UtshovSarga 101
101.1
श्रुत्वा सेनापतिं प्राप्तं भरतं केकयाधिपः ।
युधाजिद्गार्ग्यसहितं परां प्रीतिमुपागमत् ।। ७.१०१.१ ॥
Shrutva senapatim praptam bharatam kekayadhipah
Yudhajidgargyasahitam param pritimupagamat
101.2
स निर्ययौ जनौघेन महता केकयाधिपः ।
त्वरमाणो ऽभिचक्राम गन्धर्वान्कामरूपिणः ।। ७.१०१.२ ॥
Sa niryayau janaughena mahata kekayadhipah
Tvaramano bhichakrama gandharvankamarupinah
101.3
भरतश्च युधाजिच्च समेतौ लघुविक्रमैः ।
गन्धर्वनगरं प्राप्तौ सबलौ सपदानुगौ ।। ७.१०१.३ ॥
Bharatashcha yudhajichcha sametau laghuvikramaih
Gandharvanagaram praptau sabalau sapadanugau
101.4
श्रुत्वा तु भरतं प्राप्तं गन्धर्वास्ते समागताः ।
योद्धुकामा महावीर्या व्यनदन् वै समन्ततः ।। ७.१०१.४ ॥
Shrutva tu bharatam praptam gandharvaste samagatah
Yoddhukama mahavirya vyanadan vai samantatah
101.5
ततः समभवद्युद्धं तुमुलं रोमहर्षणम् ।
सप्तरात्रं महाभीमं न चान्यतरयोर्जयः ।। ७.१०१.५ ॥
Tatah samabhavadyuddham tumulam romaharshanam
Saptaratram mahabhimam na chanyatarayorjayah
101.6
खड्गशक्तिधनुर्ग्राहा नद्यः शोणितसंस्रवाः ।
नृकलेवरवाहिन्यः प्रवृत्ताः सर्वतोदिशम् ।। ७.१०१.६ ॥
Khadgashaktidhanurgraha nadyah shonitasansravah
Nrikalevaravahinyah pravrittah sarvatodisham
101.7
ततो रामानुजः क्रुद्धः कालस्यास्त्रं सुदारुणम् ।
संवर्तं नाम भरतो गन्धर्वेष्वभ्यचोदयत् ।। ७.१०१.७ ॥
Tato ramanujah kruddhah kalasyastram sudarunam
Sanvartam nama bharato gandharveshvabhyachodayat
101.8
ते बद्धाः कालपाशेन संवर्तेन विदारिताः ।
क्षणेनाभिहतास्तेन तिस्रः कोट्यो महात्मनाम् ।। ७.१०१.८ ॥
Te baddhah kalapashena sanvartena vidaritah
Kshanenabhihatastena tisrah kotyo mahatmanam
101.9
तं घातं घोरसङ्काशं न स्मरन्ति दिवौकसः ।
निमेषान्तरमात्रेण तादृशानां महात्मनाम् ।। ७.१०१.९ ॥
Tam ghatam ghorasankasham na smaranti divaukasah
Nimeshantaramatrena tadrishanam mahatmanam
101.10
हतेषु तेषु सर्वेषु भरतः केकयीसुतः ।
निवेशयामास तदा समृद्धे द्वे पुरोत्तमे ।। ७.१०१.१० ॥
Hateshu teshu sarveshu bharatah kekayisutah
Niveshayamasa tada samriddhe dve purottame
101.11
तक्षं तक्षशिलायां तु पुष्कलं पुष्कलावते ।
गन्धर्वदेशे रुचिरे गान्धारविषये च सः ।। ७.१०१.११ ॥
Taksham takshashilayam tu pushkalam pushkalavate
Gandharvadeshe ruchire gandharavishaye cha sah
101.12
धनरत्नौघसङ्कीर्णे काननैरुपशोभिते ।
अन्योन्यसङ्घर्षकृते स्पर्धया गुणविस्तरैः ।। ७.१०१.१२ ॥
Dhanaratnaughasankirne kananairupashobhite
Anyonyasangharshakrite spardhaya gunavistaraih
101.13
उभे सुरुचिरप्रख्ये व्यवहारैरकिल्बिषैः ।
उद्यानयानसम्पूर्णे सुविभक्तान्तरापणे ।। ७.१०१.१३ ॥
Ubhe suruchiraprakhye vyavaharairakilbishaih
Udyanayanasampurne suvibhaktantarapane
101.14
उभे पुरवरे रम्ये विस्तरैरुपशोभिते ।
गृहमुख्यैः सुरुचिरैर्विमानसमवर्णिभिः ।। ७.१०१.१४ ॥
Ubhe puravare ramye vistarairupashobhite
Grihamukhyaih suruchirairvimanasamavarnibhih
101.15
शोभिते शोभनीयैश्च देवायतनविस्तरैः ।
तालैस्तमालैस्तिलकैर्वकुलैरुपशोभिते ।। ७.१०१.१५ ॥
Shobhite shobhaniyaishcha devayatanavistaraih
Talaistamalaistilakairvakulairupashobhite
101.16
निवेश्य पञ्चभिर्वर्षैर्भरतो राघवानुजः ।
पुनरायान्महाबाहुरयोध्यां केकयीसुतः ।। ७.१०१.१६ ॥
Niveshya panchabhirvarshairbharato raghavanujah
Punarayanmahabahurayodhyam kekayisutah
101.17
सो ऽभिवाद्य महात्मानं साक्षाद्धर्ममिवापरम् ।
राघवं भरतः श्रीमान्ब्रह्माणमिव वासवः ।। ७.१०१.१७ ॥
So bhivadya mahatmanam sakshaddharmamivaparam
Raghavam bharatah shrimanbrahmanamiva vasavah
101.18
शशंस च यथावृत्तं गन्धर्ववधमुत्तमम् ।
निवेशनं च देशस्य श्रुत्वा प्रीतो ऽस्य राघवः ।। ७.१०१.१८ ।।
Shashansa cha yathavrittam gandharvavadhamuttamam
Niveshanam cha deshasya shrutva prito sya raghavah