Utshovসর্গ 14
14.1
ততস্তু সচিবৈঃ সার্ধং ষড্ভির্নিত্যং বলোদ্ধতৈঃ ।
মহোদরপ্রহস্তাভ্যাং মারীচশুকসারণৈঃ ।। ৭.১৪.১ ॥
14.2
ধূম্রাক্ষেণ চ বীরেণ নিত্যং সমরগৃধ্নুনা ।
বৃতঃ সংপ্রয়য়ৌ শ্রীমান্ক্রোধাল্লোকান্দহন্নিব ।। ৭.১৪.২ ॥
14.3
পুরাণি স নদীঃ শৈলান্বনান্যুপবনানি চ ।
অতিক্রম্য মুহূর্তেন কৈলাসং গিরিমাগমৎ ।। ৭.১৪.৩ ॥
14.4
সন্নিবিষ্টং গিরৌ তস্মিন্রাক্ষসেন্দ্রং নিশম্য তু ।
যুদ্ধে ঽত্যর্থকৃতোত্সাহং দুরাত্মানং সমন্ত্রিণম্ ।। ৭.১৪.৪ ॥
14.5
যক্ষা ন শেকুঃ সংস্থাতুং প্রমুখে তস্য রক্ষসঃ ।
রাজ্ঞো ভ্রাতেতি বিজ্ঞায় গতা যত্র ধনেশ্বরঃ ।। ৭.১৪.৫ ॥
14.6
তে গত্বা সর্বমাচখ্যুর্ভ্রাতুস্তস্য চিকীর্ষিতম্ ।
অনুজ্ঞাতা যয়ুর্হষ্টা যুদ্ধায় ধনদেন তে ।। ৭.১৪.৬ ॥
14.7
ততো বলানাং সঙ্ক্ষোভো ব্যবর্ধত মহোদধেঃ ।
তস্য নৈর্ঋতরাজস্য শৈলং সঞ্চালয়ন্নিব ।। ৭.১৪.৭ ॥
14.8
ততো যুদ্ধং সমভবদ্যক্ষরাক্ষসসঙ্কুলম্ ।
ব্যথিতাশ্চাভবংস্তত্র সচিবা রাক্ষসস্য তে ।। ৭.১৪.৮ ॥
14.9
স দৃষ্ট্বা তাদৃশং সৈন্যং দশগ্রীবো নিশাচরঃ ।
হর্ষনাদান্বহূন্কৃত্বা স ক্রোধাদভ্যধাবত ।। ৭.১৪.৯ ॥
14.10
যে তু তে রাক্ষসেন্দ্রস্য সচিবা ঘোরবিক্রমাঃ ।
তেষাং সহস্রমেকৈকং যক্ষাণাং সময়োধয়ন্ ।। ৭.১৪.১০ ॥
14.11
ততো গদাভির্মুসলৈরসিভিঃ শক্তিতোমরৈঃ ।
হন্যমানো দশগ্রীবস্তত্সৈন্যং সমগাহত ।। ৭.১৪.১১ ॥
14.12
স নিরুচ্ছ্বাসবত্তত্র বধ্যমানো দশাননঃ ।
বর্ষদ্ভিরিব জীমূতৈর্ধারাভিরবরুধ্যত ।। ৭.১৪.১২ ॥
14.13
ন চকার ব্যথাং চৈব যক্ষশস্ত্রৈঃ সমাহতঃ ।
মহীধর ইবাম্ভোদৈর্ধারাশতসমুক্ষিতঃ ।। ৭.১৪.১৩ ॥
14.14
স দুরাত্মা সমুদ্যম্য কালদণ্ডোপমাং গদাম্ ।
প্রবিবেশ ততঃ সৈন্যং নয়ন্যক্ষান্যমক্ষয়ম্ ।। ৭.১৪.১৪ ॥
14.15
স কক্ষমিব বিস্তীর্ণং শুষ্কেন্ধনমিবাকুলম্ ।
বাতেনাগ্নিরিবায়ত্তো যক্ষসৈন্যং দদাহ তৎ ।। ৭.১৪.১৫ ॥
14.16
