সর্গ 101

101.1

শ্রুত্বা সেনাপতিং প্রাপ্তং ভরতং কেকয়াধিপঃ ।
যুধাজিদ্গার্গ্যসহিতং পরাং প্রীতিমুপাগমৎ ।। ৭.১০১.১ ॥

স নির্যয়ৌ জনৌঘেন মহতা কেকয়াধিপঃ ।
ত্বরমাণো ঽভিচক্রাম গন্ধর্বান্কামরূপিণঃ ।। ৭.১০১.২ ॥

ভরতশ্চ যুধাজিচ্চ সমেতৌ লঘুবিক্রমৈঃ ।
গন্ধর্বনগরং প্রাপ্তৌ সবলৌ সপদানুগৌ ।। ৭.১০১.৩ ॥

শ্রুত্বা তু ভরতং প্রাপ্তং গন্ধর্বাস্তে সমাগতাঃ ।
যোদ্ধুকামা মহাবীর্যা ব্যনদন্ বৈ সমন্ততঃ ।। ৭.১০১.৪ ॥

ততঃ সমভবদ্যুদ্ধং তুমুলং রোমহর্ষণম্ ।
সপ্তরাত্রং মহাভীমং ন চান্যতরয়োর্জয়ঃ ।। ৭.১০১.৫ ॥

খড্গশক্তিধনুর্গ্রাহা নদ্যঃ শোণিতসংস্রবাঃ ।
নৃকলেবরবাহিন্যঃ প্রবৃত্তাঃ সর্বতোদিশম্ ।। ৭.১০১.৬ ॥

ততো রামানুজঃ ক্রুদ্ধঃ কালস্যাস্ত্রং সুদারুণম্ ।
সংবর্তং নাম ভরতো গন্ধর্বেষ্বভ্যচোদয়ৎ ।। ৭.১০১.৭ ॥

তে বদ্ধাঃ কালপাশেন সংবর্তেন বিদারিতাঃ ।
ক্ষণেনাভিহতাস্তেন তিস্রঃ কোট্যো মহাত্মনাম্ ।। ৭.১০১.৮ ॥

তং ঘাতং ঘোরসঙ্কাশং ন স্মরন্তি দিবৌকসঃ ।
নিমেষান্তরমাত্রেণ তাদৃশানাং মহাত্মনাম্ ।। ৭.১০১.৯ ॥

হতেষু তেষু সর্বেষু ভরতঃ কেকয়ীসুতঃ ।
নিবেশয়ামাস তদা সমৃদ্ধে দ্বে পুরোত্তমে ।। ৭.১০১.১০ ॥

তক্ষং তক্ষশিলায়াং তু পুষ্কলং পুষ্কলাবতে ।
গন্ধর্বদেশে রুচিরে গান্ধারবিষয়ে চ সঃ ।। ৭.১০১.১১ ॥

ধনরত্নৌঘসঙ্কীর্ণে কাননৈরুপশোভিতে ।
অন্যোন্যসঙ্ঘর্ষকৃতে স্পর্ধয়া গুণবিস্তরৈঃ ।। ৭.১০১.১২ ॥

উভে সুরুচিরপ্রখ্যে ব্যবহারৈরকিল্বিষৈঃ ।
উদ্যানয়ানসম্পূর্ণে সুবিভক্তান্তরাপণে ।। ৭.১০১.১৩ ॥

উভে পুরবরে রম্যে বিস্তরৈরুপশোভিতে ।
গৃহমুখ্যৈঃ সুরুচিরৈর্বিমানসমবর্ণিভিঃ ।। ৭.১০১.১৪ ॥

শোভিতে শোভনীয়ৈশ্চ দেবায়তনবিস্তরৈঃ ।
তালৈস্তমালৈস্তিলকৈর্বকুলৈরুপশোভিতে ।। ৭.১০১.১৫ ॥

নিবেশ্য পঞ্চভির্বর্ষৈর্ভরতো রাঘবানুজঃ ।
পুনরায়ান্মহাবাহুরয়োধ্যাং কেকয়ীসুতঃ ।। ৭.১০১.১৬ ॥

সো ঽভিবাদ্য মহাত্মানং সাক্ষাদ্ধর্মমিবাপরম্ ।
রাঘবং ভরতঃ শ্রীমান্ব্রহ্মাণমিব বাসবঃ ।। ৭.১০১.১৭ ॥

শশংস চ যথাবৃত্তং গন্ধর্ববধমুত্তমম্ ।
নিবেশনং চ দেশস্য শ্রুত্বা প্রীতো ঽস্য রাঘবঃ ।। ৭.১০১.১৮ ।।