Utshovসর্গ 16
16.1
স জিত্বা ধনদং রাম ভ্রাতরং রাক্ষসাধিপঃ ।
মহাসেনপ্রসূতিং তদ্যয়ৌ শরবণং মহৎ ।। ৭.১৬.১ ॥
16.2
অথাপশ্যদৃশগ্রীবো রৌক্মং শরবণং মহৎ ।
গভস্তিজালসংবীতং দ্বিতীয়মিব ভাস্করম্ ।। ৭.১৬.২ ॥
16.3
স পর্বতং সমারুহ্য কঞ্চিদ্রম্যবনান্তরম্ ।
অপশ্যৎ পুষ্পকং তত্র রামবিষ্টম্ভিতং তদা ।। ৭.১৬.৩ ॥
16.4
বিষ্টব্ধং পুষ্পকং দৃষ্ট্বা হ্যগমং কামাগং কৃতম্ ।
অচিন্তয়দ্রাক্ষসেন্দ্রঃ সচিবৈস্তৈঃ সমাবৃতঃ ।। ৭.১৬.৪ ॥
16.5
কিন্নিমিত্তং চেচ্ছয়া মে নেদং গচ্ছতি পুষ্পকম্ ।
পর্বতস্যোপরিষ্ঠস্য কর্মেদং কস্যচিদ্ভবেৎ ।। ৭.১৬.৫ ॥
16.6
ততো ঽব্রবীত্তদা রাম মারীচো বুদ্ধিকোবিদঃ ।
নেদং নিষ্কারণং রাজন্পুষ্পকং যন্ন গচ্ছতি ।। ৭.১৬.৬ ॥
16.7
অথবা পুষ্পকমিদং ধনদান্নান্যবাহনম্ ।
অতো নিষ্পন্দমভবদ্ধনাধ্যক্ষবিনাকৃতম্ ।। ৭.১৬.৭ ॥
16.8
ইতি বাক্যান্তরে তস্য করালঃ কৃষ্ণপিঙ্গলঃ ।
বামনো বিকটো মুণ্ডী নন্দী প্রহ্বভুজো বলী ।। ৭.১৬.৮ ॥
16.9
ততঃ পার্শ্বমুপাগম্য ভবস্যানুচরো ঽব্রবীৎ ।
নন্দীশ্বরো বচশ্চেদং রাক্ষসেন্দ্রমশঙ্কিতঃ ।। ৭.১৬.৯ ॥
16.10
নিবর্তস্ব দশগ্রীব শৈলে ক্রীডতি শঙ্করঃ ।
সুপর্ণনাগয়ক্ষাণাং দেবগন্ধর্বরক্ষসাম্ ।। ৭.১৬.১০ ॥
16.11
সর্বেষামেব ভূতানামগম্যঃ পর্বতঃ কৃতঃ ।
ইতি নন্দিবচঃ শ্রুত্বা ক্রোধাত্কম্পিতকুণ্ডলঃ ।। ৭.১৬.১১ ॥
16.12
রোষাত্তু তাম্রনয়নঃ পুষ্পকাদবরুহ্য সঃ ।
কো ঽয়ং শঙ্কর ইত্যুক্ত্বা শৈলমূলমুপাগতঃ ।। ৭.১৬.১২ ॥
16.13
সো ঽপশ্যন্নন্দিনং তত্র দেবস্যাদূরতঃ স্থিতম্ ।
দীপ্তং শূলমবষ্টভ্য দ্বিতীয়মিব শঙ্করম্ ।। ৭.১৬.১৩ ॥
16.14
তং দৃষ্ট্বা বানরমুখমবজ্ঞায় স রাক্ষসঃ ।
প্রহাসং মুমুচে তত্র সতোয় ইব তোয়দঃ ।। ৭.১৬.১৪ ॥
16.15
তং ক্রুদ্ধো ভগবান্নন্দী শঙ্করস্যাপরা তনুঃ ।
অব্রবীত্তত্র তদ্রক্ষো দশাননমুপস্থিতম্ ।। ৭.১৬.১৫ ॥
16.16
যস্মাদ্বানররূপং মামবজ্ঞায় দশানন ।
অশনীপাতসঙ্কাশমপহাসং প্রমুক্তবান্ ।। ৭.১৬.১৬ ॥
16.17
তস্মান্মদ্রূপসম্পন্না মদ্বীর্যসমতেজসঃ ।
উত্পত্স্যন্তি বধার্থং হি কুলস্য তব বানরাঃ ।। ৭.১৬.১৭ ॥
