সর্গ 102

102.1

তচ্ছ্রুত্বা হর্ষমাপেদে রাঘবো ভ্রাতৃভিঃ সহ ।
বাক্যং চাদ্ভুতসঙ্কাশং তদা প্রোবাচ লক্ষ্মণম্ ।। ৭.১০২.১ ॥

ইমৌ কুমারৌ সৌমিত্রে তব ধর্মবিশারদৌ ।
অঙ্গদশ্চন্দ্রকেতুশ্চ রাজ্যার্থে দৃঢবিক্রমৌ ।। ৭.১০২.২ ॥

ইমৌ রাজ্যে ঽভিষেক্ষ্যামি দেশঃ সাধু বিধীয়তাম্ ।
রমণীয়ো হ্যসম্বাধো রমেতাং যত্র ধন্বিনৌ ।। ৭.১০২.৩ ॥

ন রাজ্ঞো যত্র পীডা স্যান্নাশ্রমাণাং বিনাশনম্ ।
স দেশো দৃশ্যতাং সৌম্য নাপরাধ্যামহে যথা ।। ৭.১০২.৪ ॥

তথোক্তবতি রামে তু ভরতঃ প্রত্যুবাচ হ ।
অয়ং কারুপথো দেশো রমণীয়ো নিরাময়ঃ ।। ৭.১০২.৫ ॥

নিবেশ্যতাং তত্র পুরমঙ্গদস্য মহাত্মনঃ ।
চন্দ্রকেতোঃ সুরুচিরং চন্দ্রকান্তং নিরাময়ম্ ।। ৭.১০২.৬ ॥

তদ্বাক্যং ভরতেনোক্তং প্রতিজগ্রাহ রাঘবঃ ।
তং চ কৃত্বা বশে দেশমঙ্গদস্য ন্যবেশয়ৎ ।। ৭.১০২.৭ ॥

অঙ্গদীয়া পুরী রম্যাপ্যঙ্গদস্য নিবেশিতা ।
রমণীয়া সুগুপ্তা চ রামেণাক্লিষ্টকর্মণা ।। ৭.১০২.৮ ॥

চন্দ্রকেতোশ্চ মল্লস্য মল্লভূম্যাং নিবেশিতা ।
চন্দ্রকান্তেতি বিখ্যাতা দিব্যা স্বর্গপুরী যথা ।। ৭.১০২.৯ ॥

ততো রামঃ পরাং প্রীতিং লক্ষ্মণো ভরতস্তথা ।
যয়ুর্যুদ্ধে দুরাধর্ষা অভিষেকং চ চক্রিরে ।। ৭.১০২.১০ ॥

অভিষিচ্য কুমারৌ স প্রস্থাপয়তি রাঘবঃ ।
অঙ্গদং পশ্চিমাং ভূমিং চন্দ্রকেতুমুদঙ্মুখম্ ।। ৭.১০২.১১ ॥

অঙ্গদং চাপি সৌমিত্রির্লক্ষ্মণো ঽনুজগাম হ ।
চন্দ্রকেতোস্তু ভরতঃ পার্ষ্ণিগ্রাহো বভূব হ ।। ৭.১০২.১২ ॥

লক্ষ্মণস্ত্বঙ্গদীয়ায়াং সংবত্সরমথোষিতঃ ।
পুত্রে স্থিতে দুরাধর্ষে অয়োধ্যাং পুনরাগমৎ ।। ৭.১০২.১৩ ॥

ভরতো ঽপি তথৈবোষ্য সংবত্সরমতো ঽধিকম্ ।
অয়োধ্যাং পুনরাগম্য রামপাদাবুপাস্ত সঃ ।। ৭.১০২.১৪ ॥

উভৌ সৌমিত্রিভরতৌ রামপাদাবনুব্রতৌ ।
কালং গতমপি স্নেহান্ন জজ্ঞাতে ঽতিধার্মিকৌ ।। ৭.১০২.১৫ ॥

এবং বর্ষসহস্রাণি দশ তেষাং যয়ুস্তদা ।
ধর্মে প্রয়তমানানাং পৌরকার্যেষু নিত্যদা ।। ৭.১০২.১৬ ॥

বিহৃত্য কালং পরিপূর্ণমানসাঃ শ্রিয়া বৃতা ধর্মপুরে সুসংস্থিতাঃ ।
ত্রয়ঃ সমিদ্ধা ইব দীপ্ততেজসো মহাধ্বরে সাধু হুতাস্ত্রয়ো ঽগ্নয়ঃ ।। ৭.১০২.১৭ ।।