক্ষসঃ ।
ধূম্রাক্ষস্তাডিতো মূর্ধ্নি বিহ্বলঃ স পপাত হ ।। ৭.১৫.১১ ॥
15.12
ধূম্রাক্ষং তাডিতং দৃষ্ট্বা পতিতং শোণিতোক্ষিতম্ ।
অভ্যধাবত সঙ্গ্রামে মাণিভদ্রং দশাননঃ ।। ৭.১৫.১২ ॥
15.13
তং ক্রুদ্ধমভিধাবন্তং মাণিভদ্রো দশাননম্ ।
শক্তিভিস্তাডয়ামাস তিসৃভির্যক্ষপুঙ্গবঃ ।। ৭.১৫.১৩ ॥
15.14
তাডিতো মাণিভদ্রস্য মুকুটে প্রাহরদ্রণে ।
তস্য তেন প্রহারেম মুকুটং পার্শ্বমাগতম্ ।। ৭.১৫.১৪ ॥
15.15
ততঃ সংয়ুধ্যমানেন বিষ্টব্ধো ন ব্যকম্পত ।
তদাপ্রভৃতি যক্ষো ঽসৌ পার্শ্বমৌলিরিতি স্মৃতঃ ।সন্নাদঃ সুমহান্রাজংস্তস্মিন্শৈলে ঽভ্যবর্তত ।। ৭.১৫.১৫ ॥
15.16
ততো দূরাত্প্রদদৃশে ধনাধ্যক্ষো গদাধরঃ ।
শুক্রপ্রৌষ্ঠপদাভ্যাং চ পদ্মশঙ্খসমাবৃতঃ ।। ৭.১৫.১৬ ॥
15.17
স দৃষ্ট্বা ভ্রাতরং সঙ্খ্যে শাপাদ্বিভ্রষ্টগৌরবম্ ।
উবাচ বচনং ধীমান্যুক্তং পৈতামহে কুলে ।। ৭.১৫.১৭ ॥
15.18
যন্ময়া বার্যমাণস্ত্বং নাবগচ্ছসি দুর্মতে ।
পশ্চাদস্য ফলং প্রাপ্য জ্ঞাস্যসে নিরয়ং গতঃ ।। ৭.১৫.১৮ ॥
15.19
যো হি মোহাদ্বিষং পীত্বা নাবগচ্ছতি দুর্মতিঃ ।
স তস্য পরিণামান্তে জানীতে কর্মণঃ ফলম্ ।। ৭.১৫.১৯ ॥
15.20
দেবতা নাভিনন্দন্তি ধর্ময়ুক্তেন কেনচিৎ ।
যেন ত্বমীদৃশং ভাবং নীতস্সন্নাববুদ্ধ্যসে ।। ৭.১৫.২০ ॥
15.21
মাতরং পিতরং যো হি আচার্যং চাবমন্যতে ।
স পশ্যতি ফলং তস্য প্রেতরাজবশং গতঃ ।। ৭.১৫.২১ ॥
15.22
অধ্রুবে হি শরীরে যো ন করোতি তপোর্জনম্ ।
স পশ্চাত্তপ্যতে মূঢো মৃতো দৃষ্ট্বা ঽ ঽত্মনো গতিম্ ।। ৭.১৫.২২ ॥
15.23
ধর্মাদ্রাজ্যং ধনং সৌখ্যমধর্মাদ্দুঃখমেব চ ।
তস্মাদ্ধর্মং সুখার্থায় কুর্যাত্পাপং বিসর্জয়েৎ ।। ৭.১৫.২৩ ॥
15.24
পাপস্য হি ফলং দুঃখং তদ্ভোক্তব্যমিহাত্মনা ।
তস্মাদাত্মাপঘাতার্থং মূঢঃ পাপং করিষ্যতি ।। ৭.১৫.২৪ ॥
15.25
কস্য চিন্ন হি দুর্বুদ্ধেশ্ছন্দতো জায়তে মতিঃ ।
দেবং চেষ্টয়তে সর্বং হতো দৈবেন হন্যতে ।যাদৃশং কুরুতে কর্ম তাদৃশং ফলমশ্নুতে ।। ৭.১৫.২৫ ॥
15.26
বুদ্ধিরূপং ফলং পুত্রাঞ্ছৌর্যং ধীরত্বমেব চ ।
প্রাপ্নুবন্তি নরা লোকে নির্জিতং পুণ্যকর্মভিঃ ।। ৭.১৫.২৬ ॥
15.27
এবং নিরয়গামী ত্বং যস্য তে মতিরীদৃশী ।
ন ত্বাং সমভিভাষিষ্যে ঽসদ্বৃত্তেষ্বেব নির্ণয়ঃ ।। ৭.১৫.২৭ ॥
