UtshovSarga 107
107.1
विसृज्य लक्ष्मणं रामो दुःखशोकसमन्वितः ।
पुरोधसं मन्त्रिणश्च नैगमांश्चेदमब्रवीत् ।। ७.१०७.१ ॥
Visrijya lakshmanam ramo duhkhashokasamanvitah
Purodhasam mantrinashcha naigamanshchedamabravit
107.2
अद्य राज्ये ऽभिषेक्ष्यामि भरतं धर्मवत्सलम् ।
अयोध्यायाः पतिं वीरं ततो यास्याम्यहं वनम् ।। ७.१०७.२ ॥
Adya rajye bhishekshyami bharatam dharmavatsalam
Ayodhyayah patim viram tato yasyamyaham vanam
107.3
प्रवेशयत सम्भारान्माभूत्कालस्य पर्ययः ।
अद्यैवाहं गमिष्यामि लक्ष्मणेन गतां गतिम् ।। ७.१०७.३ ॥
Praveshayata sambharanmabhutkalasya paryayah
Adyaivaham gamishyami lakshmanena gatam gatim
107.4
तच्छ्रुत्वा राघवेणोक्तं सर्वाः प्रकृतयो भृशम् ।
मूर्धभिः प्रणता भूमौ गतसत्त्वा इवाभवन् ।। ७.१०७.४ ॥
Tachchhrutva raghavenoktam sarvah prakritayo bhrisham
Murdhabhih pranata bhumau gatasattva ivabhavan
107.5
भरतश्च विसञ्ज्ञो ऽभूच्छ्रुत्वा रामस्य भाषितम् ।
राज्यं विगर्हयामास राघवं चेदमब्रवीत् ।। ७.१०७.५ ॥
Bharatashcha visangyo bhuchchhrutva ramasya bhashitam
Rajyam vigarhayamasa raghavam chedamabravit
107.6
सत्येनाहं शपे राजन्स्वर्गलोके न चैव हि ।
न कामये यथा राज्यं त्वां विना रघुनन्दन ।। ७.१०७.६ ॥
Satyenaham shape rajansvargaloke na chaiva hi
Na kamaye yatha rajyam tvam vina raghunandana
107.7
इमौ कुशलवौ राजन्नभिषिञ्च नराधिप ।
कोसलेषु कुशं वीरमुत्तरेषु तथा लवम् ।। ७.१०७.७ ॥
Imau kushalavau rajannabhishincha naradhipa
Kosaleshu kusham viramuttareshu tatha lavam
107.8
शत्रुघ्नस्य तु गच्छन्तु दूतास्त्वरितविक्रमाः ।
इदं गमनमस्माकं स्वर्गायाख्यातु मा चिरम् ।। ७.१०७.८ ॥
Shatrughnasya tu gachchhantu dutastvaritavikramah
Idam gamanamasmakam svargayakhyatu ma chiram
107.9
तच्छ्रुत्वा भरतेनोक्तं दृष्ट्वा चापि ह्यधोमुखान् ।
पौरान्दुःखेन सन्तप्तान्वसिष्ठो वाक्यमब्रवीत् ।। ७.१०७.९ ॥
Tachchhrutva bharatenoktam drishtva chapi hyadhomukhan
Pauranduhkhena santaptanvasishtho vakyamabravit
107.10
वत्स राम इमाः पश्य धरणीं प्रकृतीर्गताः ।
ज्ञात्वैषामीप्सितं कार्यं मा चैषां विप्रियं कृथाः ।। ७.१०७.१० ॥
Vatsa rama imah pashya dharanim prakritirgatah
Gyatvaishamipsitam karyam ma chaisham vipriyam krithah
107.11
वसिष्ठस्य तु वाक्येन उत्थाप्य प्रकृतीजनम् ।
किं करोमीति काकुत्स्थः सर्वा वचनमब्रवीत् ।। ७.१०७.११ ॥
Vasishthasya tu vakyena utthapya prakritijanam
Kim karomiti kakutsthah sarva vachanamabravit
107.12
ततः सर्वाः प्रकृतयो रामं वचनमब्रुवन् ।
गच्छन्तमनुगच्छामो यत्र राम गमिष्यसि ।। ७.१०७.१२ ॥
Tatah sarvah prakritayo ramam vachanamabruvan
Gachchhantamanugachchhamo yatra rama gamishyasi
107.13
पौरेषु यदि ते प्रीतिर्यदि स्नेहो ह्यनुत्तमः ।
सपुत्रदाराः काकुत्स्थ समागच्छाम सत्पथम् ।। ७.१०७.१३ ॥
Paureshu yadi te pritiryadi sneho hyanuttamah
Saputradarah kakutstha samagachchhama satpatham
107.14
तपोवनं वा दुर्गं वा नदीमम्भोनिधिं तथा ।
वयं ते यदि न त्याज्याः सर्वान्नो नय ईश्वर ।। ७.१०७.१४ ॥
Tapovanam va durgam va nadimambhonidhim tatha
Vayam te yadi na tyajyah sarvanno naya ishvara
107.15
एषा नः परमा प्रीतिरेष नः परमो वरः ।
हृद्गता नः सदा प्रीतिस्तवानुगमने नृप ।। ७.१०७.१५ ॥
Esha nah parama pritiresha nah paramo varah
Hridgata nah sada pritistavanugamane nripa
107.16
पौराणां दृढभक्तिं च बाढमित्येव सो ऽब्रवीत् ।
स्वकृतान्तं चान्ववेक्ष्य तस्मिन्नहनि राघवः ।। ७.१०७.१६ ॥
Pauranam dridhabhaktim cha badhamityeva so bravit
Svakritantam chanvavekshya tasminnahani raghavah
107.17
कोसलेषु कुशं वीरमुत्तरेषु तथा लवम् ।
अभिषिच्य महात्मानावुभौ रामः कुशीलवौ ।। ७.१०७.१७ ॥
Kosaleshu kusham viramuttareshu tatha lavam
Abhishichya mahatmanavubhau ramah kushilavau
107.18
अभिषिक्तौ सुतावङ्के प्रतिष्ठाप्य पुरे ततः ।
परिष्वज्य महाबाहुर्मूर्ध्न्युपाघ्राय चासकृत् ।। ७.१०७.१८ ॥
Abhishiktau sutavanke pratishthapya pure tatah
Parishvajya mahabahurmurdhnyupaghraya chasakrit
107.19
रथानां तु सहस्राणि नागानामयुतानि च ।
दशायुतानि चाश्वानामेकैकस्य धनं ददौ ।। ७.१०७.१९ ॥
Rathanam tu sahasrani naganamayutani cha
Dashayutani chashvanamekaikasya dhanam dadau
107.20
बहुरत्नौ बहुधनौ हृष्टपुष्टजनावृतौ ।
स्वे पुरे प्रेषयामास भ्रातरौ तु कुशीलवौ ।। ७.१०७.२० ॥
Bahuratnau bahudhanau hrishtapushtajanavritau
Sve pure preshayamasa bhratarau tu kushilavau
107.21
अभिषिच्य सुतौ वीरौ प्रतिष्ठाप्य पुरे तदा ।
दूतान्सम्प्रेषयामास शत्रुघ्नाय महात्मने ।। ७.१०७.२१ ।।
Abhishichya sutau virau pratishthapya pure tada
Dutansampreshayamasa shatrughnaya mahatmane