Utshovসর্গ 13
13.1
অথ লোকেশ্বরোত্সৃষ্টা তত্র কালেন কেনচিৎ ।
নিদ্রা সমভবত্তীব্রা কুম্ভকর্ণস্য রূপিণী ।। ৭.১৩.১ ॥
13.2
ততো ভ্রাতরমাসীনং কুম্ভকর্ণো ঽব্রবীদ্বচঃ ।
নিদ্রা মাং বাধতে রাজন্কারয়স্ব মমালয়ম্ ।। ৭.১৩.২ ॥
13.3
বিনিয়ুক্তাস্ততো রাজ্ঞা শিল্পিনো বিশ্বকর্মবৎ ।
বিস্তীর্ণং যোজনং শুভ্রং ততো দ্বিগুণমায়তম্ ।। ৭.১৩.৩ ॥
13.4
দর্শনীয়ং নিরাবাধং কুম্ভকর্ণস্য চক্রিরে ।
স্ফাটিকৈঃ কাঞ্চনৈশ্চিত্রৈঃ স্তম্ভৈঃ সর্বত্র শোভিতম্ ।। ৭.১৩.৪ ॥
13.5
বৈডূর্যকৃতসোপানং কিঙ্কিণীজালকং তথা ।
দান্ততোরণবিন্যস্তং বজ্রস্ফটিকবেদিকম্ ।। ৭.১৩.৫ ॥
13.6
মনোহরং সর্বসুখং কারয়ামাস রাক্ষসঃ ।
সর্বত্র সুখদং নিত্যং মেরোঃ পুণ্যাং গুহামিব ।। ৭.১৩.৬ ॥
13.7
তত্র নিদ্রাং সমাবিষ্টঃ কুম্ভকর্ণো মহাবলঃ ।
বহূন্যব্দসহস্রাণি শয়ানো ন প্রবুদ্ধ্যতে ।। ৭.১৩.৭ ॥
13.8
নিদ্রাভিভূতে তু তদা কুম্ভকর্ণে দশাননঃ ।
দেবর্ষিয়ক্ষগন্ধর্বান্সঞ্জঘ্নে হি নিরঙ্কুশঃ ।। ৭.১৩.৮ ॥
13.9
উদ্যানানি চ চিত্রাণি নন্দনাদীনি যানি চ ।
তানি গত্বা সুসঙক্রুদ্ধো ভিনত্তি স্ম দশাননঃ ।। ৭.১৩.৯ ॥
13.10
নদীং গজ ইব ক্রীডন্বৃক্ষান্বায়ুরিব ক্ষিপন্ ।
নগান্ব্রজ্র ইবোত্সৃষ্টো বিধ্বংসয়তি রাক্ষসঃ ।। ৭.১৩.১০ ॥
13.11
তথাবৃত্তং তু বিজ্ঞায় দশগ্রীবং ধনেশ্বরঃ ।
কুলানুরূপং ধর্মজ্ঞো বৃত্তং সংস্মৃত্য চাত্মনঃ ।। ৭.১৩.১১ ॥
13.12
সৌভ্রাত্রদর্শনার্থং তু দূতং বৈশ্রবণস্তদা ।
লঙ্কাং সম্প্রেষয়ামাস দশগ্রীবস্য বৈ হিতম্ ।। ৭.১৩.১২ ॥
13.13
স গত্বা নগরীং লঙ্কামাসসাদ বিভীষণম্ ।
মানিতস্তেন ধর্মেণ পৃষ্টশ্চাগমনং প্রতি ।। ৭.১৩.১৩ ॥
13.14
পৃষ্ট্বা চ কুশলং রাজ্ঞো জ্ঞাতীনাং চ বিভীষণঃ ।
সভায়াং দর্শয়ামাস তমাসীনং দশাননম্ ।। ৭.১৩.১৪ ॥
13.15
স দৃষ্ট্বা তত্র রাজানং দীপ্যমানং স্বতেজসা ।
জয়েতি বাচা সম্পূজ্য তূষ্ণীং সমভিবর্তত ।। ৭.১৩.১৫ ॥
13.16
তং তত্রোত্তমপর্যঙ্কে বরাস্তরণশোভিতে ।
উপবিষ্টং দশগ্রীবং দূতো বাক্যমথাব্রবীৎ ।। ৭.১৩.১৬ ॥
13.17
রাজন্বদামি তে সর্বং ভ্রাতা তব যদব্রবীৎ ।
উভয়োঃ সদৃশং বীর বৃত্তস্য চ কুলস্য চ ।। ৭.১৩.১৭ ॥
13.18
সাধু পর্যাপ্তমেতাবত্কৃতশ্চারিত্রসঙ্গ্রহঃ ।
সাধু ধর্মে ব্যবস্থানং ক্রিয়তাং যদি শক্যতে ।। ৭.১৩.১৮ ॥
13.19
দৃষ্টং মে নন্দনং ভগ্নমৃষয়ো নিহতাঃ শ্রুতাঃ ।
দেবতানাং সমুদ্যোগস্ত্বত্তো রাজন্মম শ্রুতঃ ।। ৭.১৩.১৯ ॥
13.20
নিরাকৃতশ্চ বহুশস্ত্বয়া ঽহং রাক্ষসাধিপ ।
অপরাদ্ধা হি বাল্যাচ্চ রমণীয়াঃ স্ববান্ধবাঃ ।। ৭.১৩.২০ ॥
13.21
অহং তু হিমবত্পৃষ্ঠং গতো ধর্মমুপাসিতুম্ ।
রৌদ্রং ব্রত্তং সমাস্থায় নিয়তো নিয়তেন্দ্রিয়ঃ ।। ৭.১৩.২১ ॥
