Utshovসর্গ 105
105.1
তথা তয়োঃ সংবদতোর্দুর্বাসা ভগবানৃষিঃ ।
রামস্য দর্শনাকাঙ্ক্ষী রাজদ্বারমুপাগমৎ ।। ৭.১০৫.১ ॥
105.2
সো ঽভিগম্য তু সৌমিত্রিমুবাচ ঋষিসত্তমঃ ।
রামং দর্শয় মে শীঘ্রং পুরা মে ঽর্থো ঽতিবর্ততে ।। ৭.১০৫.২ ॥
105.3
মুনেস্তু ভাষিতং শ্রুত্বা লক্ষ্মণঃ পরবীরহা ।
অভিবাদ্য মহাত্মানং বাক্যমেতদুবাচ হ ।। ৭.১০৫.৩ ॥
105.4
কিং কার্যং ব্রূহি ভগবন্কো বা ঽর্থঃ কিং করোম্যহম্ ।
ব্যগ্রো হি রাঘবো ব্রহ্মন্মুহূর্তং প্রতিপাল্যতাম্ ।। ৭.১০৫.৪ ॥
105.5
তচ্ছ্রুত্বা ঋষিশার্দূলঃ ক্রোধেন কলুষীকৃতঃ ।
উবাচ লক্ষ্মণং বাক্যং নির্দহন্নিব চক্ষুষা ।। ৭.১০৫.৫ ॥
105.6
অস্মিন্ক্ষণে মাং সৌমিত্রে রামায় প্রতিবেদয় ।
অস্মিন্ক্ষণে মাং সৌমিত্রে ন নিবেদয়সে যদি ।। ৭.১০৫.৬ ॥
105.7
বিষয়ং ত্বাং পুরং চৈব শপিষ্যে রাঘবং তথা ।
ভরতং চৈব সৌমিত্রে যুষ্মাকং যা চ সন্ততিঃ ।। ৭.১০৫.৭ ॥
105.8
ন হি শক্ষ্যাম্যহং ভূয়ো মন্যুং ধারয়িতুং হৃদি ।
তচ্ছ্রুত্বা ঘোরসঙ্কাশং বাক্যং তস্য মহাত্মনঃ ।চিন্তয়ামাস মনসা তস্য বাক্যস্য নিশ্চয়ম্ ।। ৭.১০৫.৮ ॥
105.9
একস্য মরণং মে ঽস্তু মা ভূত্সর্ববিনাশনম্ ।
ইতি বুদ্ধ্যা বিনিশ্চিত্য রাঘবায় ন্যবেদয়ৎ ।। ৭.১০৫.৯ ॥
105.10
লক্ষ্মণস্য বচঃ শ্রুত্বা রামঃ কালং বিসৃজ্য চ ।
নিস্সৃত্য ত্বরিতং রাজা অত্রেঃ পুত্রং দদর্শ হ ।। ৭.১০৫.১০ ॥
105.11
সো ঽভিবাদ্য মহাত্মানং জ্বলন্তমিব তেজসা ।
কিং কার্যমিতি কাকুত্স্থঃ কৃতাঞ্জলিরভাষত ।। ৭.১০৫.১১ ॥
105.12
তদ্বাক্যং রাঘবেণোক্তং শ্রুত্বা মুনিবরঃ প্রভুম্ ।
প্রত্যাহ রামং দুর্বাসাঃ শ্রূয়তাং ধর্মবত্সল ।। ৭.১০৫.১২ ॥
105.13
অদ্য বর্ষসহস্রস্য সমাপ্তিস্তপসো মম ।
সো ঽহং ভোজনমিচ্ছামি যথাসিদ্ধং তবানঘ ।। ৭.১০৫.১৩ ॥
105.14
তচ্ছ্রুত্বা বচনং রাজা রাঘবঃ প্রীতমানসঃ ।
ভোজনং মুনিমুখ্যায় যথাসিদ্ধমুপাহরৎ ।। ৭.১০৫.১৪ ॥
105.15
স তু ভুক্ত্বা মুনিশ্রেষ্ঠস্তদন্নমমৃতোপমম্ ।
সাধু রামেতি সম্ভাষ্য স্বমাশ্রমমুপাগমৎ ।। ৭.১০৫.১৫ ॥
105.16
তস্মিন্ গতে মুনিবরে স্বাশ্রমং লক্ষ্মণাগ্রজঃ ।
সংস্মৃত্য কালবাক্যানি ততো দুঃখমুপাগমৎ ।। ৭.১০৫.১৬ ॥
105.17
দুঃখেন চ সুসন্তপ্তঃ স্মৃত্বা তদ্ঘোরদর্শনম্ ।
অবাঙ্মুখো দীনমনা ব্যাহর্তুং ন শশাক হ ।। ৭.১০৫.১৭ ॥
105.18
ততো বুদ্ধ্যা বিনিশ্চিত্য কালবাক্যানি রাঘবঃ ।
নৈতদস্তীতি নিশ্চিত্য তূষ্ণীমাসীন্মহায়শাঃ ।। ৭.১০৫.১৮ ।।