16.18
নখদংষ্ট্রায়ুধাঃ ক্রূরা মনঃসম্পাতরংহসঃ ।
যুদ্ধোন্মত্তা বলোদ্রিক্তাঃ শৈলা ইব বিসর্পিণঃ ।। ৭.১৬.১৮ ॥
16.19
তে তব প্রবলং দর্পমুত্সেধং চ পৃথগ্বিধম্ ।
ব্যপনেষ্যন্তি সম্ভূয় সহামাত্যসুতস্য চ ।। ৭.১৬.১৯ ॥
16.20
কিং ত্বিদানীং ময়া শক্যং হন্তুং ত্বাং হে নিশাচর ।
ন হন্তব্যো হতস্ত্বং হি পূর্বমেব স্বকর্মভিঃ ।। ৭.১৬.২০ ॥
16.21
ইত্যুদীরিতবাক্যে তু দেবে তস্মিন্মহাত্মনি ।
দেবদুন্দুভয়ো নেদুঃ পুষ্পবৃষ্টিশ্চ খাচ্চ্যুতা ।। ৭.১৬.২১ ॥
16.22
অচিন্তয়িত্বা স তদা নন্দিবাক্যং মহাবলঃ ।
পর্বতং তু সমাসাদ্য বাক্যমাহ দশাননঃ ।। ৭.১৬.২২ ॥
16.23
পুষ্পকস্য গতিশ্ছিন্না যত্কৃতে মম গচ্ছতঃ ।
তমিমং শৈলমুন্মূলং করোমি তব গোপতে ।। ৭.১৬.২৩ ॥
16.24
কেন প্রভাবেণ ভবো নিত্যং ক্রীডতি রাজবৎ ।
বিজ্ঞাতব্যং ন জানীতে ভয়স্থানমুপস্থিতম্ ।। ৭.১৬.২৪ ॥
16.25
এবমুক্ত্বা ততো রাম ভুজান্বিক্ষিপ্য পর্বতে ।
তোলয়ামাস তং শীঘ্রং স শৈলং সমকম্পত ।। ৭.১৬.২৫ ॥
16.26
চালনাত্পর্বতস্যৈব গণা দেবস্য কম্পিতাঃ ।
চচাল পার্বতী চাপি তদা ঽ ঽশ্লিষ্টা মহেশ্বরম্ ।। ৭.১৬.২৬ ॥
16.27
ততো রাম মহাদবো দেবানাং প্রবরো হরঃ ।
পাদাঙ্গুষ্ঠেন তং শৈলং পীডয়ামাস লীলয়া ।। ৭.১৬.২৭ ॥
16.28
পীডিতাস্তু ততস্তস্য শৈলস্যাধোগতা ভুজাঃ ।
বিস্মিতাশ্চাভবংস্তত্র সচিবাস্তস্য রক্ষসঃ ।। ৭.১৬.২৮ ॥
16.29
রক্ষসা তেন রোষাচ্চ ভুজানাং পীডনাত্তদা ।
মুক্তো বিরাবঃ সহসা ত্রৈলোক্যং যেন কম্পিতম্ ।। ৭.১৬.২৯ ॥
16.30
মেনিরে বজ্রনিষ্পেষং তস্যামাত্যা যুগক্ষয়ে ।
তদা বর্ত্মস্থচলিতা দেবা ইন্দ্রপুরোগমাঃ ।। ৭.১৬.৩০ ॥
16.31
সমুদ্রাশ্চাপি সঙ্ক্ষুব্ধাশ্চলিতাশ্চাপি পর্বতাঃ ।
যক্ষা বিদ্যাধরাঃ সিদ্ধাঃ কিমেতদিতি চাব্রুবন্ ।। ৭.১৬.৩১ ॥
16.32
অথ তে মন্ত্রিণস্তস্য বিক্রোশন্তমথাব্রুবন্ ।
তোষয়স্ব মহাদেবং নীলকণ্ঠমুমাপতিম্ ।। ৭.১৬.৩২ ॥
16.33
তমৃতে শরণং নান্যং পশ্যামো ঽত্র দশানন ।
স্তুতিভিঃ প্রণতো ভূত্বা তমেব শরণং ব্রজ ।। ৭.১৬.৩৩ ॥
16.34
কৃপালুঃ শঙ্করস্তুষ্টঃ প্রসাদং তে বিধাস্যতি ।