15.28
এবমুক্তাস্ততস্তেন তস্যামাত্যাঃ সমাহতাঃ ।
মারীচপ্রমুখাঃ সর্বে বিমুখা বিপ্রদুদ্রুবুঃ ।। ৭.১৫.২৮ ॥
15.29
ততস্তেন দশগ্রীবো যক্ষেন্দ্রেণ মহাত্মনা ।
গদয়াভিহতো মূর্ধ্নি ন চ স্থানাত্প্রকম্পিতঃ ।। ৭.১৫.২৯ ॥
15.30
ততস্তৌ রাম নিঘ্নন্তৌ তদান্যোন্যং মহামৃধে ।
ন বিহ্বলৌ ন চ শ্রান্তৌ বভূবতুরমর্ষণৌ ।। ৭.১৫.৩০ ॥
15.31
আগ্নেয়মস্ত্রং তস্মৈ স মুমোচ ধনদস্তদা ।
রাক্ষসেন্দ্রো বারুণেন তদস্ত্রং প্রত্যবারয়ৎ ।। ৭.১৫.৩১ ॥
15.32
ততো মায়াং প্রবিষ্টো ঽসৌ রাক্ষসীং রাক্ষসেশ্বরঃ ।
রূপাণাং শতসাহস্রং বিনাশায় চকার চ ।। ৭.১৫.৩২ ॥
15.33
ব্যাঘ্রো বরাহো জীমূতঃ পর্বতঃ সাগরো দ্রুমঃ ।
যক্ষো দৈত্যস্বরূপী চ সো ঽদৃশ্যত দশাননঃ ।। ৭.১৫.৩৩ ॥
15.34
বহূনি চ করোতি স্ম দৃশ্যন্তে ন ত্বসৌ ততঃ ।
প্রতিগৃহ্য ততো রাম মহদস্ত্রং দশাননঃ ।। ৭.১৫.৩৪ ॥
15.35
জঘান মূর্ধ্নি ধনদং ব্যাবিদ্ধ্য মহতীং গদাম্ ।
এবং স তেনাভিহতো বিহ্বলঃ শোণিতোক্ষিতঃ ।। ৭.১৫.৩৫ ॥
15.36
কৃত্তমূল ইবাশোকো নিপপাত ধনাধিপঃ ।
। ৭.১৫.৩৬ ॥
15.37
ততঃ পদ্মাদিভিস্তত্র নিধিভিঃ স তদা বৃতঃ ।
ধনদোচ্ছ্বাসিতস্তৈস্তু বনমানীয় নন্দনম্ ।। ৭.১৫.৩৭ ॥
15.38
নির্জিত্য রাক্ষসেন্দ্রস্তং ধনদং হৃষ্টমানসঃ ।
পুষ্পকং তস্য জগ্রাহ বিমানং জয়লক্ষণম্ ।। ৭.১৫.৩৮ ॥
15.39
কাঞ্চনস্তম্ভসংবীতং বৈডূর্যমণিতোরণম্ ।
মুক্তাজালপ্রতিচ্ছন্নং সর্বকামফলদ্রুমম্ ।। ৭.১৫.৩৯ ॥
15.40
মনোজবং কামগমং কামরূপং বিহঙ্গমম্ ।
মণিকাঞ্চনসোপানং তপ্তকাঞ্চনবেদিকম্ ।। ৭.১৫.৪০ ॥
15.41
দেবোপবাহ্যমক্ষয্যং সদাদৃষ্টিমনঃসুখম্ ।
বহ্বাশ্চর্যং ভক্তিচিত্রং ব্রহ্মণা পরিনির্মিতম্ ।। ৭.১৫.৪১ ॥
15.42
নির্মিতং সর্বকামৈস্তু মনোহরমনুত্তমম্ ।
ন তু শীতং ন চোষ্ণং চ সর্বর্তুসুখদং শুভম্ ।। ৭.১৫.৪২ ॥
15.43
স তং রাজা সমারুহ্য কামগং বীর্যনির্জিতম্ ।
জিতং ত্রিভুবনং মেনে দর্পোত্সেকাত্সুদুর্মতিঃ ।। ৭.১৫.৪৩ ॥
15.44
জিত্বা বৈশ্রবণং দেবং কৈলাসাত্সমবাতরৎ ।
। ৭.১৫.৪৪ ॥
15.45
স্বতেজসা বিপুলমবাপ্য তং জয়ং প্রতাপবান্বিমলকিরীটহারবান্ ।
ররাজ বৈ পরমবিমানমাস্থিতো নিশাচরঃ সদসি গতো যথানলঃ ।। ৭.১৫.৪৫ ।।