Utshovসর্গ 109
109.1
প্রভাতায়াং তু শর্বর্যাং পৃথুবক্ষা মহায়শাঃ ।
রামঃ কমলপত্রাক্ষঃ পুরোধসমথাব্রবীৎ ।। ৭.১০৯.১ ॥
109.2
অগ্নিহোত্রং ব্রজত্বগ্রে দীপ্যমানং সহ দ্বিজৈঃ ।
বাজপেয়াতপত্রং চ শোভমানং মহাপথে ।। ৭.১০৯.২ ॥
109.3
ততো বসিষ্ঠস্তেজস্বী সর্বং নিরবশেষতঃ ।
চকার বিধিবদ্ধর্মং মহাপ্রাস্থানিকং বিধিম্ ।। ৭.১০৯.৩ ॥
109.4
ততঃ সূক্ষ্মাম্বরধরো ব্রহ্মমাবর্তয়ন্পরম্ ।
কুশান্গৃহীত্বা পাণিভ্যাং প্রসজ্য প্রয়য়াবথ ।। ৭.১০৯.৪ ॥
109.5
অব্যাহরন্ক্বচিত্কিঞ্চিন্নিশ্চেষ্টো নিঃসুখঃ পথি ।
নির্জগাম গৃহাত্তস্মাদ্দীপ্যমান ইবাংশুমান্ ।। ৭.১০৯.৫ ॥
109.6
রামস্য দক্ষিণে পার্শ্বে সপদ্মা শ্রীরপাশ্রিতা ।
সব্যে তু হ্রীর্মহাদেবী ব্যবসায়স্তথাগ্রতঃ ।। ৭.১০৯.৬ ॥
109.7
শরা নানাবিধাশ্চাপি ধনুরায়তমুত্তমম্ ।
তথা ঽ ঽয়ুধানি তে সর্বে যয়ুঃ পুরুষবিগ্রহাঃ ।। ৭.১০৯.৭ ॥
109.8
বেদা ব্রাহ্মণরূপেণ গায়ত্রী সর্বরক্ষিণী ।
ওঙ্কারো ঽথ বষট্কারঃ সর্বে রামমনুব্রতাঃ ।। ৭.১০৯.৮ ॥
109.9
ঋষয়শ্চ মহাত্মানঃ সর্ব এব মহীসুরাঃ ।
অন্বগচ্ছন্মহাত্মানং স্বর্গদ্বারমপাবৃতম্ ।। ৭.১০৯.৯ ॥
109.10
তং যান্তমনুগচ্ছন্তি হ্যন্তঃপুরচরাঃ স্ত্রিয়ঃ ।
সবৃদ্ধবালদাসীকাঃ সবর্ষবরকিঙ্করাঃ ।। ৭.১০৯.১০ ॥
109.11
সান্তঃপুরশ্চ ভরতঃ শত্রুঘ্নসহিতো যয়ৌ ।
রামং গতিমুপাগম্য সাগ্নিহোত্রমনুব্রতঃ ।। ৭.১০৯.১১ ॥
109.12
তে চ সর্বে মহাত্মানঃ সাগ্নিহোত্রাঃ সমাগতাঃ ।
সপুত্রদারাঃ কাকুত্স্থমনুজগ্মুর্মহামতিম্ ।। ৭.১০৯.১২ ॥
109.13
মন্ত্রিণো ভৃত্যবর্গাশ্চ সপুত্রপশুবান্ধবাঃ ।
সর্বে সহানুগা রামমন্বগচ্ছন্প্রহৃষ্টবৎ ।। ৭.১০৯.১৩ ॥
109.14
ততঃ সর্বাঃ প্রকৃতয়ো হৃষ্টপুষ্টজনাবৃতাঃ ।
গচ্ছন্তমন্বগছংস্তং রাঘবং গুণরঞ্জিতাঃ ।। ৭.১০৯.১৪ ॥
109.15
ততঃ সস্ত্রীপুমাংসস্তে সপক্ষিপশুবাহনাঃ ।
রাঘবস্যানুগাঃ সর্বে হৃষ্টা বিগতকল্মষাঃ ।। ৭.১০৯.১৫ ॥
109.16
স্নাতাঃ প্রমুদিতাঃ সর্বে হৃষ্টাঃ পুষ্টাশ্চ বানরাঃ ।
দৃঢং কিলকিলাশব্দৈঃ সর্বং রামমনুব্রতম্ ।। ৭.১০৯.১৬ ॥
109.17
ন তত্র কশ্চিদ্দীনো বা ব্রীডিতো বা ঽপি দুঃখিতঃ ।
হৃষ্টং সমুদিতং সর্বং বভূব পরমাদ্ভুতম্ ।। ৭.১০৯.১৭ ॥
109.18
দ্রষ্টুকামো ঽথ নির্যান্তং রামং জানপদো জনঃ ।
যঃ প্রাপ্তঃ সো ঽপি দৃষ্ট্বৈব স্বর্গায়ানুগতো মুদা ।। ৭.১০৯.১৮ ॥
109.19
ঋক্ষবানররক্ষাংসি জনাশ্চ পুরবাসিনঃ ।
আগচ্ছন্পরয়া ভক্ত্যা পৃষ্ঠতঃ সুসমাহিতাঃ ।। ৭.১০৯.১৯ ॥
109.20
যানি ভূতানি নগরে ঽপ্যন্তর্ধানগতানি চ ।
রাঘবং তান্যনুয়য়ুঃ স্বর্গায় সমুপস্থিতম্ ।। ৭.১০৯.২০ ॥
109.21
যানি পশ্যন্তি কাকুত্স্থং স্থাবরাণি চরাণি চ ।
সর্বাণি রামগমনে হ্যনুজগ্মুর্হি তান্যপি ।। ৭.১০৯.২১ ॥
109.22
নোচ্ছ্বসত্তদয়োধ্যায়াং সুসূক্ষ্মমপি দৃশ্যতে ।
তির্যগ্যোনিগতাশ্চাপি সর্বে রামমনুব্রতাঃ ।। ৭.১০৯.২২ ॥