Utshovসর্গ 108
108.1
তে দূতা রামবাক্যেন চোদিতা লঘুবিক্রমাঃ ।
প্রজগ্মুর্মধুরাং শীঘ্রং চক্রুর্বাসং ন চাধ্বনি ।। ৭.১০৮.১ ॥
108.2
তে তু ত্রিভিরহোরাত্রৈঃ সম্প্রাপ্য মধুরামথ ।
শত্রুঘ্নায় যথাতত্ত্বমাচখ্যুঃ সর্বমেব তৎ ।। ৭.১০৮.২ ॥
108.3
লক্ষ্মণস্য পরিত্যাগং প্রতিজ্ঞাং রাঘবস্য চ ।
পুত্রয়োরভিষেকং চ পৌরানুগমনং তথা ।। ৭.১০৮.৩ ॥
108.4
কুশস্য নগরী রম্যা বিন্ধ্যপর্বতরোধসি ।
কুশাবতীতি নাম্না সা কৃতা রামেণ ধীমতা ।শ্রাবস্তীতি পুরী রম্যা শ্রাবিতা চ লবস্য হ ।। ৭.১০৮.৪ ॥
108.5
অয়োধ্যাং বিজনাং কৃত্বা রাঘবো ভরতস্তথা ।
স্বর্গস্য গমনোদ্যোগং কৃতবন্তৌ মহারথৌ ।। ৭.১০৮.৫ ॥
108.6
এবং সর্বং নিবেদ্যাশু শত্রুঘ্নায় মহাত্মনে ।
বিরেমুস্তে ততো দূতাস্ত্বর রাজেতি চাব্রুবন্ ।। ৭.১০৮.৬ ॥
108.7
তচ্ছ্রুত্বা ঘোরসঙ্কাশং কুলক্ষয়মুপস্থিতম্ ।
প্রকৃতীস্তু সমানীয় কাঞ্চনং চ পুরোধসম্ ।। ৭.১০৮.৭ ॥
108.8
তেষাং সর্বং যথাবৃত্তমব্রবীদ্রঘনন্দনঃ ।
আত্মনশ্চ বিপর্যাসং ভবিষ্যং ভ্রাতৃভিঃ সহ ।। ৭.১০৮.৮ ॥
108.9
ততঃ পুত্রদ্বয়ং বীরঃ সো ঽভ্যষিঞ্চন্নরাধিপঃ ।
সুবাহুর্মধুরাং লেভে শত্রুঘাতী চ বৈদিশম্ ।। ৭.১০৮.৯ ॥
108.10
দ্বিধা কৃত্বা তু তাং সেনাং মাধুরীং পুত্রয়োর্দ্বয়োঃ ।
ধনং চ যুক্তং কৃত্বা বৈ স্থাপয়ামাস পার্থিবঃ ।। ৭.১০৮.১০ ॥
108.11
সুবাহুং মধুরায়াং চ বৈদেশে শত্রুঘাতিনম্ ।
যয়ৌ স্থাপ্য তদা ঽয়োধ্যাং রথেনৈকেন রাঘবঃ ।। ৭.১০৮.১১ ॥
108.12
স দদর্শ মহাত্মানং জ্বলন্তমিব পাবকম্ ।
সূক্ষ্মক্ষৌমাম্বরধরং মুনিভিঃ সার্ধমক্ষয়ৈঃ ।। ৭.১০৮.১২ ॥
108.13
সো ঽভিবাদ্য ততো রামং প্রাঞ্জলিঃ প্রয়তেন্দ্রিয়ঃ ।
উবাচ বাক্যং ধর্মজ্ঞং ধর্মমেবানুচিন্তয়ন্ ।। ৭.১০৮.১৩ ॥
108.14
কৃত্বাভিষেকং সুতয়োর্দ্বয়ো রাঘবনন্দন ।
তবানুগমনে রাজন্বিদ্ধি মাং কৃতনিশ্চয়ম্ ।। ৭.১০৮.১৪ ॥
108.15
ন চান্যদপি বক্তব্যমতো বীর ন শাসনম্ ।
বিলোক্যমানমিচ্ছামি মদ্বিধেন বিশেষতঃ ।। ৭.১০৮.১৫ ॥
108.16
তস্য তাং বুদ্ধিমক্লীবাং বিজ্ঞায় রঘুনন্দনঃ ।
বাঢমিত্যেব শত্রুঘ্নং রামো বাক্যমুবাচ হ ।। ৭.১০৮.১৬ ॥
108.17
তস্য বাক্যস্য বাক্যান্তে বানরাঃ কামরূপিণঃ ।
ঋক্ষরাক্ষসসঙ্ঘাশ্চ সমাপেতুরনেকশঃ ।। ৭.১০৮.১৭ ॥
108.18
সুগ্রীবং তে পুরস্কৃত্য সর্ব এব সমাগতাঃ ।
তং রামং দ্রষ্টুমনসঃ স্বর্গায়াভিমুখং স্থিতম্ ।। ৭.১০৮.১৮ ॥
108.19
দেবপুত্রা ঋষিসুতা গন্ধর্বাণাং সুতাস্তথা ।
রামক্ষয়ং বিদিত্বা তে সর্ব এব সমাগতাঃ ।। ৭.১০৮.১৯ ॥