13.22
তত্র দেবো ময়া দৃষ্টঃ সহ দেব্যা ময়া প্রভুঃ ।
সব্যং চক্ষুর্ময়া দৈবাত্তত্র দেব্যাং নিপাতিতম্ ।। ৭.১৩.২২ ॥
13.23
কা ন্বিয়ং স্যাদিতি শুভা ন খল্বন্যেন হেতুনা ।
রূপং হ্যনুপমং কৃত্বা রুদ্রাণী তত্র তিষ্ঠতি ।। ৭.১৩.২৩ ॥
13.24
দেব্যা দিব্যপ্রভাবেণ দগ্ধং সব্যং মমেক্ষণম্ ।
রেণুধ্বস্তমিব জ্যোতিঃ পিঙ্গুলত্বমুপাগতম্ ।। ৭.১৩.২৪ ॥
13.25
ততো ঽহমন্যদ্বিস্তীর্ণং গত্বা তস্য গিরেস্তটম্ ।
তূষ্ণীং বর্ষশতান্যষ্টৌ সমাধারং মহাব্রতম্ ।। ৭.১৩.২৫ ॥
13.26
সমাপ্তে নিয়মে তস্মিংস্তত্র দেবো মহেশ্বরঃ ।
প্রীতঃ প্রীতেন মনসা প্রাহ বাক্যমিদং প্রভুঃ ।। ৭.১৩.২৬ ॥
13.27
পৈঙ্গল্যং যদবাপ্তং হি দেব্যা রূপনিরীক্ষণাৎ ।
প্রীতো ঽস্মি তব ধর্মজ্ঞ তপসা নেন সুব্রত ।। ৭.১৩.২৭ ॥
13.28
ময়া চৈতদ্ব্রতং চীর্ণং ত্বয়া চৈব ধনাধিপ ।
তৃতীয়ঃ পুরুষো নাস্তি যশ্চরেব্রতমীদৃশম্ ।। ৭.১৩.২৮ ॥
13.29
ব্রতং সুনিশ্চয়ং হ্যেতন্ময়া হ্যুত্পাদিতং পুরা ।
তত্সখিত্বং ময়া সৌম্য রোচয়স্ব ধনেশ্বর ।। ৭.১৩.২৯ ॥
13.30
তপসা নির্জিতশ্চৈব সখা ভব মমানঘ ।
দেব্যা দগ্ধং প্রভাবেণ যচ্চ সব্যং তবেক্ষণম্ ।। ৭.১৩.৩০ ॥
13.31
একাক্ষিপিঙ্গলেত্যেব নাম স্থাস্যতি শাশ্বতম্ ।
এবং তেন সখিত্বং চ প্রাপ্যানুজ্ঞাং চ শঙ্করাৎ ।। ৭.১৩.৩১ ॥
13.32
আগত্য চ শ্রুতো ঽয়ং মে তব পাপবিনিশ্চয়ঃ ।
। ৭.১৩.৩২ ॥
13.33
তদধর্মিষ্ঠসংয়োগান্নিবর্ত কুলদূষণাৎ ।
চিন্ত্যতে হি বধোপায়ঃ সর্ষিসঙ্ঘৈঃ সুরৈস্তব ।। ৭.১৩.৩৩ ॥
13.34
এবমুক্তো দশগ্রীবঃ ক্রুদ্ধসংরক্তলোচনঃ ।
হস্তৌ দন্তাংশ্চ সম্পীড্য বাক্যমেতদুবাচ হ ।। ৭.১৩.৩৪ ॥
13.35
বিজ্ঞাতং তে ময়া দূত বাক্যং যস্য প্রভাষসে ।
নৈতত্ত্বমসি নৈবাসৌ ভ্রাত্রা যেনাসি চোদিতঃ ।। ৭.১৩.৩৫ ॥
13.36
হিতং নৈষ মমৈতদ্ধি ব্রবীতি ধনরক্ষকঃ ।
মহেশ্বরসখিত্বং তু মূঢ শ্রাবয়তে কিল ।। ৭.১৩.৩৬ ॥
13.37
ন চেদং ক্ষমণীয়ং মে যদেতদ্ভাষিতং ত্বয়া ।
যদেতাবন্ময়া কালং দূত তস্য তু মর্ষিতম্ ।। ৭.১৩.৩৭ ॥
13.38
ন হন্তব্যো গুরুর্জ্যেষ্ঠো ময়া ঽয়মিতি মন্যতে ।
তস্য ত্বিদানীং শ্রুত্বা মে বাক্যমেষা কৃতা মতিঃ ।। ৭.১৩.৩৮ ॥
13.39
ত্রীঁল্লোকানপি জেষ্যামি বাহুবীর্যমুপাশ্রিতঃ ।
। ৭.১৩.৩৯ ॥
13.40
এতন্মুহূর্তমেবাহং তস্যৈকস্য তু বৈ কৃতে ।
চতুরো লোকপালাংস্তান্নয়িষ্যামি যমক্ষয়ম্ ।। ৭.১৩.৪০ ॥
13.41
এবমুক্ত্বা তু লঙ্কেশো দূতং খড্গেন জঘ্নিবান্ ।
দদৌ ভক্ষয়িতুং হ্যেনং রাক্ষসানাং দুরাত্মনাম্ ।। ৭.১৩.৪১ ॥
13.42
এবং কৃতস্বস্ত্যয়নো রথমারুহ্য রাবণঃ ।
ত্রৈলোক্যবিজয়াকাঙ্ক্ষী যয়ৌ যত্র ধনেশ্বরঃ ।। ৭.১৩.৪২ ।।