সর্গ 103

103.1

কস্যচিত্ত্বথ কালস্য রামে ধর্মপরে স্থিতে ।
কালস্তাপসরূপেণ রাজদ্বারমুপাগমৎ ।। ৭.১০৩.১ ॥

সো ঽব্রবীল্লক্ষ্মণং বাক্যং ধৃতিমন্তং যশশ্বিনম্ ।
মাং নিবেদয় রামায় সম্প্রাপ্তং কার্যগৌরবাৎ ।। ৭.১০৩.২ ॥

দূতো ঽস্ম্যতিবলস্যাহং মহর্ষেরমিতৌজসঃ ।
রামং দিদৃক্ষুরায়াতঃ কার্যেণ হি মহাবল ।। ৭.১০৩.৩ ॥

তস্য তদ্বচনং শ্রুত্বা সৌমিত্রিস্ত্বরয়া ঽন্বিতঃ ।
ন্যবেদয়ত রামায় তাপসং তং সমাগতম্ ।। ৭.১০৩.৪ ॥

জয়স্ব রাম ধর্মেণ উভৌ লোকৌ মহাদ্যুতে ।
দূতস্ত্বাং দ্রষ্টুমায়াতস্তপসা ভাস্করপ্রভঃ ।। ৭.১০৩.৫ ॥

তদ্বাক্যং লক্ষ্মণেনোক্তং শ্রুত্বা রাম উবাচ হ ।
প্রবেশ্যতাং মুনিস্তাত মহৌজাস্তস্য বাক্যধৃৎ ।। ৭.১০৩.৬ ॥

সৌমিত্রিস্তু তথেত্যুক্ত্বা প্রাবেশয়ত তং মুনিম্ ।
জ্বলন্তমেব তেজোভিঃ প্রদহন্তমিবাংশুভিঃ ।। ৭.১০৩.৭ ॥

সো ঽভিগম্য রঘুশ্রেষ্ঠং দীপ্যপানং স্বতেজসা ।
ঋষির্মধুরয়া বাচা বর্ধস্বেত্যাহ রাঘবম্ ।। ৭.১০৩.৮ ॥

তস্মৈ রামো মহাতেজাঃ পূজামর্ঘ্যপুরোগমাম্ ।
দদৌ কুশলমব্যগ্রং প্রষ্টুমেবোপচক্রমে ।। ৭.১০৩.৯ ॥

পৃষ্টশ্চ কুশলং তেন রামেণ বদতাং বরঃ ।
আসনে কাঞ্চনে দিব্যে নিষসাদ মহায়শাঃ ।। ৭.১০৩.১০ ॥

তমুবাচ ততো রামঃ স্বাগতং তে মহামুনে ।
প্রাপয়াস্য চ বাক্যানি যতো দূতস্ত্বমাগতঃ ।। ৭.১০৩.১১ ॥

চোদিতো রাজসিংহেন মুনির্বাক্যমভাষত ।
দ্বন্দ্বমেতত্প্রবক্তব্যং হিতং বৈ যদ্যপেক্ষসে ।। ৭.১০৩.১২ ॥

যঃ শৃণোতি নিরীক্ষেদ্বা স বধ্যো ভবিতা তব ।
ভবেদ্বৈ মুনিমুখ্যস্য বচনং যদ্যপেক্ষসে ।। ৭.১০৩.১৩ ॥

স তথেতি প্রতিজ্ঞায় রামো লক্ষ্মণমব্রবীৎ ।
দ্বারি তিষ্ঠ মহাবাহো প্রতিহারং বিসর্জয় ।। ৭.১০৩.১৪ ॥

স মে বধ্যঃ খলু ভবেৎ কথাদ্বন্দ্বং সমীরিতম্ ।
ঋষের্মম চ সৌমিত্রে পশ্যেদ্বা শৃণুয়াচ্চ যঃ ।। ৭.১০৩.১৫ ॥

ততো নিক্ষিপ্য কাকুত্স্থো লক্ষ্মণং দ্বারি সঙ্গ্রহম্ ।
তমুবাচ মুনে বাক্যং কথয়স্বেতি রাঘবঃ ।। ৭.১০৩.১৬ ॥

যত্তে মনীষিতং বাক্যং যেন বা ঽসি সমাহিতঃ ।
কথয়স্বাবিশঙ্কস্ত্বং মমাপি হৃদি বর্ততে ।। ৭.১০৩.১৭ ।।