UtshovSarga 104
104.1
शृणु राजन्महासत्व यदर्थमहमागतः ।
पितामहेन देवेन प्रेषितो ऽस्मि महाबल ।। ७.१०४.१ ॥
Shrinu rajanmahasatva yadarthamahamagatah
Pitamahena devena preshito smi mahabala
104.2
तवाहं पूर्वसद्भावे पुत्रः परपुरञ्जय ।
मायासम्भावितो वीर कालः सर्वसमाहरः ।। ७.१०४.२ ॥
Tavaham purvasadbhave putrah parapuranjaya
Mayasambhavito vira kalah sarvasamaharah
104.3
पितामहश्च भगवानाह लोकपतिः प्रभुः ।
समयस्ते कृतः सौम्य लोकान्सम्परिरक्षितुम् ।। ७.१०४.३ ॥
Pitamahashcha bhagavanaha lokapatih prabhuh
Samayaste kritah saumya lokansamparirakshitum
104.4
सङ्क्षिप्य हि पुरा लोकान्मायया स्वयमेव हि ।
महार्णवे शयानो ऽप्सु मां त्वं पूर्वमजीजनः ।। ७.१०४.४ ॥
Sankshipya hi pura lokanmayaya svayameva hi
Maharnave shayano psu mam tvam purvamajijanah
104.5
भोगवन्तं ततो नागमनन्तमुदकेशयम् ।
मायया जनयित्वा त्वं द्वौ च सत्त्वौ महाबलौ ।। ७.१०४.५ ॥
Bhogavantam tato nagamanantamudakeshayam
Mayaya janayitva tvam dvau cha sattvau mahabalau
104.6
मधुं च कैटभं चैव ययोरस्थिचयैर्वृता ।
इयं पर्वतसम्बाधा मेदिनी चाभवन्मही ।। ७.१०४.६ ॥
Madhum cha kaitabham chaiva yayorasthichayairvrita
Iyam parvatasambadha medini chabhavanmahi
104.7
पद्मे दिव्ये ऽर्कसङ्काशे नाभ्यामुत्पाद्य मामपि ।
प्राजापत्यं त्वया कर्म मयि सर्वं निवेशितम् ।। ७.१०४.७ ॥
Padme divye rkasankashe nabhyamutpadya mamapi
Prajapatyam tvaya karma mayi sarvam niveshitam
104.8
सो ऽहं सन्न्यस्तभारो हि त्वामुपासे जगत्पतिम् ।
रक्षां विधत्स्व भूतेषु मम तेजस्करो भवान् ।। ७.१०४.८ ॥
So ham sannyastabharo hi tvamupase jagatpatim
Raksham vidhatsva bhuteshu mama tejaskaro bhavan
104.9
ततस्त्वमपि दुर्धर्षात्तस्माद्भावात्सनातनात् ।
रक्षार्थं सर्वभूतानां विष्णुत्वमुपजग्मिवान् ।। ७.१०४.९ ॥
Tatastvamapi durdharshattasmadbhavatsanatanat
Rakshartham sarvabhutanam vishnutvamupajagmivan
104.10
अदित्यां वीर्यवान्पुत्रो भ्रातऽणां वीर्यवर्धनः ।
समुत्पन्नेषु कृत्येषु तेषां साह्याय कल्पसे ।। ७.१०४.१० ॥
Adityam viryavanputro bhratanam viryavardhanah
Samutpanneshu krityeshu tesham sahyaya kalpase
104.11
स त्वं वित्रास्यमानासु प्रजासु जगतां वर ।
रावणस्य वधाकाङ्क्षी मानुषेषु मनो ऽदधाः ।। ७.१०४.११ ॥
Sa tvam vitrasyamanasu prajasu jagatam vara
Ravanasya vadhakankshi manusheshu mano dadhah
104.12
दश वर्षसहस्राणि दश वर्षशतानि च ।
कृत्वा वासस्य नियतिं स्वयमेवात्मना पुरा ।। ७.१०४.१२ ॥
Dasha varshasahasrani dasha varshashatani cha
Kritva vasasya niyatim svayamevatmana pura
104.13
स त्वं मनोमयः पुत्रः पूर्णायुर्मानुषेष्विह ।
कालो ऽयं ते नरश्रेष्ठ समीपमुपवर्तितुम् ।। ७.१०४.१३ ॥
Sa tvam manomayah putrah purnayurmanusheshviha
Kalo yam te narashreshtha samipamupavartitum
104.14
यदि भूयो महाराज प्रजा इच्छस्युपासितुम् ।
वस वा वीर भद्रं त एवमाह पितामहः ।। ७.१०४.१४ ॥
Yadi bhuyo maharaja praja ichchhasyupasitum
Vasa va vira bhadram ta evamaha pitamahah
104.15
अथ वा विजिगीषा ते सुरलोकाय राघव ।
सनाथा विष्णुना देवा भवन्तु विगतज्वराः ।। ७.१०४.१५ ॥
Atha va vijigisha te suralokaya raghava
Sanatha vishnuna deva bhavantu vigatajvarah
104.16
श्रुत्वा पितामहेनोक्तं वाक्यं कालसमीरितम् ।
राघवः प्रहसन्वाक्यं सर्वसंहारमब्रवीत् ।। ७.१०४.१६ ॥
Shrutva pitamahenoktam vakyam kalasamiritam
Raghavah prahasanvakyam sarvasanharamabravit
104.17
श्रुत्वा मे देवदेवस्य वाक्यं परममद्भुतम् ।
प्रीतिर्हि महती जाता तवागमनसम्भवा ।। ७.१०४.१७ ॥
Shrutva me devadevasya vakyam paramamadbhutam
Pritirhi mahati jata tavagamanasambhava
104.18
त्रयाणामपि लोकानां कार्यार्थं मम सम्भवः ।
भद्रं ते ऽस्तु गमिष्यामि यत एवाहमागतः ।। ७.१०४.१८ ॥
Trayanamapi lokanam karyartham mama sambhavah
Bhadram te stu gamishyami yata evahamagatah
104.19
हद्गतो ह्यसि सम्प्राप्तो न मे तत्र विचारणा ।
मया हि सर्वकृत्येषु देवानां वशवर्तिनाम् ।स्थातव्यं सर्वसंहार यथा ह्याह पितामहः ।। ७.१०४.१९ ।।
Hadgato hyasi samprapto na me tatra vicharana
Maya hi sarvakrityeshu devanam vashavartinam, sthatavyam sarvasanhara yatha hyaha pitamahah