এবমুক্তস্তদামাত্যৈস্তুষ্টাব বৃষভধ্বজম্ ।। ৭.১৬.৩৪ ॥
16.35
সামভির্বিবিধৈঃ স্তোত্রৈঃ প্রণম্য স দশাননঃ ।
সংবত্সরসহস্রং তু রুদতো রক্ষসো গতম্ ।। ৭.১৬.৩৫ ॥
16.36
ততঃ প্রীতো মহাদেবঃ শৈলাগ্রে বিষ্ঠিতঃ প্রভুঃ ।
মুক্ত্বা চাস্য ভুজান্রাম প্রাহ বাক্যং দশাননম্ ।। ৭.১৬.৩৬ ॥
16.37
প্রীতো ঽস্মি তব বীর্যস্য শৌণ্ডার্যাচ্চ দশানন ।
শৈলাক্রান্তেন যো মুক্তস্ত্বয়া রাবঃ সুদারুণঃ ।। ৭.১৬.৩৭ ॥
16.38
যস্মাল্লোকত্রয়ং চৈতদ্রাবিতং ভয়মাগতম্ ।
তস্মাত্ত্বং রাবণো নাম নাম্না রাজন্ভবিষ্যসি ।। ৭.১৬.৩৮ ॥
16.39
দেবতা মানুষা যক্ষা যে চান্যে জগতীতলে ।
এবং ত্বামভিধাস্যন্তি রাবণং লোকরাবণম্ ।। ৭.১৬.৩৯ ॥
16.40
গচ্ছ পৌলস্ত্য বিস্রব্ধং পথা যেন ত্বমিচ্ছসি ।
ময়া চৈবাভ্যনুজ্ঞাতো রাক্ষসাধিপ গম্যতাম্ ।। ৭.১৬.৪০ ॥
16.41
এবমুক্তস্তু লঙ্কেশঃ শম্ভুনা স্বয়মব্রবীৎ ।
প্রীতো যদি মহাদেব বরং মে দেহি যাচতঃ ।। ৭.১৬.৪১ ॥
16.42
অবধ্যত্বং ময়া প্রাপ্তং দেবগন্ধর্বদানবৈঃ ।
রাক্ষসৈর্গুহ্যকৈর্নাগৈর্যে চান্যে বলবত্তরাঃ ।। ৭.১৬.৪২ ॥
16.43
মানুষান্ন গণে দেব স্বল্পাস্তে মম সম্মতাঃ ।
দীর্ঘমায়ুশ্চ মে প্রাপ্তং ব্রহ্মণস্ত্রিপুরান্তক ।। ৭.১৬.৪৩ ॥
16.44
বাঞ্ছিতং চায়ুষঃ শেষং শস্ত্রং ত্বং চ প্রয়চ্ছ মে ।
এবমুক্তস্ততস্তেন রাবণেন স শঙ্করঃ ।। ৭.১৬.৪৪ ॥
16.45
দদৌ খড্গং মহাদীপ্তং চন্দ্রহাসমিতি শ্রুতম্ ।
আয়ুষশ্চাবশেষং চ স্থিত্বা ভূতপতিস্তদা ।। ৭.১৬.৪৫ ॥
16.46
দত্ত্বোবাচ ততঃ শম্ভুর্নাবজ্ঞেয়মিদং ত্বয়া ।
অবজ্ঞাতং যদি হি তে মামেবৈষ্যত্যসংশয়ঃ ।। ৭.১৬.৪৬ ॥
16.47
এবং মহেশ্বরেণৈব কৃতনামা স রাবণঃ ।
অভিবাদ্য মহাদেবমারুরোহাথ পুষ্পকম্ ।। ৭.১৬.৪৭ ॥
16.48
ততো মহীতলে রাম পর্যক্রামত রাবণঃ ।
ক্ষত্িত্রয়ান্সুমহাবীর্যান্বাধমান ইতস্ততঃ ।। ৭.১৬.৪৮ ॥
16.49
কেচিত্তেজস্বিনঃ শূরাঃ ক্ষত্িত্রয়া যুদ্ধদুর্মদাঃ ।
তচ্ছাসনমকুর্বন্তো বিনেশুঃ সপরিচ্ছদাঃ ।। ৭.১৬.৪৯ ॥
16.50
অপরে দুর্জয়ং রক্ষো জানন্তঃ প্রাজ্ঞসম্মতাঃ ।
জিতাঃ স্ম ইত্যভাষন্ত রাক্ষসং বলদর্পিতম্ ।। ৭.১৬.৫০ ।।