তৈস্তু তত্র মহামাত্যৈর্মহোদরশুকাদিভিঃ ।
অল্পাবশেষাস্তে যক্ষাঃ কৃতা বাতৈরিবাম্বুদাঃ ।। ৭.১৪.১৬ ॥
14.17
কেচিত্সমাহতা ভগ্নাঃ পতিতাঃ সমরক্ষিতৌ ।
ওষ্ঠাংশ্চ দশনৈস্তীক্ষ্ণৈরদশন্কুপিতা রণে ।। ৭.১৪.১৭ ॥
14.18
শ্রান্তাশ্চান্যোন্যমালিঙ্গ্য ভ্রষ্টশস্ত্রা রণাজিরে ।
সীদন্তি চ তদা যক্ষাঃ কূলা ইব জলেন হ ।। ৭.১৪.১৮ ॥
14.19
হতানাং গচ্ছতাং স্বর্গং যুধ্যতাং পৃথিবীতলে ।
প্রেক্ষতামৃষিসঙ্ঘানাং ন বভূবান্তরং দিবি ।। ৭.১৪.১৯ ॥
14.20
ভগ্নাংস্তু তান্সমালক্ষ্য যক্ষেন্দ্রাংস্তু মহাবলান্ ।
ধনাধ্যক্ষো মহাবাহুঃ প্রেষয়ামাস যক্ষকান্ ।। ৭.১৪.২০ ॥
14.21
এতস্মিন্নন্তরে রাম বিস্তীর্ণবলবাহনঃ ।
প্রেষিতো ন্যপতদ্যক্ষো নাম্না সংয়োধকণ্টকঃ ।। ৭.১৪.২১ ॥
14.22
তেন চক্রেণ মারীচো বিষ্ণুনেব রণে হতঃ ।
পতিতো ভূতলে শৈলাত্ক্ষীণপুণ্য ইব গ্রহঃ ।। ৭.১৪.২২ ॥
14.23
সসঞ্জ্ঞস্তু মুহূর্তেন স বিশ্রম্য নিশাচরঃ ।
তং যক্ষং যোধয়ামাস স চ ভগ্নঃ প্রদুদ্রুবে ।। ৭.১৪.২৩ ॥
14.24
ততঃ কাঞ্চনচিত্রাঙ্গং বৈডূর্যরজসোক্ষিতম্ ।
মর্যাদাং প্রতিহারাণাং তোরণান্তরমাবিশৎ ।। ৭.১৪.২৪ ॥
14.25
তং তু রাজন্দশগ্রীবং প্রবিশন্তং নিশাচরম্ ।
সূর্যভানুরিতি খ্যাতো দ্বারপালো ন্যবারয়ৎ ।। ৭.১৪.২৫ ॥
14.26
স বার্যমাণো যক্ষেণ প্রবিবেশ নিশাচরঃ ।
যদা তু বারিতো রাম ন ব্যতিষ্ঠত্স রাক্ষসঃ ।। ৭.১৪.২৬ ॥
14.27
ততস্তোরণমুত্পাট্য তেন যক্ষেণ তাডিতঃ ।
রুধিরং প্রস্রবন্ভাতি শৈলো ধাতুস্রবৈরিব ।। ৭.১৪.২৭ ॥
14.28
স শৈলশিখরাভেণ তোরণেন সমাহতঃ ।
জগাম ন ক্ষতিং বীরো বরদানাত্স্বয়ম্ভুবঃ ।। ৭.১৪.২৮ ॥
14.29
তেনৈব তোরণেনাথ যক্ষস্তেনাভিতাডিতঃ ।
নাদৃশ্যত তদা যক্ষো ভস্মীকৃততনুস্তদা ।। ৭.১৪.২৯ ॥
14.30
ততঃ প্রদুদ্রুবুঃ সর্বে দৃষ্ট্বা রক্ষঃপরাক্রমম্ ।
ততো নদীর্গুহাশ্চৈব বিবিশুর্ভয়পীডিতাঃ ।ত্যক্তপ্রহরণাঃ শ্রান্তা বিবর্ণবদনাস্তদা ।। ৭.১৪.৩০ ।।