সর্গ 106

106.1

অবাঙ্মুখমথো দীনং দৃষ্ট্বা সোমমিবাপ্লুতম্ ।
রাঘবং লক্ষ্মণো বাক্যং হৃষ্টো মধুরমব্রবীৎ ।। ৭.১০৬.১ ॥

ন সংতাপং মহাবাহো মদর্থং কর্তুমর্হসি ।
পূর্বনির্মাণবদ্ধা হি কালস্য গতিরীদৃশী ।। ৭.১০৬.২ ॥

জহি মাং সৌম্য বিস্রব্ধং প্রতিজ্ঞাং পরিপালয় ।
হীনপ্রতিজ্ঞাঃ কাকুত্স্থ প্রয়ান্তি নরকং নরাঃ ।। ৭.১০৬.৩ ॥

যদি প্রীতির্মহারাজ যদ্যনুগ্রাহ্যতা ময়ি ।
জহি মাং নির্বিশঙ্কস্ত্বং ধর্মং বর্ধয় রাঘব ।। ৭.১০৬.৪ ॥

লক্ষ্মণেন তথোক্তস্তু রামঃ প্রচলিতেন্দ্রিয়ঃ ।
মন্ত্রিণঃ সমুপানীয় তথৈব চ পুরোধসম্ ।। ৭.১০৬.৫ ॥

অব্রবীচ্চ তদা বৃত্তং তেষাং মধ্যে স রাঘবঃ ।
দুর্বাসোভিগমং চৈব প্রতিজ্ঞাং তাপসস্য চ ।। ৭.১০৬.৬ ॥

তচ্ছ্রুত্বা মন্ত্রিণঃ সর্বে সোপাধ্যায়াঃ সমাসত ।
বসিষ্ঠস্তু মহাতেজা বাক্যমেতদুবাচ হ ।। ৭.১০৬.৭ ॥

দৃষ্টমেতন্মহাবাহো ক্ষয়ং তে রোমহর্ষণম্ ।
লক্ষ্মণেন বিয়োগশ্চ তব রাম মহায়শঃ ।। ৭.১০৬.৮ ॥

ত্যজৈনং বলবান্কালো মা প্রতিজ্ঞাং বৃথা কৃতাঃ ।
বিনষ্টায়াং প্রতিজ্ঞায়াং ধর্মো ঽপি চ লয়ং ব্রজেৎ ।। ৭.১০৬.৯ ॥

ততো ধর্মে বিনষ্টে তু ত্রৈলোক্যং সচরাচরম্ ।
সদেবর্ষিগণং সর্বং বিনশ্যেত্তু ন সংশয়ঃ ।। ৭.১০৬.১০ ॥

স ত্বং পুরুষশার্দূল ত্রৈলোক্যস্যাভিপালনাৎ ।
লক্ষ্মণেন বিনা চাদ্য জগত্স্বস্থং কুরুষ্ব হ ।। ৭.১০৬.১১ ॥

তেষাং তত্সমবেতানাং বাক্যং ধর্মার্থসংহিতম্ ।
শ্রুত্বা পরিষদো মধ্যে রামো লক্ষ্মণমব্রবীৎ ।। ৭.১০৬.১২ ॥

বিসর্জয়ে ত্বাং সৌমিত্রে মা ভূদ্ধর্মবিপর্যয়ঃ ।
ত্যাগো বধো বা বিহিতঃ সাধূনাং তূভয়ং সমম্ ।। ৭.১০৬.১৩ ॥

রামেণ ভাষিতে বাক্যে বাষ্পব্যাকুলিতেন্দ্রিয়ঃ ।
লক্ষ্মণস্ত্বরিতং প্রায়াত্স্বগৃহং ন বিবেশ হ ।। ৭.১০৬.১৪ ॥

স গত্বা সরয়ূতীরমুপস্পৃশ্য কৃতাঞ্জলিঃ ।
নিগৃহ্য সর্বস্রোতাংসি নিঃশ্বাসং ন মুমোচ হ ।। ৭.১০৬.১৫ ॥

অনিঃশ্বসন্তং যুক্তং তং সশক্রাঃ সাপ্সরোগণাঃ ।
দেবাঃ সর্ষিগণাঃ সর্বে পুষ্পৈরভ্যকিরংস্তদা ।। ৭.১০৬.১৬ ॥

অদৃশ্যং সর্বমনুজৈঃ সশরীরং মহাবলম্ ।
প্রগৃহ্য লক্ষ্মণং শক্রস্ত্রিদিবং সংবিবেশ হ ।। ৭.১০৬.১৭ ॥

ততো বিষ্ণোশ্চতুর্ভাগমাগতং সুরসত্তমাঃ ।
দৃষ্ট্বা প্রমুদিতাঃ সর্বে ঽপূজয়ন্ সমহর্ষয়ঃ ।। ৭.১০৬.১৮ ।।