সর্গ 104

104.1

শৃণু রাজন্মহাসত্ব যদর্থমহমাগতঃ ।
পিতামহেন দেবেন প্রেষিতো ঽস্মি মহাবল ।। ৭.১০৪.১ ॥

তবাহং পূর্বসদ্ভাবে পুত্রঃ পরপুরঞ্জয় ।
মায়াসম্ভাবিতো বীর কালঃ সর্বসমাহরঃ ।। ৭.১০৪.২ ॥

পিতামহশ্চ ভগবানাহ লোকপতিঃ প্রভুঃ ।
সময়স্তে কৃতঃ সৌম্য লোকান্সম্পরিরক্ষিতুম্ ।। ৭.১০৪.৩ ॥

সঙ্ক্ষিপ্য হি পুরা লোকান্মায়য়া স্বয়মেব হি ।
মহার্ণবে শয়ানো ঽপ্সু মাং ত্বং পূর্বমজীজনঃ ।। ৭.১০৪.৪ ॥

ভোগবন্তং ততো নাগমনন্তমুদকেশয়ম্ ।
মায়য়া জনয়িত্বা ত্বং দ্বৌ চ সত্ত্বৌ মহাবলৌ ।। ৭.১০৪.৫ ॥

মধুং চ কৈটভং চৈব যয়োরস্থিচয়ৈর্বৃতা ।
ইয়ং পর্বতসম্বাধা মেদিনী চাভবন্মহী ।। ৭.১০৪.৬ ॥

পদ্মে দিব্যে ঽর্কসঙ্কাশে নাভ্যামুত্পাদ্য মামপি ।
প্রাজাপত্যং ত্বয়া কর্ম ময়ি সর্বং নিবেশিতম্ ।। ৭.১০৪.৭ ॥

সো ঽহং সন্ন্যস্তভারো হি ত্বামুপাসে জগত্পতিম্ ।
রক্ষাং বিধত্স্ব ভূতেষু মম তেজস্করো ভবান্ ।। ৭.১০৪.৮ ॥

ততস্ত্বমপি দুর্ধর্ষাত্তস্মাদ্ভাবাত্সনাতনাৎ ।
রক্ষার্থং সর্বভূতানাং বিষ্ণুত্বমুপজগ্মিবান্ ।। ৭.১০৪.৯ ॥

অদিত্যাং বীর্যবান্পুত্রো ভ্রাতঽণাং বীর্যবর্ধনঃ ।
সমুত্পন্নেষু কৃত্যেষু তেষাং সাহ্যায় কল্পসে ।। ৭.১০৪.১০ ॥

স ত্বং বিত্রাস্যমানাসু প্রজাসু জগতাং বর ।
রাবণস্য বধাকাঙ্ক্ষী মানুষেষু মনো ঽদধাঃ ।। ৭.১০৪.১১ ॥

দশ বর্ষসহস্রাণি দশ বর্ষশতানি চ ।
কৃত্বা বাসস্য নিয়তিং স্বয়মেবাত্মনা পুরা ।। ৭.১০৪.১২ ॥

স ত্বং মনোময়ঃ পুত্রঃ পূর্ণায়ুর্মানুষেষ্বিহ ।
কালো ঽয়ং তে নরশ্রেষ্ঠ সমীপমুপবর্তিতুম্ ।। ৭.১০৪.১৩ ॥

যদি ভূয়ো মহারাজ প্রজা ইচ্ছস্যুপাসিতুম্ ।
বস বা বীর ভদ্রং ত এবমাহ পিতামহঃ ।। ৭.১০৪.১৪ ॥

অথ বা বিজিগীষা তে সুরলোকায় রাঘব ।
সনাথা বিষ্ণুনা দেবা ভবন্তু বিগতজ্বরাঃ ।। ৭.১০৪.১৫ ॥

শ্রুত্বা পিতামহেনোক্তং বাক্যং কালসমীরিতম্ ।
রাঘবঃ প্রহসন্বাক্যং সর্বসংহারমব্রবীৎ ।। ৭.১০৪.১৬ ॥

শ্রুত্বা মে দেবদেবস্য বাক্যং পরমমদ্ভুতম্ ।
প্রীতির্হি মহতী জাতা তবাগমনসম্ভবা ।। ৭.১০৪.১৭ ॥

ত্রয়াণামপি লোকানাং কার্যার্থং মম সম্ভবঃ ।
ভদ্রং তে ঽস্তু গমিষ্যামি যত এবাহমাগতঃ ।। ৭.১০৪.১৮ ॥

হদ্গতো হ্যসি সম্প্রাপ্তো ন মে তত্র বিচারণা ।
ময়া হি সর্বকৃত্যেষু দেবানাং বশবর্তিনাম্ ।স্থাতব্যং সর্বসংহার যথা হ্যাহ পিতামহঃ ।। ৭.১০৪.১৯ ।।