সর্গ 107

107.1

বিসৃজ্য লক্ষ্মণং রামো দুঃখশোকসমন্বিতঃ ।
পুরোধসং মন্ত্রিণশ্চ নৈগমাংশ্চেদমব্রবীৎ ।। ৭.১০৭.১ ॥

অদ্য রাজ্যে ঽভিষেক্ষ্যামি ভরতং ধর্মবত্সলম্ ।
অয়োধ্যায়াঃ পতিং বীরং ততো যাস্যাম্যহং বনম্ ।। ৭.১০৭.২ ॥

প্রবেশয়ত সম্ভারান্মাভূত্কালস্য পর্যয়ঃ ।
অদ্যৈবাহং গমিষ্যামি লক্ষ্মণেন গতাং গতিম্ ।। ৭.১০৭.৩ ॥

তচ্ছ্রুত্বা রাঘবেণোক্তং সর্বাঃ প্রকৃতয়ো ভৃশম্ ।
মূর্ধভিঃ প্রণতা ভূমৌ গতসত্ত্বা ইবাভবন্ ।। ৭.১০৭.৪ ॥

ভরতশ্চ বিসঞ্জ্ঞো ঽভূচ্ছ্রুত্বা রামস্য ভাষিতম্ ।
রাজ্যং বিগর্হয়ামাস রাঘবং চেদমব্রবীৎ ।। ৭.১০৭.৫ ॥

সত্যেনাহং শপে রাজন্স্বর্গলোকে ন চৈব হি ।
ন কাময়ে যথা রাজ্যং ত্বাং বিনা রঘুনন্দন ।। ৭.১০৭.৬ ॥

ইমৌ কুশলবৌ রাজন্নভিষিঞ্চ নরাধিপ ।
কোসলেষু কুশং বীরমুত্তরেষু তথা লবম্ ।। ৭.১০৭.৭ ॥

শত্রুঘ্নস্য তু গচ্ছন্তু দূতাস্ত্বরিতবিক্রমাঃ ।
ইদং গমনমস্মাকং স্বর্গায়াখ্যাতু মা চিরম্ ।। ৭.১০৭.৮ ॥

তচ্ছ্রুত্বা ভরতেনোক্তং দৃষ্ট্বা চাপি হ্যধোমুখান্ ।
পৌরান্দুঃখেন সন্তপ্তান্বসিষ্ঠো বাক্যমব্রবীৎ ।। ৭.১০৭.৯ ॥

বত্স রাম ইমাঃ পশ্য ধরণীং প্রকৃতীর্গতাঃ ।
জ্ঞাত্বৈষামীপ্সিতং কার্যং মা চৈষাং বিপ্রিয়ং কৃথাঃ ।। ৭.১০৭.১০ ॥

বসিষ্ঠস্য তু বাক্যেন উত্থাপ্য প্রকৃতীজনম্ ।
কিং করোমীতি কাকুত্স্থঃ সর্বা বচনমব্রবীৎ ।। ৭.১০৭.১১ ॥

ততঃ সর্বাঃ প্রকৃতয়ো রামং বচনমব্রুবন্ ।
গচ্ছন্তমনুগচ্ছামো যত্র রাম গমিষ্যসি ।। ৭.১০৭.১২ ॥

পৌরেষু যদি তে প্রীতির্যদি স্নেহো হ্যনুত্তমঃ ।
সপুত্রদারাঃ কাকুত্স্থ সমাগচ্ছাম সত্পথম্ ।। ৭.১০৭.১৩ ॥

তপোবনং বা দুর্গং বা নদীমম্ভোনিধিং তথা ।
বয়ং তে যদি ন ত্যাজ্যাঃ সর্বান্নো নয় ঈশ্বর ।। ৭.১০৭.১৪ ॥

এষা নঃ পরমা প্রীতিরেষ নঃ পরমো বরঃ ।
হৃদ্গতা নঃ সদা প্রীতিস্তবানুগমনে নৃপ ।। ৭.১০৭.১৫ ॥

পৌরাণাং দৃঢভক্তিং চ বাঢমিত্যেব সো ঽব্রবীৎ ।
স্বকৃতান্তং চান্ববেক্ষ্য তস্মিন্নহনি রাঘবঃ ।। ৭.১০৭.১৬ ॥

কোসলেষু কুশং বীরমুত্তরেষু তথা লবম্ ।
অভিষিচ্য মহাত্মানাবুভৌ রামঃ কুশীলবৌ ।। ৭.১০৭.১৭ ॥

অভিষিক্তৌ সুতাবঙ্কে প্রতিষ্ঠাপ্য পুরে ততঃ ।
পরিষ্বজ্য মহাবাহুর্মূর্ধ্ন্যুপাঘ্রায় চাসকৃৎ ।। ৭.১০৭.১৮ ॥

রথানাং তু সহস্রাণি নাগানাময়ুতানি চ ।
দশায়ুতানি চাশ্বানামেকৈকস্য ধনং দদৌ ।। ৭.১০৭.১৯ ॥

বহুরত্নৌ বহুধনৌ হৃষ্টপুষ্টজনাবৃতৌ ।
স্বে পুরে প্রেষয়ামাস ভ্রাতরৌ তু কুশীলবৌ ।। ৭.১০৭.২০ ॥

অভিষিচ্য সুতৌ বীরৌ প্রতিষ্ঠাপ্য পুরে তদা ।
দূতান্সম্প্রেষয়ামাস শত্রুঘ্নায় মহাত্মনে ।। ৭.১০৭.২১ ।।