108.20
তে রামমভিবাদ্যোচুঃ সর্বে বানররাক্ষসাঃ ।
তবানুগমনে রাজন্সম্প্রাপ্তাঃ কৃতনিশ্চয়াঃ ।। ৭.১০৮.২০ ॥
108.21
যদি রাম বিনাস্মাভির্গচ্ছেস্ত্বং পুরুষোত্তম ।
যমদণ্ডমিবোদ্যম্য ত্বয়া স্ম বিনিপাতিতাঃ ।। ৭.১০৮.২১ ॥
108.22
তৈরেবমুক্তঃ কাকুত্স্থো বাঢমিত্যব্রবীৎ স্ময়ন্ ।
। ৭.১০৮.২২ ॥
108.23
এতস্মিন্নন্তরে রামং সুগ্রীবো ঽপি মহাবলঃ ।
প্রণম্য বিধিবদ্বীরং বিজ্ঞাপয়িতুমুদ্যতঃ ।। ৭.১০৮.২৩ ॥
108.24
অভিষিচ্যাঙ্গদং বীরমাগতো ঽস্মি নরেশ্বর ।
তবানুগমনে রাজন্বিদ্ধি মাং কৃতনিশ্চয়ম্ ।। ৭.১০৮.২৪ ॥
108.25
তস্য তদ্বচনং শ্রুত্বা রামো রময়তাং বরঃ ।
বানরেন্দ্রমথোবাচং মৈত্রং তস্যানুচিন্তয়ন্ ।। ৭.১০৮.২৫ ॥
108.26
সখে শৃণুষ্ব সুগ্রীব ন ত্বয়া ঽহং বিনাকৃতঃ ।
গচ্ছেয়ং দেবলোকং বা পরমং বা পদং মহৎ ।। ৭.১০৮.২৬ ॥
108.27
বিভীষণমথোবাচ রাক্ষসেন্দ্রং মহায়শাঃ ।
যাবত্প্রজা ধরিষ্যন্তি তাবত্ত্বং বৈ বিভীষণ ।রাক্ষসেন্দ্র মহাবীর্য লঙ্কাস্থস্ত্বং ধরিষ্যসি ।। ৭.১০৮.২৭ ॥
108.28
যাবচ্চন্দ্রশ্চ সূর্যশ্চ যাবত্তিষ্ঠতি মেদিনী ।
যাবচ্চ মত্কথা লোকে তাবদ্রাজ্যং তবাস্ত্বিহ ।। ৭.১০৮.২৮ ॥
108.29
শাসিতস্ত্বং সখিত্বেন কার্যং তে মম শাসনম্ ।
প্রজাঃ সংরক্ষ ধর্মেণ নোত্তরং বক্তুমর্হসি ।। ৭.১০৮.২৯ ॥
108.30
কিঞ্চান্যদ্বক্তুমিচ্ছামি রাক্ষসেন্দ্র মহামতে ।
। ৭.১০৮.৩০ ॥
108.31
আরাধয় জগন্নাথমিক্ষ্বাকুকুলদৈবতম্ ।
আরাধনীয়মনিশং সর্বৈর্দৈবৈঃ সবাসবৈঃ ।। ৭.১০৮.৩১ ॥
108.32
তথেতি প্রতিজগ্রাহ রামবাক্যং বিভীষণঃ ।
রাজা রাক্ষসমুখ্যানাং রাঘবাজ্ঞামনুস্মরন্ ।। ৭.১০৮.৩২ ॥
108.33
তমেবমুক্ত্বা কাকুত্স্থো হনূমন্তমথাব্রবীৎ ।
জীবিতে কৃতবুদ্ধিস্ত্বং মা প্রতিজ্ঞাং বিলোপয় ।। ৭.১০৮.৩৩ ॥
108.34
মত্কথাঃ প্রচরিষ্যন্তি যাবল্লোকে হরীশ্বর ।
তাবদ্রমস্ব সুপ্রীতো মদ্বাক্যমনুপালয়ন্ ।। ৭.১০৮.৩৪ ॥
108.35
এবমুক্তস্তু হনুমান্রাঘবেণ মহাত্মনা ।
বাক্যং বিজ্ঞাপয়ামাস পরং হর্ষমবাপ্য চ ।। ৭.১০৮.৩৫ ॥
108.36
যাবত্তব কথা লোকে বিচরিষ্যতি পাবনী ।
তাবত্স্থাস্যামি মেদিন্যাং তবাজ্ঞামনুপালয়ন্ ।। ৭.১০৮.৩৬ ॥
108.37
জাম্ববন্তং তথোক্ত্বা তু বৃদ্ধং ব্রহ্মসুতং তথা ।
মৈন্দং চ দ্বিবিদং চৈব পঞ্চ জাম্ববতা সহ ।যাবত্কলিশ্চ সম্প্রাপ্তস্তাবজ্জীবত সর্বদা ।। ৭.১০৮.৩৭ ॥
108.38
তানেবমুক্ত্বা কাকুত্স্থঃ সর্বাংস্তানৃক্ষবানরান্ ।
উবাচ বাঢং গচ্ছধ্বং ময়া সার্ধং যথেপ্সিতম্ ।। ৭.১০৮.৩৮ ।।